Nau Tâm Mpơl 3 - Nau Brah Ndu Ngơi 2023

Samƀŭt njuăl ma Ngih Brah Ndu ta ƀon Sardis

¹ “Nchih hom ma phung tông mpăr ma Phung Ngih Brah Ndu ta ƀon Sardis pô aơ: Aơ jêng nau ngơi Nơm geh pơh huêng Brah Ndu, jêh ri pơh mănh mbing: ‘Gâp gĭt lĕ kan may; may geh nau lư rêh ƀiălah may jêng khĭt.

² Pôri, rngeh njrăng hom jêh ri ƀư nâp lĕ rngôch ndơ hôm e, nâm bu ntĭt lĕ rngôch ndơ bơi ma khĭt, yorlah Gâp mâu saơ ôh lĕ nau kan may jêng nŭm rĭng tanăp Brah Ndu Gâp.

³ Kah gĭt tay hom moh nau may dơn jêh ri tăng; djôt prăp hom jêh ri rmal hom nau tih. Tơlah may mâu rngeh njrăng Gâp mra văch nâm bu du huê nơm ntŭng; jêh ri may mâu mra gĭt ôh moh mông Gâp văch ƀât lât ta may.

⁴ Ƀiălah ta ƀon Sardis, may hôm geh bunuyh ƀaƀă ê hŏ ƀư ƀơ̆ ôh kho ao khân păng nơm; khân păng nsoh ao nglang jêh ri hăn ndrel ma Gâp, yorlah khân păng geh nau khư.

⁵ Mbu mra dơi, mra soh ao nglang tâm ban pônây; Gâp mâu mra jut lơi amoh bunuyh nây bơh ndrom samƀŭt nau rêh, jêh ri mra mbơh amoh bunuyh nây tanăp Mbơ̆ Gâp jêh ri tanăp phung tông mpăr Păng.

⁶ Mbu nơm geh tôr, iăt hom nau Brah Huêng Ueh lah ma Phung Ngih Brah Ndu.’ ”

Samƀŭt njuăl ma Ngih Brah Ndu ta ƀon Philađelphi

⁷ “Nchih hom ma phung tông mpăr Phung Ngih Brah Ndu ta ƀon Philađelphi: Aơ jêng nau ngơi tă bơh Nơm Kloh Ueh jêh ri Nanê̆ Ngăn, jêng Nơm geh keh khuă Y-Đavit, jêng Nơm pơk mâu hôm geh bunuyh dơi nchăng, Nơm nchăng mâu hôm geh bunuyh dơi pơk:

⁸ ‘Gâp gĭt lĕ nau kan may. Aơ, Gâp hŏ pơk jêh du mlâm mpông tanăp măt may mâu geh nơm dơi nchăng ôh, yorlah may geh djê̆ nau ktang ƀiălah may ăt djôt prăp jêh nau Gâp ngơi jêh ri mâu dun ôh ma amoh Gâp.

⁹ Aơ, Gâp ăn ma may phung ƀaƀă jêng phung ngih rƀŭn Satan, phung kơp êng săk khân păng nơm jêng phung Yuđa, ƀiălah nanê̆ mâu di, yorlah khân păng ngơi mƀruh. Aơ, Gâp mra ƀư ăn khân păng văch chon mon ta jâng may, jêh ri khân păng mra gĭt Gâp rŏng ma may jêh.

¹⁰ Yorlah may djôt prăp jêh nau Gâp ntĭm nti ma nau srôih, Gâp ăt mra djôt prăp may bơh mông rlong uănh, jêng mông dăch tât tâm lam neh ntu, gay rlong uănh phung bunuyh gŭ tâm neh ntu.

¹¹ Gâp văch gơnh; djôt nâp hom lĕ nau may geh jêh klach lah bu êng sŏk lơi đon hađăch may.

¹² Mbu nơm mra dơi, Gâp mra ăn ƀư meh n'gâng tâm ngih brah Brah Ndu Gâp; jêh ri bunuyh nây mâu mra luh bơh nĕ. Gâp mra nchih ta klơ bunuyh nây: amoh Brah Ndu Gâp, amoh ƀon Brah Ndu Gâp — ƀon Yêrusalem mhe, gŭ ta klơ trôk, bơh Brah Ndu hăn jŭr — jêh ri amoh mhe Gâp.

¹³ Mbu nơm geh tôr, iăt hom nau Brah Huêng Ueh lah ma Phung Ngih Brah Ndu.’ ”

Samƀŭt njuăl ma Ngih Brah Ndu ta ƀon Laođisê

¹⁴ “Nchih hom ma tông mpăr Phung Ngih Brah Ndu ta ƀon Laođisê pô aơ: Aơ jêng nau ngơi Nơm Amen, Nơm mbơh nkoch răp jăp jêh ri nanê̆ ngăn, jêng tơm ma nau Brah Ndu rhăk njêng:

¹⁵ ‘Gâp gĭt lĕ nau kan may; may mâu nđik, mâu đŏng duh. Ŭch ngăn may jêng duh mâu lah nđik.

¹⁶ Pôri, yorlah may duh hôr hôr, mâu duh mâu đŏng nđik, pôri Gâp mra jrih may bơh trôm mbung Gâp.’

¹⁷ May lah: ‘Gâp ndrŏng, gâp geh âk drăp ndơ, gâp mâu pưt ndơ ôh.’ Ƀiălah may mâu gĭt ma may nơm geh nau rêh ni, yô̆ nđach ngăn, o ach, chieh măt jêh ri rhôk.

¹⁸ Yor nây, Gâp nkah may rvăt hom mah Gâp hŏ srŏng jêh ma ŭnh, gay ma may mra jêng ndrŏng; rvăt lĕ ao nglang jêh ri nsoh gay ma nau rhôk may mâu mpơl ôh, jêh ri rvăt dak si mhĭng măt may gay ma may dơi saơ.

¹⁹ Lĕ rngôch phung Gâp rŏng Gâp nduyh, nduyh nkra; pôri, duh nđơr hom jêh ri rmal hom nau tih!

²⁰ Aơ, Gâp gŭ padih mpông jêh ri goh; tơlah mbu nơm tăng bâr Gâp jêh ri pơk mpông, Gâp mra lăp gŭ ndrel ma bunuyh nây, sông sa ndrel ma păng jêh ri păng ndrel ma Gâp.

²¹ Mbu nơm dơi, Gâp mra ăn păng gŭ ndrel ma Gâp ta sưng hađăch Gâp, nâm bu Gâp nơm hŏ dơi jêh, jêh ri gŭ ndrel ma Mbơ̆ Gâp ta sưng hađăch Păng.

²² Mbu nơm geh tôr, iăt hom nau Brah Huêng Ueh lah ma Phung Ngih Brah Ndu.”