Ndrom Samƀŭt bơh Ôsê 10 - Nau Brah Ndu Ngơi 2023

Nau phat dôih prăp ma phung Israel

¹ Israel jêng du tơm krăk ƀâu ueh ngăn ngên, Geh kao play âk. Play păng lơ hâu âk, Păng lơ hâu đŏng ndâk nơng ƀư brah; Bri dak păng lơ hâu ndrŏng Păng lơ âk nkrơ̆ lĕ n'gâng ƀư brah ueh reh lơn.

² Nuih n'hâm khân păng pă bar; Aƀaơ khân păng mra geh nau tih jêh. Kôranh Brah mra ƀư rai lơi nơng ƀư brah, Jêh ri ƀư rai n'gâng ƀư brah khân păng.

³ Aƀaơ khân păng mra lah: “He mâu geh ôh hađăch Yorlah he mâu klach yơk ma Brah Yêhôva, Ƀiălah tơlah geh hađăch, moh ndơ hađăch nây dơi ƀư ma he?”

⁴ Khân păng ngơi lĕ nau hŏng dơm Jêh ri ton mƀruh tơlah ƀư nau tâm rnglăp; Yor ri lĕ nau tâm rlăch mra bĭk rơ̆ nâm bu gơ̆ mhĭk geh kăch Tâm lĕ mbor kai tâm lŏ.

⁵ Phung gŭ tâm n'gor Samari mra krit klach Ăn lĕ ndrôk kon, Bêt-Aven Phung ƀon lan mra nhĭm nhhiăng ma păng, Phung kôranh ƀư brah ŭch ngăn ma păng ăt nhĭm nhhiăng Yorlah nau chrêk rmah păng hŏ du roh jêh.

⁶ Tâm ban lĕ păng bu mra djôt leo ma bri Asiri Nhhơr ma hađăch toyh bri dak aơ. Rnôk nây, Êphraim mra bêk prêng, Israel mra bêk ma nau plĕch rlăm khân păng nơm.

⁷ Hađăch Samari mra rai yot Nâm bu mpŭnh ta klơ mpiăt dak.

⁸ Lĕ ntŭk prêh klơ ta Aven, nây jêng nau tih Israel, Bu mra ƀư rai lơi. Tơm pôm jêh ri pih pŭm mra hon Ta klơ nơng ƀư brah khân păng. Rnôk nây, khân păng mra lah ma lĕ yôk pô aơ: Ăn nkŭm lơi hên! Jêh ri lah ma lĕ gôl pô aơ: Tŭp hom ta klơ hên!

⁹ Hơi Israel, ntơm bơh nar Gibêa, may hŏ ƀư tih jêh! Khân păng dâk ta nây da dê; Mâu hĕ nau tâm lơh dơi ban Phung kon nau djơh mhĭk tâm Gibêa?

¹⁰ Gâp hŏ tâm nal phat dôih ma khân păng Phung ƀon lan mra tâm rgum gay tâm rdâng đah khân păng Tơlah bu tâm rmal jêh khân păng yor bar nau tih khân păng hŏ ƀư.

¹¹ Êphraim jêng nâm bu ndrôk me druh lĕ đăp jêh Ŭch rŏng jot ba, Ƀiălah Gâp hŏ prăp trô ko lay ueh păng. Gâp mra dơm mâng mbăk klơ Êphraim; Yuđa mra chuar Jêh ri Yakôb mra ƀư hăch neh.

¹² Srih hom ma khân may nơm nau sŏng srăng, Jêh ri rek nau ueh; Chuar hom neh mhe! Yorlah aơ jêng mông tĭng joi Brah Yêhôva Kŏ tât nar Păng văch Nkhŭt dak mih nau sŏng srăng ta klơ khân may.

¹³ Khân may hŏ chuar jêh djơh mhĭk, Rek nau mâu di, Sa play ma nau mƀruh. Yorlah may rnơm jêh ma trong khân may nơm, Jêh ri tahan may âk ngăn,

¹⁴ Yor ri, nau drơu drơu mra luh tâm phung ƀon lan may: Jêh ri bu mra ƀư rai lĕ rngôch pôih may Nâm bu Y-Salman ƀư rai ƀon Bet-Arbel nôk nar tâm lơh, Nar bu jot nkrâm phung me ndrel ma phung kon khân păng.

¹⁵ Hơi phung Bêthel, Nây jêng nau bu mra ƀư ma khân may, Yorlah nau djơh mhĭk khân may toyh ngăn. Kêng ơm ôi, Hađăch Israel bu mra nkhĭt lơi.