Ndrom Samƀŭt bơh Ôsê 4 - Nau Brah Ndu Ngơi 2023

Nau nti ma nau vĭ nhhơt phung ƀon lan Israel ( 4:1 – 14:9 ) Brah Ndu phat dôih phung Israel

¹ Hơi phung ƀon lan Israel, iăt hom nau Brah Yêhôva Yorlah Brah Yêhôva phat dôih phung ƀon lan gŭ tâm n'gor aơ: “Tâm n'gor aơ, mâu geh nau răp jăp, mâu geh nau ueh Ăt mâu geh nau gĭt Brah Ndu.

² Knŏng bêng ma nau rak rtăp, mâu răp jăp, nkhĭt bunuyh, Nau ntŭng jêh ri văng tĭr; Khân păng ƀư lĕ nau pling mham aơ tât ma nau pling mham êng.

³ Yor nây, bri dak mra klâng ndrê; Lĕ rngôch bunuyh huănh huơi da dê, Nđâp ma mpô mpa bri jêh ri sĭm klơ trôk tâm ban lĕ; Lĕ phung ka tâm dak mƀŭt ăt mâu hôm.

⁴ Nđâp tơlah pônây lơi ăn du huê tâm rlăch ôh, Lơi ăn geh bunuyh nduyh ôh! Yorlah phung ƀon lan may nâm bu phung tâm rlăch đah kôranh ƀư brah.

⁵ May mra chêh prah dôl nôk nar; Phung nơm mbơh lor mra chêh prah ndrel may dôl bri măng tâm ban lĕ, Jêh ri Gâp mra ƀư rai mê̆ may.

⁶ Phung ƀon lan Gâp hŏ rai yot yor mâu geh nau gĭt rbăng; Yorlah may hŏ dun jêh nau gĭt rbăng, Yor ri Gâp ăt mâu ăn may ƀư kôranh nơm ƀư brah ma Gâp đŏng ôh; Yorlah may hŏ chuêl jêh nau vay Brah Ndu may, Yor ri Gâp mra chuêl kon sau may tâm ban lĕ.

⁷ Khân păng lơ hâu bĭk rơ̆ Lơ hâu ƀư tih tâm rdâng đah Gâp âk lơn; Gâp mra tâm rgâl nau chrêk lơp khân păng jêng nau bêk prêng.

⁸ Khân păng rêh bơh nau tih phung ƀon lan Gâp; Kơnh rŏng dôl phung ƀon lan Gâp ƀư tih.

⁹ Rnôk nây mra tât, mâm phung ƀon lan jêng kôranh nơm ƀư brah kơt nây lĕ; Gâp mra tâm rmal khân păng yor trong khân păng hăn, Jêh ri har plơng tĭng nâm kan păng ƀư.

¹⁰ Khân păng mra sông sa ƀiălah mâu hơm ôh, Khân păng ƀư nau văng tĭr ƀiălah mâu bĭk rơ̆ lĕ; Yorlah khân păng lĕ chalơi jêh Brah Yêhôva, Hăn tĭng phung brah êng.

¹¹ Nau văng tĭr, ndrănh ơm jêh ri ndrănh mhe Ƀư ma khân păng roh lĕ nau gĭt rbăng.

Nau phung ƀon lan Israel mbah rup brah

¹² Phung ƀon lan Gâp ôp rup trah ma tơm si, Dăn mâng jra plơ̆ sĭt lah. Yorlah bên ka n'hong ƀư vĭ nhhơt ma khân păng, Khân păng rêh văng tĭr, gŭ ngai đah Brah Ndu.

¹³ Khân păng nhhơr ndơ ƀư brah ta klơ n'gơn yôk prêh, Su ndơ ƀâu kah ta klơ lĕ yôk, Tâm dâng tơm si guyh, tơm si pôplar, tơm n'ho, Yorlah gui n'hâm păng ueh ngăn. Yor nây kon bu ur khân may ƀư nau ka n'hong, Ƀăn khân may văng tĭr.

¹⁴ Gâp mâu mra tâm rmal kon bu ur khân may yor tih ka n'hong, Mâu lĕ tâm rmal ƀăn khân may yor tih văng tĭr; Yorlah phung bu klâu khân may nơm hăn gŭ ndrel ma phung ka n'hong, Nhhơr mpa ƀư brah ndrel ma bu ur ka n'hong; Du phung ndŭl mpôl bunuyh mâu gĭt rbăng mra geh rai yot.

¹⁵ Hơi phung Israel, nđâp lah khân may ƀư nau ka n'hong, Mâu lĕ ăn phung Yuđa ƀư tih ôh! Pôri lơi ta lăp ôh ta ƀon Gilgal! Lơi ta hao ma ƀon Bet-Aven! Lơi ta sơm ton tâm amoh ‘Brah Yêhôva gŭ rêh mro mrăng’.

¹⁶ Yorlah Israel dăng bôk Nâm bu ndrôk me druh dăng ko; Di lĕ aƀaơ Brah Yêhôva siăm khân păng Nâm bu biăp kon hăn nsong tâm ndrêch gơ̆ huy?

¹⁷ Êphraim tâm rnglăp đah rup brah, Lơi kđôi păng!

¹⁸ Khân păng nhêt sa nhŭl hơm, Jêh nây dah ma ƀư nau ka n'hong; Khân păng ŭch ngăn nau bêk prêng rlau lơn ma nau chrêk rmah.

¹⁹ Sial hŏ rdu lơi khân păng tâm nting năr păng Jêh ri khân păng mra bêk prêng yorlah lĕ ndơ ƀư brah khân păng.”