Ndrom Samƀŭt bơh Ôsê 7 - Nau Brah Ndu Ngơi 2023

Nau tih mhĭk phung Israel

¹ Tơlah Gâp ŭch ƀư bah ăn ma Israel Pôri nau tih Êphraim Jêh ri nau djơh mhĭk phung Samari hŏ mpơl jêh. Yorlah khân păng ƀư ma nau mƀruh, Phung ntŭng lăp tâm trôm Jêh ri phung kâp pit ƀư rai padih.

² Khân păng mâu mĭn êng tâm nuih n'hâm Gâp kah gĭt lĕ rngôch nau mhĭk khân păng. Aƀaơ aơ kan tih mhĭk khân păng nchueng khân păng nơm, Gŭ panăp Gâp.

³ Khân păng sŏk nau djơh mhĭk khân păng ƀư maak nuih n'hâm hađăch, Sŏk nau mƀruh ƀư di nuih n'hâm phung kôranh.

⁴ Lĕ rngôch khân păng jêng phung văng tĭr da dê, Nâm bu năk ŭnh gŭch nđông ƀănh ŭnh sa, Phung gŭch nđông ƀănh rlu ntrôt ŭnh Ntơm bơh piăch rnih kŏ tât nôk rnih ră ndrui.

⁵ Tâm nar maak hađăch he Phung kôranh ji kop yor n'hôl ƀâu ndrănh; Hađăch nhŭp ti nđâp phung suai rak.

⁶ Khân păng kâp rmiăt, nuih n'hâm khân păng bêng nchră ƀư Nâm bu năk ŭnh nđông hit; Phung gŭch nđông ƀănh bê̆ch lĕ măng Ƀiălah tât ang ôi năk ŭnh nđông hôm e hit gring gring.

⁷ Lĕ rngôch khân păng duh da dê nâm bu năk ŭnh Sa rvăn phung kôranh phat dôih khân păng. Lĕ rngôch phung hađăch khân păng lĕ rlâm tŭp da dê Mâu geh ôh du huê tâm phung khân păng kuăl mbơh sơm ma Gâp.

⁸ “Êphraim tâm pot lai đah phung ƀon lan êng; Êphraim jêng du glo ƀănh mâu rlơ̆.

⁹ Phung bu năch hŏ rvăn jêh lĕ n'hâm suan păng Ƀiălah păng mâu gĭt ôh! Sŏk klơ bôk hŏ hon nglang jêh, Ƀiălah păng mâu gĭt!

¹⁰ Nau sưr Israel plơ̆ mbơh ma păng; Nđâp tơlah pônây, khân păng ăt mâu plơ̆ sĭt ôh ndrel ma Yêhôva Brah Ndu khân păng, Jêh ri mâu tĭng joi Păng tâm ban lĕ!

Tâm rnglăp dơm dam đah lĕ bri dak

¹¹ Êphraim jêng nâm bu plŭk Rluk, mâu geh nau blau mĭn; Khân păng vơh vơl ma n'gor bri Êjipt, jêh nây hăn tât ma bri Asiri.

¹² Dôl khân păng dâk hăn, Gâp mra nthăng nhuăl ta klơ khân păng; Gâp mra ƀư ma khân păng jŭr tŭp nâm bu sĭm klơ trôk; Gâp mra tâm rmal khân păng Kơt nâm bu nau phung khân păng hŏ tăng.

¹³ Rêh ni ngăn ma khân păng, Yorlah khân păng chalơi Gâp! Khân păng khư bu ƀư rai, Yorlah tâm rdâng jêh đah Gâp! Gâp yơh, Gâp ŭch tâm rklaih khân păng, Ƀiălah khân păng sŏk nau mƀruh tâm rđâng đah Gâp.

¹⁴ Khân păng mâu lĕ nuih n'hâm kuăl mbơh sơm ma Gâp, Ƀiălah gŭ nter klơ sưng bê̆ch khân păng; Khân păng rek tor êng khân păng nơm gay dăn ba ƀlê jêh ri ndrănh mhe; Khân păng ƀư rlăng ma Gâp.

¹⁵ Nđâp tơlah Gâp hŏ nti jêh ri ƀư ktang nting tur ti khân păng, Khân păng ăt mĭn ma nau mhĭk tâm rdâng đah Gâp.

¹⁶ Khân păng mâu rle mpeh ma Nơm Dŭt Prêh Klơ; Khân păng nâm bu na lĕ djơh jêh, Phung kôranh khân păng cha lôt yor ma đao Yorlah mpiăt khân păng luh nau ngơi ji nuih ngăn. Khân păng jêng ndơ bu gơm mưch Tâm n'gor bri Êjipt.