Ndrom Samƀŭt bơh Ôsê 11 - Nau Brah Ndu Ngơi 2023

Nau Brah Ndu yô̆ nđach ma phung Israel

¹ “Dôl Israel hôm kon se jê̆ Gâp hŏ rŏng jêh păng; Gâp ntơ kon bu klâu Gâp luh tă bơh n'gor bri Êjipt.

² Lơ hâu Gâp kuăl păng Păng lơ hâu du der ma Gâp. Khân păng hŏ nhhơr ndơ ƀư brah ma rup brah Baal Jêh ri su ndơ ƀâu kah ma rup brah.

³ Nđâp tơlah Gâp hŏ nti jêh Êphraim chuat hăn, Sŏk tur ti têk ndrêng păng. Ƀiălah khân păng mâu gĭt ôh Gâp hŏ ƀư bah ma khân păng.

⁴ Gâp hŏ sŏk rse nau ueh, Sŏk rse rvăk nau rŏng mphâk khân păng văch. Gâp jêng nâm bu nơm doh mâng mbăk bơh trôm mbung khân păng, Jêh ri kŭnh gay ăn khân păng sa.

⁵ Khân păng mâu mra plơ̆ sĭt ma n'gor bri Êjipt đŏng ôh, Ƀiălah phung Asiri mra ƀư hađăch ma khân păng, Yorlah khân păng mâu ŭch plơ̆ sĭt ma Gâp.

⁶ Đao gưm mra ƀư mhĭk ƀaƀơ tâm lĕ ƀon toyh khân păng, Ƀư rai lĕ mâng rnăng mpông jêh ri rvăn lĕ rngôch khân păng Yor lĕ nau khân păng mĭn ŭch ƀư.

⁷ Ngăn yơh phung ƀon lan Gâp ŭch chalơi Gâp; Nđâp tơlah khân păng kuăl ma Nơm Dŭt Prêh Păng ăt mâu rdâk khân păng dâk.

⁸ Hơi Êphraim, mâm Gâp dơi lơi may? Hơi Israel, mâm Gâp dơi jao may ma phung rlăng? Mâm Gâp dơi ƀư ma may jêng nâm bu ƀon Adma? Mâu lah nâm bu ma ƀon Sêbôim? Play nuih Gâp mpât n'gơ, Nau Gâp yô̆ nđach nâm bu gŭch nâm bu su.

⁹ Gâp mâu mra ƀư ôh tĭng nâm nau Gâp ji nuih Jêh ri mâu mra ƀư rai ôh Êphraim. Yorlah Gâp jêng Brah Ndu mâu di jêng bunuyh ôh; Gâp jêng Nơm Kloh Ueh gŭ ta nklang may, Gâp mâu mra văch ma may tâm nau ji nuih.

¹⁰ Khân păng mra chuat tĭng Brah Yêhôva, Păng ngrông nâm bu yau mŭr; Ngăn yơh, Păng mra ngrông, Phung kon păng văch tă bơh mpeh nhâp nar ma nau râm nsâr ngăn.

¹¹ Khân păng mra văch ma nau râm nsâr Nâm bu sĭm tă bơh n'gor Êjipt, Nâm bu plŭk tă bơh bri Asiri, Gâp mra ăn khân păng plơ̆ sĭt ma ngih khân păng nơm.” Brah Yêhôva lah pônây.