Ndrom Samƀŭt bơh Ôsê 12 - Nau Brah Ndu Ngơi 2023

Nau tih kon sau Y-Yakôb

¹ Êphraim sŏk nau ngơi mƀruh, Ngih Israel sŏk nau ndơm nchueng Gâp. Ƀiălah Yuđa ăt hăn ma Brah Ndu Jêh ri prăp nuih n'hâm răp jăp đah Nơm Kloh Ueh.

² Êphraim mât mray sial, Ăp nar nchuăt tĭng sail luh nar. Ntop âk nau mƀruh jêh ri nau djơh rai; Khân păng ƀư nau tâm rnglăp đah bri Asiri Jêh ri djôt dak ngi rlet ma n'gor bri Êjipt.

³ Brah Yêhôva nduyh lah ma Yuđa Jêh ri tâm rmal Yakôb tĭng nâm trong păng chuat hăn; Brah Yêhôva mra mplơ̆ ma păng tĭng nâm kan păng ƀư.

⁴ Tâm trôm ndŭl me Yakôb hŏ kuăn jêh ndơl jâng nâu păng, Nôk văch ma toyh păng tâm rdâng đah Brah Ndu.

⁵ Păng tâm nhăt đah tông mpăr jêh ri dơi, Păng nhhiăng nhĭm jêh ri vơh vơl dăn yô̆ an. Păng mâp jêh Yakôb ta ƀon Bêthel Jêh ri ta nây Păng nti lah he:

⁶ “Păng jêng Yêhôva Brah Ndu ma phung tahan; Amoh Păng jêng Brah Yêhôva.

⁷ Pôri may plơ̆ sĭt hom ma Brah Ndu may; Prăp nuih n'hâm ueh jêh ri nau sŏng, Jêh ri gŭ kâp gân mro mrăng ma Brah Ndu may.”

⁸ Jêng bunuyh tăch drăp, păng djôt tâm ti păng njing nau ndơm, Păng rŏng tŭn jot.

⁹ Êphraim lah jêh: “Nanê̆ ngăn, gâp hŏ ndrŏng jêh; Gâp hŏ geh âk drăp ndơ ăn ma gâp nơm. Tâm lĕ rngôch kan gâp ƀư Mâu dơi saơ ôh du ntil nau kan mhĭk gay kơp jêng nau tih.”

¹⁰ Gâp jêng Yêhôva Brah Ndu may Ntơm ƀơh may du tă bơh n'gor bri Êjipt, Gâp mra ăn may gŭ đŏng tâm dâng lĕ ngih bok Nâm bu tâm lĕ nar tâm Rƀŭn.

¹¹ Gâp tâm ban lĕ hŏ lah jêh ma phung nơm mbơh lor; Gâp yơh hŏ ăn âk tơ̆ lĕ nau tâm saơ. Dŏng phung nơm mbơh lor Ntĭm nti ma nau ngơi hôr.

¹² Gilêat bêng nau djơh mhĭk, N'hêl nanê̆ khân păng mra jêng dơm dam. Khân păng nhhơr ƀư brah ma ndrôk nkuăng tâm ƀon Gilgal, Lĕ nơng ƀư brah khân păng nâm bu bun lŭ Ta lĕ mbor chuar tâm mir.

¹³ Y-Yakôb du pôn rlet ma bri Aram; Israel ƀư dĭk gay geh ur, Yorlah gay geh ur mra hăn chiăp biăp.

¹⁴ Brah Yêhôva dŏng du huê phung nơm mbơh lor djôt leo Israel luh tă bơh n'gor bri Êjipt Jêh ri tâm ban lĕ dŏng phung nơm mbơh lor chiă uănh khân păng.

¹⁵ Êphraim hŏ nsônh nau ji nuih ji ngăn Yor nây mham păng mra nkhŭt tay ta klơ păng, Jêh ri Kôranh Brah mra mplơ̆ nau bêk prêng păng.