Nau Tâm Mpơl 8 - Nau Brah Ndu Ngơi 2023

Nau tâp pŏng rơh pơh

¹ Tơlah Kon Biăp pơk tâp pŏng rơh pơh, ta klơ trôk gŭ rklăk tâm n'gul mông.

² Gâp saơ pơh nuyh tông mpăr dâk tanăp Brah Ndu, jêh ri bu ăn ma khân păng pơh mlâm nŭng.

³ Geh du huê tông mpăr êng djôt khăl mah ndơ ƀâu kah văch dăch nơng ƀư brah. Bu ăn ma păng âk ndơ ƀâu kah gay ma păng nhhơr ndrel ma lĕ nau mbơh sơm bơh lĕ rngôch phung kloh ueh ta nơng ƀư brah mah gŭ panăp sưng hađăch.

⁴ Nhhŭk ŭnh ndơ ƀâu kah tă bơh ti tông mpăr ndrel ma lĕ nau mbơh sơm phung kloh ueh hao tanăp Brah Ndu.

⁵ Jêh nây tông mpăr sŏk khăl ndơ ƀâu kah, sŏk bêng ma ŭnh bơh nơng ƀư brah jêh ri klŭp păng ta neh ntu, geh lĕ nteh nglaih, nau ngơi, lĕ lơp nglaih jêh ri nau n'găr neh.

Pơh mlâm nŭng

⁶ Jêh nau nây, pơh nuyh tông mpăr djôt pơh mlâm nŭng ndrăp uh.

⁷ Tông mpăr tal nguay uh nŭng, geh mih pler jêh ri ŭnh tâm pot đah mham nkhŭt tâm neh ntu. Du kô̆ tâm pe neh ntu ŭnh sa, du kô̆ tâm pe tơm si ŭnh sa, jêh ri lĕ rngôch gơ̆ nđĭr ŭnh sa lĕ.

⁸ Tông mpăr rơh bar uh nŭng, geh ndơ nâm bu du mlâm yôk toyh ŭnh sa hâng, bu klŭp tâm dak mƀŭt. Du kô̆ tâm pe dak mƀŭt jêng mham,

⁹ du kô̆ tâm pe mpa rêh tâm dak mƀŭt khĭt, jêh ri du kô̆ tâm pe kumpăn plŭng hŏ rai jêh.

¹⁰ Tông mpăr rơh pe uh nŭng, du mănh mbing toyh su hit tâm ban ma ŭnh rdo tŭp tă bơh trôk. Mănh mbing nây tŭp ta du kô̆ tâm pe lĕ dak krong jêh ri lĕ tu dak.

¹¹ Amoh mănh nĕ jêng Gŭn Tăng. Du kô̆ tâm pe phung dak jêng gŭn tăng; âk bunuyh khĭt jêh yor dak tăng aơ, yorlah păng plơ̆ jêng tăng jêh.

¹² Tông mpăr rơh puăn uh nŭng, du kô̆ tâm pe nar, du kô̆ tâm pe khay jêh ri du kô̆ tâm pe phung mănh mbing tâm tom ndrăng nơm kŏ tât du kô̆ tâm pe phung nĕ jêng ngo, ƀư ăn du kô̆ tâm pe nôk nar mâu geh nau ang, jêh ri nôk măng tâm ban lĕ.

¹³ Jêh ri gâp uănh, jêh ri tăng du mlâm klang ƀŭng dôl mpăr ta nklang trôk, nter huy: “Rêh ni ngăn! Rêh ni ngăn! Rêh ni ngăn ma lĕ phung ƀon lan gŭ tâm neh ntu nôk bâr nŭng pe nuyh tông mpăr êng bơi uh!”