Nau Tâm Mpơl 4 - Nau Brah Ndu Ngơi 2023

Lĕ nau tâm mpơl ma Y-Yôhan ( 4:1 – 22:5 ) Nau yơk mbah ta lơ trôk

¹ Jêh nau nây, gâp n'gơr uănh, ri, geh du mlâm mpông pơk ta klơ trôk! Bâr tal nguay gâp hŏ tăng, nâm bu bâr nŭng ngơi ma gâp pô aơ: “Hăn hao hom ta aơ, Gâp mra ntĭm ăn may moh nau mra tât kăndơ̆.”

² Ƀât lât, Brah Huêng Ueh ntrŭt ntrôl gâp; ri, geh du mlâm sưng hađăch gŭ ta klơ trôk; klơ sưng hađăch geh du huê Nơm gŭ ta nĕ!

³ Nơm gŭ ta klơ sưng hađăch uănh nâm bu lŭ khlay jaspidi jêh ri karnêlian; jŭm sưng hađăch nây geh bêh tŭng tĭng nâm bu lŭ khlay êmêrôt.

⁴ Jŭm sưng hađăch nây gâp saơ bar jât ma puăn mlâm sưng hađăch êng, klơ sưng hađăch nây geh bar jât ma puăn kôranh bu ranh gŭ, nsoh ao nglang, bôk ndô đon hađăch ma mah.

⁵ Tă bơh sưng hađăch nây luh lơp nglaih, bâr ngơi jêh ri nglaih; geh pơh ŭnh kađen hit ang tanăp sưng hađăch, nây jêng pơh huêng Brah Ndu.

⁶ Tra năp sưng hađăch geh nâm bu dak mƀŭt măt rchŏk rsang nâm bu lŭ ang; ta nklang sưng hađăch jêh ri jŭm sưng hađăch geh puăn mlâm mpa rêh bêng ma măt panăp jêh ri pakơi.

⁷ Mpa rêh rơh nguay nâm bu yau mŭr, mpa rêh rơh bar nâm bu du mlâm ndrôk nkuăng, mpa rêh rơh pe geh muh măt nâm bu măt bunuyh, jêh ri mpa rêh rơh puăn nâm bu du mlâm klang ƀŭng dôl mpăr.

⁸ Puăn mpa rêh nây, ăp mpa geh prao nting năr, jŭm jêh ri tâm săk bêng măt da dê; măng nâm nar lah ƀaƀơ mâu rlu ôh: “Kloh ueh, kloh ueh, kloh ueh, Kôranh Brah jêng Brah Ndu Geh Lĕ Nau Brah, NƠM HŎ GEH JÊH, AɃAƠ AƠ JÊH RI DÔL VĂCH!”

⁹ Ăp tơ̆ phung mpa rêh nhhơr nau chrêk rmah, nau yơk jêh ri nau lah ueh ma Nơm gŭ ta sưng hađăch, jêng Nơm gŭ rêh n'ho ro,

¹⁰ pôri bar jât ma puăn kôranh bu ranh chon mon tanăp Nơm gŭ ta sưng hađăch jêh ri yơk mbơh ma Nơm gŭ rêh n'ho ro. Khân păng klŭp đon hađăch khân păng nơm tanăp sưng hađăch, jêh ri lah:

¹¹ “Ơ Brah Ndu jêng Kôranh Brah hên, Kôranh Brah khư sŏk dơn nau chrêk rmah, nau yơk jêh ri nau dơi, Yorlah Kôranh Brah rhăk njêng jêh lĕ rngôch ndơ, Jêh ri tĭng nâm Kôranh Brah ŭch lĕ rngôch ndơ jêng geh jêh ri May rhăk njêng jêh khân păng.”