Ndrom Samƀŭt bơh Ôsê 8 - Nau Brah Ndu Ngơi 2023

Israel du pru pra tâm lĕ bri dak

¹ Ăn hom nŭng ta trôm mbung may gay uh! Phung rlăng nâm bu du mlâm klang jŭr pah ngih Brah Yêhôva; Yorlah khân păng hŏ tâm rdâng đah nau tâm rnglăp Gâp, Ƀư tih đah nau vay Gâp.

² Khân păng nter tât ma Gâp: ‘Hơi Brah Ndu hên, hên jêng Israel, Hên gĭt năl May!’

³ Israel hŏ chalơi jêh nau ueh, Nơm rlăng mra tĭng păng.

⁴ Khân păng hŏ njêng hađăch mâu geh tă bơh Gâp, Săch phung kôranh chiă uănh ƀiălah Gâp mâu gĭt ôh. Khân păng sŏk prăk mah khân păng ƀư rup brah Gay ma bu ƀư rai khân păng.

⁵ Hơi Samari, ndrôk kon may lĕ chalơi jêh! Nau ji nuih Gâp hŏ su ma khân păng. Kŏ tât ndah jŏ Khân păng mâu ƀư tih?

⁶ Yorlah ndrôk kon nây bơh Israel ƀư, Du huê bunuyh blau hŏ njêng păng; Păng mâu di Brah Ndu ôh. Ndrôk kon n'gor Samari Bu mra nchah hăch rhên.

⁷ Yorlah khân păng hŏ srih jêh sial mra rek phŭt chuănh. Khân păng jêng tơm ba dâk mâu geh găr, Mâu mra luh jêng rnih môi ôh. Tơlah păng mâu geh luh rnih môi Pôri phung bu năch ăt mra rvăn lĕ.

⁸ Israel bu sa rvăn jêh. Aƀaơ aơ khân păng gŭ ta nklang phung ƀon lan Nâm bu ndô ndơ bu mâu ŭch rŏng ôh.

⁹ Yorlah khân păng hăn hao jêh ma bri Asiri Nâm bu du mlâm seh bri hăn nsong mblêng êng du huê. Êphraim hŏ nkhôm phung rŏng ma păng.

¹⁰ Nđâp tơlah khân păng nkhôm âk gay tâm rnglăp đah lĕ bri dak Pôri abaơ ăt Gâp mra tâm rgum khân păng. Gay mâu jŏ đŏng ôh khân păng ntơm râm nsâr Tâm dâng bơh hađăch jêh ri phung kôranh chiă uănh.

¹¹ Dôl Êphraim lơ hâu ntop âk nơng ƀư brah gay chuai nau tih Pôri lĕ nơng ƀư brah nây lơ hâu ntŭp păng tâm nau tih.

¹² Gâp nchih jêh ma păng âk rbăn ntil tâm nau Gâp ntrŭnh, Ƀiălah păng uănh ma nau ntrŭnh nâm bu mâu geh khlay.

¹³ Nđâp tơlah khân păng nhhơr mpa ƀư brah ma Gâp Jêh ri sa puăch mpa ƀư brah, Ƀiălah Brah Yêhôva ăt mâu sŏk dơn khân păng. Abaơ Păng kah gĭt tay nau djơh mhĭk khân păng Jêh ri tâm rmal nau tih khân păng; Khân păng mra plơ̆ sĭt ma n'gor Êjipt!

¹⁴ Phung Israel hŏ chuêl jêh Nơm Rhăk Njêng khân păng, Mĭn ndâk âk rplay ngih hađăch; Phung Yuđa hŏ ntop âk ƀon toyh geh mpêr nâp; Ƀiălah Gâp mra su ma ŭnh lĕ ƀon toyh nây Jêh ri ŭnh mra sa pôih nâp păng.