Ndrom Samƀŭt bơh Agê 2 - Nau Brah Ndu Ngơi 2023

Nau nti lah rơh bar: Nau chrêk ma lơp ngih brah mhe

¹ Tâm nar bar jât ma nguay khay pơh, Geh nau Brah Yêhôva lah ma nơm mbơh lor Y-Agê pô aơ:

² “Ôp hom ma kôranh chiă uănh n'gor Yuđa jêng Y-Sôrôƀaƀel, kon bu klâu Y-Sêaltiêl, jêh ri Y-Yôsuê kôranh ƀư brah toyh lơn, kon bu klâu Y-Jêhôsadak, nđâp ma lĕ rngôch phung ƀon lan hôm e klen, pô aơ:

³ ‘Mbu tâm khân may jêng bunuyh hôm e hŏ tă saơ nau chrêk rmah ngih brah aơ ntơm saơm? Jêh ri aƀaơ, mâm khân may saơ păng? Mâu di bơh jêng tâm dâng măt khân may, păng mâu hôm đŏng geh du ntil ndơ?’

⁴ Pôri aƀaơ, Brah Yêhôva lah: ‘Hơi Y-Sôrôƀaƀel, janh nănh hom! Bi ma may, Y-Yôsuê kôranh ƀư brah toyh lơn, kon bu klâu Y-Jêhôsadak, janh nănh hom tâm ban lĕ! Hơi lĕ rngôch phung ƀon lan gŭ tâm n'gor, nănh hom!’ Brah Yêhôva lah đŏng: ‘Pah kan hom, yorlah Gâp gŭ ndrel ma khân may,’ Brah Yêhôva ma phung tahan lah pônây.

⁵ ‘Tĭng nau Gâp hŏ ton jêh tâm nau tâm rnglăp njêng đah khân may dôl khân may du luh tă bơh n'gor bri Êjipt, jêh ri Brah Huêng ueh Gâp hôm gŭ ta nklang khân may, yor nây lơi khân may klach ôh.’

⁶ Yorlah Brah Yêhôva ma phung tahan lah kơt aơ: ‘Hôm ƀât lât đŏng, Gâp mra ƀư n'gơ n'găr lĕ ndâr trôk jêh ri neh ntu, dak mƀŭt jêh ri neh sơh.

⁷ Gâp n'gơ n'găr lĕ rngôch bri dak tâm ban lĕ, jêh ri drăp ndơ lĕ rngôch bri dak mra văch tât ta aơ; jêh nây Gâp mra ƀư ăn ma ngih brah aơ bêng ma nau chrêk ma lơp.’ Brah Yêhôva ma phung tahan lah pônây.

⁸ ‘Prăk jêng ndơ Gâp, mah jêng ndơ Gâp.’ Brah Yêhôva ma phung tahan lah pônây.

⁹ Brah Yêhôva ma phung tahan lah: ‘Nau chrêk ma lơp ngih brah pakơi aơ taơ mra toyh lơn ma nau chrêk ma lơp ngih ntơm saơm. Gâp mra ăn nau đăp mpăn tâm ntŭk aơ.’ Brah Yêhôva ma phung tahan lah pônây.”

Nau nti lah rơh pe: Ngih brah mhe djôt nau ueh uĭn

¹⁰ Tâm nar bar jât ma puăn khay sĭn, năm rơh bar hađăch Darius chiă uănh, geh nau Brah Yêhôva lah ma nơm mbơh lor Y-Agê:

¹¹ “Brah Yêhôva ma phung tahan lah: ‘Ôp hom ma phung kôranh ƀư brah ma nau vay pô aơ:

¹² Tơlah geh bunuyh nklâm puăch kloh ueh tâm dŭng ao, jêh ri dŭng ao krêp piăng let mâu lah ndơ gâm sĭn, mâu lah ndrănh, mâu lah dak ngi mâu lah moh ndơ sông sa ƀaƀă, pôri ndơ nây dơi jêng kloh ueh lĕ?’” Phung kôranh ƀư brah plơ̆ lah da dê: “Mâu.”

