Ndrom Samƀŭt bơh Ôsê 6 - Nau Brah Ndu Ngơi 2023

Nau kuăl phung ƀon lan Israel rmal nau tih ma lĕ nuih n'hâm

¹ “Văch hom, ăn he plơ̆ sĭt ma Brah Yêhôva Yorlah Păng hŏ sa hêk jêh he, ƀiălah Păng mra ƀư bah; Păng hŏ dong sôt he, ƀiălah mra put sôt.

² Bar nar pakơi Păng mra ăn he kah rngăl tay; Nar rơh pe Păng mra rdâk ăn he dâk, Gay he rêh tanăp măt Păng.

³ Ăn he gĭt năl Brah Yêhôva; Nsrôih hom nau gĭt năl Păng. Nau Păng plơ̆ văch jêng nanê̆ ngăn Nâm bu ƀli luh nar ơm ôi; Păng văch tât ma he nâm bu dak mih, Nâm bu dak mih yan vai tŏ neh.”

Israel jêh ri Yuđa mâu rmal nau tih

⁴ Mâm Gâp mra ƀư ma may, hơi Êphraim? Mâm Gâp mra ƀư ma may, hơi Yuđa? Nau rŏng khân may ăn Ma Gâp tâm ban ma ndâr ntŭk nkân ang ôi, Nâm bu dak ngom gơnh sơh.

⁵ Yor ri, Gâp dŏng jêh phung nơm mbơh lor koh lơi khân păng; Gâp hŏ nkhĭt khân păng ma nau ngơi tă bơh trôm mbung Gâp, Nau Gâp phat dôih luh hăn nâm bu nau ang.

⁶ Yorlah Gâp ŭch nuih n'hâm nau yô̆ mâu di ôh mpa ƀư brah, Ŭch nau gĭt năl Brah Ndu lơn đah ndơ ƀư brah gŭch.

⁷ Ƀiălah nâm bu Y-Ađam, khân păng hŏ ƀư tih jêh đah nau tâm rnglăp; Ta nây, khân păng mâu gŭ răp jăp ôh đah Gâp.

⁸ Gilêat jêng du rplay ƀon phung ƀư nau mhĭk, Rplay ƀon bêng ma têl mham.

⁹ Nâm bu phung ntŭng gŭ moch du huê bunuyh hăn rgăn, Tâm ban lĕ phung kôranh ƀư brah nkhĭt bunuyh, Rŏ trong hăn tât ma ƀon Sichem, Khân păng ƀư âk hâu ngăn nau djơh mhĭk!

¹⁰ Tâm ngih Israel, Gâp hŏ saơ du ntil nau ƀơ̆ ngăn; Ta nây, Êphraim ƀư nau ka n'hong, Israel jêng ƀơ̆ ƀơch!

¹¹ Hơi Yuđa, may tâm ban lĕ, Du yan rek hŏ nal jêh ăn may, Tơlah Gâp leo phung ƀon lan Gâp plơ̆ sĭt tă bơh ntŭk jêng bu nă.