Ndrom Samƀŭt bơh Ôsê 9 - Nau Brah Ndu Ngơi 2023

Nau tâm rmal ăn ma phung Israel

¹ Hơi Israel, lơi ta răm rhơn ôh! Lơi maak ir ôh nâm bu phung mpôl băl êng. Yorlah may hŏ ƀư jêh nau ka n'hong, chalơi Brah Ndu may. May ŭch jêh ma nau prăk nkhôm du huê bu ur ka n'hong Ta lĕ rngôch ntŭk mprah ba.

² Ntŭk mprah ba jêh ri ntu păt ndrănh, tâm ban lĕ mâu dơi siăm khân păng ôh Ndrănh mhe mra ƀư ma khân may roh nau kâp gân.

³ Khân păng mâu mra gŭ tâm bri Brah Yêhôva ôh Ƀiălah Êphraim mra plơ̆ sĭt ma n'gor Êjipt Jêh ri mra sa ndơ sa ƀơ̆ ƀơch tâm bri Asiri.

⁴ Khân păng mâu mra kêt ndrănh ndơ nhhơr nhêt ma Brah Yêhôva đŏng ôh, Lĕ mpa ƀư brah khân păng ăt mâu mra ƀư maak nuih n'hâm Păng. Ƀănh khân păng mra jêng nâm bu ƀănh ngih geh rngot ndrê, Mbu moh sa mra jêng ƀơ̆ ƀơch da dê; Yorlah ƀănh khân păng knŏng prăp ma khân păng nơm bah ji ngot, Mâu dơi djôt lăp ôh tâm ngih Brah Yêhôva.

⁵ Mâm khân may mra ƀư tâm lĕ yan nau rƀŭn, Tâm nar rƀŭn ma Brah Yêhôva?

⁶ Nđâp tơlah khân păng klaih bơh nau ƀư rai, Êjipt mra rgum khân păng, Jêh ri Mêmphis mra tâp brôi khân păng. Pih pŭm mra nkŭm ta klơ lĕ ndơ khân păng ƀư ma prăk dŭt khlay, Pôm lok mra hon chăt tâm ngih bok khân păng.

⁷ Lĕ nar tâm rmal lĕ tât jêh, Lĕ nar phat dôih hŏ tât jêh! Israel mra gĭt nau aơ. Nơm mbơh lor jêng du huê rluk, Bunuyh geh brah huêng jêng rluk, Yor nau tih mhĭk may âk ngăn Jêh ri nau ji nuih may toyh ngăn.

⁸ Phung nơm mbơh lor, ndrel ma Brah Ndu gâp Jêng bunuyh gak njrăng Êphraim, Ƀiălah dăk nhuăl nthăng tâm ăp trong păng, Nau ji nuih gŭ tâm ngih Brah Ndu păng.

⁹ Khân păng lĕ rlâm rai jru hâu ngăn Nâm bu tâm lĕ nar Gibêa. Brah Ndu mra kah gĭt tay nau tih mhĭk khân păng, Jêh ri mra tâm rmal nau tih khân păng.

¹⁰ Gâp hŏ mâp Israel Nâm bu mâp rkŭm play krăk ƀâu tâm bri rdah; Gâp hŏ saơ chô yau khân may Nâm bu play bôk rah bôk yan ta klơ tơm play rvi nse. Ƀiălah khân păng hŏ tât Baal-Pêôr; Nhhơr săk jăn khân păng ăn ma ndơ khư bêk prêng, Jêh ri jêng ndơ ƀơ̆ nâm bu ndơ khân păng hŏ rŏng jêh.

¹¹ Nau chrêk rmah Êphraim mra mpăr du nâm bu sĭm; Mâu deh ôh, mâu ntreo lĕ, mâu hôm geh nau ntreo đŏng ôh!

¹² Nđâp tơlah khân păng mât rong phung kon Tâm ban lĕ Gâp mra sŏk lơi kŏ tât mâu hôm geh du huê bu klâu ôh. Rêh ni ngăn yơh ma khân păng Tơlah Gâp chalơi khân păng!

¹³ Gâp saơ jêh Êphraim, nâm bu ƀon Tyre, Dơi tăm jêh tâm ndrêch; Ƀiălah aƀaơ Êphraim mra njŭn phung kon khân păng Njŭn ma phung nkhĭt bunuyh!

¹⁴ Ơ Brah Yêhôva, dăn ăn ma khân păng Moh ndơ May mra ăn ma khân păng? Dăn ăn ma khân păng ndŭl deh nse Jêh ri lĕ toh mâu geh dak toh!

¹⁵ Lĕ rngôch nau djơh mhĭk khân păng gŭ ta ƀon Gilgal da dê; Ta ntŭk nây yơh Gâp tâm rmot ma khân păng. Yor lĕ nau kan djơh mhĭk khân păng Gâp mra mprơh khân păng bơh ngih Gâp; Gâp mâu hôm rŏng ma khân păng đŏng ôh. Lĕ rngôch phung kôranh chiă uănh khân păng jêng phung mâu gŭ răp jăp.

¹⁶ Êphraim bu lơh jêh; Reh păng lĕ kro. Khân păng mâu mra play đŏng ôh; Nđâp tơlah khân păng deh kon Tâm ban lĕ Gâp nkhĭt lơi lĕ kon nau rŏng khân păng hŏ ntreo jêh.”

¹⁷ Brah Ndu gâp mra chalơi khân păng Yorlah khân păng mâu iăt nau Păng Jêh ri khân păng mra hăn nsong mblêng ta nklang lĕ bri dak.