¹³ Y-Agê lah ôp đŏng: “Tơlah du huê lĕ ƀơ̆ ƀơch yor pah ta săk jăn khĭt, jêh nây pah tât lĕ ndơ nây pôri lĕ ndơ nây geh tưp nau ƀơ̆ ƀơch lĕ?” Phung kôranh ƀư brah plơ̆ lah: “Lĕ ndơ nây mra ƀơ̆ ro.”

¹⁴ Y-Agê lah: “Brah Yêhôva lah: ‘Panăp măt Gâp, phung ƀon lan aơ, bri dak aơ tâm ban pônây lĕ, lĕ rngôch kan ti khân păng ƀư tâm ban lĕ; moh ndơ khân păng nhhơr ta aơ jêng ƀơ̆ da dê.’

¹⁵ Pôri aƀaơ, mĭn rvê hom, ntơm bơh nar aơ let panăp, lah ê hŏ bu dơm lŭ aơ ta klơ lŭ ri gay ma ndâk ngih Brah Yêhôva

¹⁶ pôri mâm ƀư tâm rnôk nây? Lah bu tât ndrel ta du mbŭch ba tâm di bar jât ndơ nhueh, geh knŏng jât dơm; jêh ri lah bu văch ndrel tât ta drŏng păt ndrănh tâm di prăm jât ndơ nhueh geh knŏng bar jât.

¹⁷ Brah Yêhôva lah: ‘Gâp hŏ dŏng jêh prăng phang, ek găm, mih tŭp pler tâm rmal khân may tâm lĕ rngôch kan ti khân may ƀư, ƀiălah khân may mâu geh ôh bunuyh plơ̆ sĭt tay ma Gâp.

¹⁸ Aƀaơ aơ, mĭn rvê hom, ntơm bơh nar aơ let panăp, nây jêng ntơm bơh nar bar jât ma puăn khay sĭn, nar ƀư mbon ngih Brah Yêhôva, mĭn rvê hom ma nau nây!

¹⁹ Khân may hôm e đŏng ntil găr tâm jay prăp? Kŏ tât aƀaơ aơ, tơm krăk ƀâu, tơm rvi, tơm pom gra nat, tơm ôlive, tâm ban lĕ mâu geh ôh luh play. Ƀiălah ntơm bơh nar aơ, Gâp mra ăn nau ueh uĭn ma khân may.’ ”

Nau ti lah rơh puăn: Nau ton ma nau ueh uĭn

²⁰ Tâm nar bar jât ma puăn khay nây, geh nau Brah Yêhôva lah rơh bar ma Y-Agê pô aơ:

²¹ “Ngơi hom ma kôranh chiă uănh n'gor Yuđa, jêng Y-Sôrôƀaƀel pô aơ: ‘Gâp mra ƀư n'găr trôk jêh ri neh ntu,

²² Gâp mra nklơ̆ lơi sưng hađăch phung kôranh hađăch, ƀư roh lơi nau dơi lĕ rngôch ƀon bri hađăch neh ntu. Gâp mra nklơ̆ lơi ndeh seh nđâp phung ƀĭt gai; phung seh tâm lơh jêh ri phung tahan ncho seh mra cha lôt khĭt yor đao bơh oh nâu khân păng nơm.’”

²³ Brah Yêhôva ma phung tahan lah: “Hơi Y-Sôrôƀaƀel, kon bu klâu Y-Sêaltiêl, tâm nar nây, Gâp mra săch may ƀư oh mon Gâp!” Brah Yêhôva lah: “Gâp mra dơm may nâm bu ndơ tâp pŏng, yorlah Gâp hŏ săch jêh may.” Brah Yêhôva ma phung tahan lah pônây.