Nau Tâm Mpơl 5 - Nau Brah Ndu Ngơi 2023

Ndrom samƀŭt geh pơh ndơ tâp pŏng jêh ri Kon Biăp

¹ Jêh ri gâp saơ tâm ti ma Nơm gŭ ta sưng hađăch du pŏk ndrom samƀŭt bu nchih jêh tâm trôm jêh ri padih, geh pơh ndơ tâp pŏng.

² Gâp saơ đŏng du huê tông mpăr bêng nau dơi nter huy mbơh: “Mbu nơm jêng bunuyh khư pơk ndrom samƀŭt jêh ri doh lơi ndơ tâp pŏng?”

³ Mâu geh du huê nuyh ta klơ trôk, ta neh ntu mâu lah tâm dâng neh ntu klăp lah dơi pơk mâu lah uănh ndrom samƀŭt.

⁴ Gâp nhĭm rngot, yorlah mâu geh du huê nuyh khư pơk mâu lah uănh ndrom samƀŭt.

⁵ Ƀiălah du huê tâm phung kôranh bu ranh lah ma gâp: “Lơi ta nhĭm, ri, Yau mŭr tă bơh ndŭl mpôl Yuđa, phung kon sau Y-Đavit, dơi jêh rĭ dĭng dơi pơk ndrom samƀŭt jêh ri doh lơi ndơ pơh tâp pŏng.”

⁶ Gâp saơ du mlâm Kon Biăp tâm ban ma bu nkhĭt jêh, dôl dâk ta nklang sưng hađăch, gŭ jŭm geh puăn mlâm mpa rêh jêh ri phung kôranh bu ranh. Kon Biăp geh pơh mlâm nke jêh ri pơh mlâm măt, jêng pơh huêng Brah Ndu njuăl hăn jêh lam neh ntu.

⁷ Kon Biăp hăn tât, sŏk ndrom samƀŭt bơh ti ma Nơm gŭ ta sưng hađăch.

⁸ Tơlah Kon Biăp sŏk ndrom samƀŭt, puăn mlâm mpa rêh jêh ri bar jât ma puăn kôranh bu ranh, chon mon tanăp Kon Biăp; ăp nơm djôt du mlâm gong rêng jêh ri lĕ ngan mah dơ bêng ndơ ƀâu kah, jêng nau mbơh sơm phung kloh ueh.

⁹ Khân păng mprơ du nau mprơ mhe pô aơ: “May khư sŏk ndrom samƀŭt Jêh ri pơk lĕ ndơ tâp pŏng, yorlah bu nkhĭt jêh May, May sŏk mham May nơm tâm chuai ma Brah Ndu Phung bunuyh bơh lĕ ndŭl mpôl, lĕ nau ngơi, lĕ rngôch mpôl băl, lĕ bri dak,

¹⁰ Jêh ri ƀư ma khân păng plơ̆ jêng ƀon bri hađăch jêh ri kôranh ƀư brah ma Brah Ndu he, Jêh ri khân păng mra chiă uănh ta neh ntu.”

¹¹ Gâp uănh, jêh ri tăng bâr âk phung tông mpăr jŭm sưng hađăch, phung mpa rêh jêh ri phung kôranh bu ranh. Geh âk rbăn, rmưn rsen tông mpăr

¹² mprơ huy pô aơ: “Kon Biăp bu nkhĭt jêh Khư sŏk dơn nau dơi, nau ndrŏng, nau blau mĭn, Nau ktang, nau yơk, nau chrêk rmah jêh ri nau tâm rnê!”

¹³ Gâp tăng lĕ rngôch mpa rhăk jêh ta klơ trôk, ta neh ntu, tâm dâng neh ntu, tâm dak mƀŭt, jêh ri lĕ rngôch ndơ tâm ntŭk nĕ lah pô aơ: “Ma Nơm gŭ ta sưng hađăch jêh ri ma Kon Biăp Geh nau tâm rnê, nau yơk, nau chrêk rmah jêh ri nau dơi ma tât n'ho ro!”

¹⁴ Puăn mlâm mpa rêh lah: “Amen!” Jêh ri phung kôranh bu ranh chon mon jêh ri yơk mbah.