Ndrom Samƀŭt bơh Ôsê 5 - Nau Brah Ndu Ngơi 2023

Nau tâm rmal prăp ma phung Israel

¹ “Hơi phung kôranh ƀư brah, iăt hom nau aơ; Hơi ngih Israel, rkêng tôr iăt hom; Hơi ngih hađăch, iăt hom! Nau tâm rmal prăp ma khân may Yorlah khân may hŏ jêng dăk bu sân ta ƀon Mispa Jêh ri nhuăl bu drăng ta yôk Tabor.

² Phung tâm rdâng hŏ ngâm jru tâm nau tâm nkhĭt; Ƀiălah Gâp mra tâm rmal lĕ rngôch khân păng.

³ Gâp gĭt ngăn Êphraim, Jêh ri Israel mâu dơi ndâp ôh đah Gâp; Hơi Êphraim, may hŏ jêng bu ur ka n'hong! Bi Israel lĕ ƀơ̆ ƀơch jêh!

⁴ Nau kan khân păng ƀư king lơi khân păng Plơ̆ sĭt ma Brah Ndu khân păng. Yorlah nuih n'hâm ka n'hong lăp chiă uănh khân păng Yor ri khân păng mâu gĭt năl ôh Brah Yêhôva.

⁵ Nau sưr phung Israel phong păng; Israel jêh ri Êphraim chôt prah tâm nau tih mhĭk khân păng; Yuđa mra chôt prah ndrel ma khân păng.

⁶ Khân păng mra hăn ndrel ma phung biăp phung ndrôk khân păng Gay tĭng joi Brah Yêhôva, Ƀiălah khân păng mâu dơi mâp Păng ôh! Păng hŏ chalơi jêh khân păng.

⁷ Khân păng hŏ mƀruh ndơm Brah Yêhôva Yorlah khân păng hŏ deh phung kon êng. Aƀaơ, nar khay mhe mra rvăn khân păng Ndrel ma drăp ndơn khân păng.

⁸ Uh hom rlet ta Gibêa, Uh nŭng ta Rama! Ăn khân may dat kuăl ăn bu njrăng ta Bet-Aven! Hơi Benjamin, phung rlăng gŭ pakơi may!

⁹ Êphraim mra jêng rngot njăp Tâm nar nau tâm rmal; Ta nklang ndŭl mpôl Israel Gâp mbơh du ntil nau jêng n'hêl nanê̆ ngăn mra geh tât.

¹⁰ Phung kôranh Yuđa Nâm bu phung tĭt n'har bri; Gâp mra nkhŭt nau ji nuih ta khân păng Nâm bu nkhŭt dak.

¹¹ Êphraim bu tŭn jot, Rchiăt hăch jêh bơh nau phat dôih; Yorlah păng hŏ tâm nal nchuăt tĭng nau ƀơ̆.

¹² Yor nây, Gâp jêng nâm bu du mlâm nchiăr ƀon Êphraim Jêh ri nâm bu nau ôm ƀư rai ma ngih Yuđa.

¹³ Tơlah Êphraim hŏ saơ jêh nau ji kuet păng, Jêh ri Yuđa hŏ saơ jêh nau sôt păng, Pôri Êphraim hăn tât ma bri Asiri, Prơh bu hăn tât ma nơm hađăch toyh ktang. Ƀiălah hađăch nây mâu dơi ƀư bah ôh Mâu lĕ dơi put săm ntŭk sôt ăn ma khân may.

¹⁴ Yorlah gâp mra jêng nâm bu du mlâm yau mŭr ma Êphraim, Nâm bu du mlâm yau mŭr kon ma ngih Yuđa. Gâp nơm yơh mra sa hêk jêh nây hăn du; Gâp mra djôt leo, jêh ri mâu geh ôh nơm dơi sâm rklaih.

¹⁵ Gâp mra hăn, mra plơ̆ sĭt ta ntŭk Gâp gŭ Kŏ tât khân păng gĭt năl nau tih khân păng nơm jêh ri tĭng joi muh măt Gâp. Tâm nau rêh ni, khân păng mra khŏm nsrôih ngăn tĭng joi Gâp.”