Nau Tâm Mpơl 22 - Nau Brah Ndu Ngơi 2023

Ueh maak ma nơm dơi săch

¹ Nôk nây tông mpăr ntĭm ma gâp saơ dak krong nau rêh, rsang nâm bu lŭ ang, luh bơh sưng hađăch Brah Ndu jêh ri sưng hađăch Kon Biăp,

² hoch ta nklang trong ƀon nây. Bar đah kơh dak krong geh tơm si nau rêh geh play jât ma bar yan, ăp khay geh play du tơ̆; jêh ri n'ha si nây prăp ma ƀư bah phung mpôl băl bunuyh.

³ Mâu mra hôm geh nau rak rtăp. Sưng hađăch Brah Ndu jêh ri Kon Biăp mra gŭ tâm ƀon nây, jêh ri phung oh mon Păng mra pah kan ma Păng.

⁴ Khân păng mra saơ muh măt Păng, jêh ri amoh Păng mra gŭ ta ndăr kleng khân păng.

⁵ Măng mâu mra hôm ôh jêh ri bu mâu hôm ŭch nau ang tă bơh ŭnh kađen mâu lah ma nar ôh, yorlah Kôranh Brah jêng Brah Ndu mra sol ang khân păng. Jêh ri khân păng mra chiă uănh ƀaƀơ n'ho ro.

Nglĕ dŭt ( 22:6-21 ) Lĕ nau mbơh lor tâm samƀŭt aơ n'hêl nê̆ ngăn

⁶ Nôk nây tông mpăr lah ma gâp pô aơ: “Lĕ nau ngơi aơ jêng nau khư rnơm nsing jêh ri nanê̆ ngăn. Kôranh Brah jêng Brah Ndu ma huêng phung nơm mbơh lor njuăl jêh tông mpăr Păng văch tâm mpơl ma phung oh mon Păng lĕ nau bơi tât.

⁷ Ri, Gâp văch gơnh. Ueh maak yơh ma mbu nơm djôt prăp lĕ nau ngơi mbơh lor tâm ndrom samƀŭt aơ!”

⁸ Gâp jêng Y-Yôhan, nơm tăng jêh ri saơ jêh lĕ nau aơ. Tơlah gâp tăng jêh ri saơ lôch jêh, gâp chon mon ta jâng tông mpăr hŏ tâm mpơl lĕ nau aơ ma gâp, gay ŭch mbah ma păng.

⁹ Ƀiălah tông mpăr lah ma gâp: “Lơi ƀư nâm nđĕ! Gâp jêng nơm pah kan ndrel ma may, ndrel ma phung oh nâu may jêng phung nơm mbơh lor, jêh ri ndrel ma phung djôt prăp nau ngơi tâm ndrom samƀŭt aơ. Yơk mbah hom ma Brah Ndu.”

¹⁰ Jêh nây tông mpăr lah tay ma gâp: “Lơi ta tâp pŏng ôh lĕ nau ngơi mbơh lor tâm ndrom samƀŭt aơ, yorlah mông nar dăch jêh.

¹¹ Mbu nơm mâu sŏng, ăn păng ăt ƀư nau mâu sŏng srăng, mbu nơm ƀơ̆ ăt jêng ƀơ̆, mbu nơm sŏng srăng ăt ƀư nau sŏng srăng, bunuyh jêng kloh ueh ăt jêng kloh ueh!”

¹² “Aơ, Gâp văch gơnh, jêh ri djôt nau Gâp nkhôm ndrel ma Gâp, gay ăn ma ăp nơm tĭng nâm kan păng ƀư jêh.

¹³ Gâp jêng Alpha jêh ri Ômêga, jêng Lor Lơn jêh ri Nglĕ Dŭt, jêng Ntơm Bơh Saơm jêh ri Nglĕ Dŭt.”

¹⁴ Ueh maak yơh phung pih ao khân păng nơm gay geh nau dơi văch ta ntŭk tơm si nau rêh, jêh ri dơi lăp tâm ƀon ta lĕ mpông.

¹⁵ Phung so, phung ƀư nau blau rƀên, phung văng tĭr, phung nkhĭt bunuyh, phung mbah rup brah, jêh ri lĕ rngôch phung rŏng jêh ri ƀư nau mƀruh gŭ padih da dê.

¹⁶ “Gâp jêng Brah Yêsu, njuăl jêh tông mpăr Gâp văch gay mbơh nkoch lĕ nau aơ ma khân may tanăp lĕ Phung Ngih Brah Ndu. Gâp jêng Tơm Reh jêh ri Kon Sau Y-Đavit, jêng Mănh Mbing Ôi nchrat ral ngăn.”

¹⁷ Brah Huêng Ueh jêh ri Ƀăn lah ndrel: “Văch hom!” Mbu nơm tăng lah đŏng: “Văch hom!” Mbu nơm ji hir, văch hom! Mbu nơm ŭch, văch hom jêh ri sŏk dơn dak nau rêh ăn dơm dam.

¹⁸ Gâp mbơh ma lĕ rngôch phung tăng nau mbơh lor tâm ndrom samƀŭt aơ pô aơ: Tơlah du huê ntop moh nau tâm lĕ nau aơ, Brah Ndu mra ntop ma păng lĕ nau rêh ni nchih jêh tâm ndrom samƀŭt aơ.

¹⁹ Bi tơlah du huê n'hŭch du nau ngơi tâm lĕ nau tă bơh ndrom samƀŭt nau mbơh lor aơ, Brah Ndu mra sŏk lơi nau păng dơn ma tơm si nau rêh jêh ri ƀon kloh ueh nây tĭng nâm bu hŏ nchih jêh tâm ndrom samƀŭt aơ.

²⁰ Nơm mbơh nkoch ma nau aơ lah: “Di ngăn, Gâp văch gơnh.” Amen. Ơ Kôranh Brah jêng Brah Yêsu, dăn văch hom!

²¹ Dăn nau yô̆ bơh Kôranh Brah jêng Brah Yêsu gŭ ndrel ma lĕ rngôch phung bunuyh!