Ndrom Samƀŭt bơh Ôsê 13 - Nau Brah Ndu Ngơi 2023

Nau ji nuih Kôranh Brah ta klơ Israel

¹ Ăp tơ̆ Êphraim ngơi, bu râm nsâr; Păng n'hao dơi geh nau bu yơk tâm n'gor Israel. Ƀiălah yor tih jêh mbah brah Baal, Yor nây păng mra khĭt.

² Aƀaơ, khân păng ƀư tih lơ hâu âk lơn; Khân păng ƀư ma khân păng nơm âk ma lĕ rup brah tŏ chiăr, Sŏk ma blau mĭn khân păng nơm tŏ chiăr lĕ rup brah ma prăk; Lĕ rngôch jêng nau kan bơh bunuyh blau rhăk! Bu lah ma phung nhhơr ndơ ƀư brah pô aơ: “Kon bunuyh chŭm nkhơng ndrôk kon!”

³ Yor nây, khân păng mra jêng nâm bu ndâr tŭk ơm ôi, Nâm bu dak ngom ang ôi gơnh sơh, Nâm bu njŏk nja sial đô̆ bơh ta nkual mprah ba, Nâm bu nhhŭk ŭnh luh tă bơh mpông bloh!

⁴ Gâp yơh jêng Yêhôva Brah Ndu may Nơm njŭn leo may du luh tă bơh n'gor bri Êjipt; Padih Gâp, may lơi sŏk dơn brah êng ôh, Mâu geh ôh Nơm Tâm Rklaih êng, knŏng êng Gâp!

⁵ Gâp yơh hŏ gĭt may nôk may hôm gŭ tâm bri rdah, Tâm n'gor bri kro đang.

⁶ Ƀiălah dôl khân păng dơi siăm tâm ndrêch gơ̆ Jêh ri dơi sa hơm ngăn pôri khân păng geh nuih n'hâm sưr rlau; Yor nây, khân păng chuêl jêh Gâp.

⁷ Pôri bi ma đah khân păng, Gâp mra nâm bu yau mŭr, Nâm bu yau brăch kâp moch rmiăt êp meng trong.

⁸ Gâp mra mpoh khân păng nâm bu kau me roh kon. Gâp mra sa hêk hăch ntang ntơh khân păng Jêh ri mra sa rvăn khân păng ta nây nâm bu yau mŭr; Mpô mpa bri mra hêk săk khân păng jêng hăch rhên.

⁹ Hơi Israel, bu mra ƀư rai yot may Yorlah may tâm rdâng ma Gâp, jêng Nơm kơl may.

¹⁰ Aƀaơ aơ ta ntŭk hađăch may? Gay ăn păng sâm rklaih may tâm lĕ rngôch ƀon toyh! Phung kôranh phat dôih jêng phung may kâp dơi geh pô aơ: “Ăn hom ma gâp du huê hađăch jêh ri phung kôranh!” Ta ntŭk khân păng?

¹¹ Tâm nau ji nuih, Gâp ăn jêh ma may du huê hađăch, Jêh ri tâm nau ji nuih, Gâp sŏk lơi.

¹² Nau djơh mhĭk Êphraim lĕ kât lơi jêh, Nau tih păng lĕ djôt prăp.

¹³ Nau bu ur ji deh mra tât ta klơ păng, Ƀiălah păng jêng du huê kon mâu blau mĭn ôh; Yorlah di mông bu deh jêh păng mâu ŭch luh ôh bơh ndŭl me.

¹⁴ Gâp mra tâm rklaih khân păng tă bơh nau dơi ƀon phung khĭt Jêh ri chuai khân păng tă bơh nau khĭt hĕ? Ơ nau khĭt, ta ntŭk nau mhĭk may? Ơ ƀon phung khĭt, ta ntŭk nau rai yot may? Nau yô̆ nđach bu pôn lơi jêh bơh trôm măt Gâp.

¹⁵ Nđâp tơlah Êphraim geh bĭk rơ̆ ta nklang oh nâu păng Pôri du chiông sial tă nhâp nar mra khôm tât, Nây jêng sial Brah Yêhôva khôm tă bơh bri rdah, Ƀư suăt lĕ tu dak jêh ri ƀư sơh lĕ n'hor dak. Chiông sial nây mra sŏk ntŭng jay bun drăp prăp ăp ndơ khlay.

¹⁶ Samari mra anh nau tih păng, Yorlah păng tâm rdâng jêh đah Brah Ndu păng! Khân păng mra cha lôt khĭt tâm dâng mpiăt đao, Phung kon se jê̆ khân păng bu mra jot nchah lơi, Jêh ri bu mra roch phung bu ur khân păng lĕ ntreo.