Nau Tâm Mpơl 21 - Nau Brah Ndu Ngơi 2023

Trôk mhe jêh ri neh ntu mhe. – Ƀon Yêrusalem mhe

¹ Nôk nây gâp saơ trôk mhe jêh ri neh ntu mhe; yorlah trôk tal nguay jêh ri neh ntu tal nguay rlau lôch jêh, jêh ri mâu hôm geh dak mƀŭt đŏng.

² Gâp saơ đŏng ƀon kloh ueh, jêng Yêrusalem mhe, jŭr tă bơh ntŭk Brah Ndu ta klơ trôk, ndrăp nkra jêh nâm bu du huê bu ur mhe nkrơ̆ gŭ kâp sai păng nơm.

³ Gâp tăng nteh bâr ktang tă bơh sưng hađăch lah nâm pô aơ: “Ri, ngih bok Brah Ndu gŭ ndrel ma kon bunuyh! Păng mra gŭ ndrel ma khân păng jêh ri khân păng mra jêng phung ƀon lan Păng; Brah Ndu yơh mra gŭ ndrel ma khân păng.

⁴ Păng mra jut lĕ dak măt ta măt khân păng. Mâu mra geh nau khĭt ôh, mâu mra hôm geh nau klâng ndrê, nhĭm nhhiăng, mâu lah nau nđêh nji đŏng; yorlah lĕ nau tal nguay lĕ rlau lôch jêh.”

⁵ Nơm gŭ ta sưng hađăch lah: “Aơ, Gâp mra ƀư mhe lĕ rngôch ndơ.” Păng lah tay: “Nchih hom, yorlah lĕ nau ngơi aơ jêng nau khư rnơm nsing jêh ri nanê̆ ngăn.”

⁶ Jêh nây Păng lah ma gâp: “Kan lĕ jêh! Gâp jêng Alpha jêh ri Ômêga, jêng Ntơm Bơh Saơm jêh ri Nglĕ Dŭt. Mbu nơm ji hir, Gâp mra ăn nhêt dak mâu sŏk prăk tă bơh tu dak nau rêh.

⁷ Mbu nơm dơi, păng mra dơn lĕ nau aơ jêng drăp ndơn; Gâp mra jêng Brah Ndu păng, jêh ri păng mra jêng kon Gâp.

⁸ Bi ma phung ƀlao, phung mâu chroh, phung ƀơ̆, phung nkhĭt bunuyh, phung văng tĭr, phung ƀư nau blau rƀên, phung mbah rup brah, jêh ri lĕ rngôch phung ngơi mƀruh, nau nkhôm khân păng jêng nglao ŭnh mô ŭnh dôl hit. Nau nây jêng nau khĭt rơh bar.”

⁹ Du huê tâm pơh nuyh tông mpăr djôt pơh mlâm ngan dơ bêng ma pơh nau tât nglĕ dŭt văch ngơi đah gâp pô aơ: “Văch hom, gâp mra ntĭm ma may saơ Ƀăn jêng Ur ma Kon Biăp.”

¹⁰ Brah Huêng Ueh ntrŭt ntrôl gâp jêh ri tông mpăr njŭn leo gâp tât ta yôk toyh dŭt prêh, jêh ri ntĭm ma gâp saơ ƀon kloh ueh jêng ƀon Yêrusalem jŭr tă bơh ntŭk Brah Ndu klơ trôk,

¹¹ ral ang nau chrêk rmah Brah Ndu; nau ral ang ƀon nây nâm bu du mlâm găr lŭ khlay ngăn, nâm bu lŭ khlay jaspidi ang rsang ngăn.

¹² Ƀon geh mpêr toyh jêh ri prêh, geh jât ma bar mpông. Ta lĕ mpông geh jât ma bar tông mpăr, jêh ri ta klơ lĕ mpông nây geh nchih amoh jât ma bar ndŭl mpôl phung Israel.

¹³ Mpeh luh nar ƀon geh pe mlâm mpông, mpeh pa lơ geh pe mlâm mpông, mpeh pa dâng geh pe mlâm mpông, mpeh nhâp nar geh pe mlâm mpông.

¹⁴ Mpêr ƀon nây geh jât ma bar mbon, klơ nây geh jât ma bar amoh săk jêng jât ma bar kôranh oh mon Kon Biăp.

¹⁵ Tông mpăr ngơi đah gâp geh mâng veh jêng mâng jra mah gay ma veh ƀon nây, lĕ mpông jêh ri mpêr ƀon.

¹⁶ Ƀon geh rup n'gong, jong jêh ri dĭ tâm ban. Tông mpăr veh ƀon nây ma mâng jra jêh ri veh jât ma bar rbăn puăn rhiăng kilômet; jong, dĭ jêh ri prêh păng tâm ban da dê.

¹⁷ Tông mpăr veh đŏng mpêr ƀon, geh prao jât ma prăm met, tĭng nâm met bunuyh veh, ăt jêng met tông mpăr đŏng.

¹⁸ Mpêr ƀon ƀư ma lŭ khlay jaspidi, jêh ri ƀon ƀư ma mah kloh ang rsang nâm bu rchŏk.

¹⁹ Lĕ mbon mpêr ƀon nây bu ƀư ueh ma lĕ rngôch ntil lŭ khlay. Mbon tal nguay ƀư ma lŭ khlay jaspidi, mbon rơh bar ma lŭ saphir, mbon rơh pe ma lŭ khlay karnêlian, rơh puăn ma lŭ khlay êmêrôt,

²⁰ mbon rơh prăm ma lŭ khlay ônik, mbon rơh prao ma lŭ karnêlian, mbon rơh pơh ma lŭ khlay krisôlit, mbon rơh pham ma lŭ khlay bêril, mbon rơh sĭn ma lŭ tôpas, mbon rơh jât ma lŭ krisôpras, mbon rơh jât ma nguay ma lŭ khlay jasin, jêh ri mbon rơh jât ma bar ma lŭ khlay amêtis.

²¹ Jât ma bar mpông ƀư ma jât ma bar găr lŭ khlay, ăp mpông jêng du njăr lŭ khlay. Trong tâm ƀon nây ƀư ma mah kloh rsang nâm bu rchŏk.

²² Gâp mâu saơ ngih brah tâm ƀon nây, yorlah Kôranh Brah jêng Brah Ndu Geh Lĕ Nau Brah jêh ri Kon Biăp jêng ngih brah ma ƀon.

²³ Ƀon nây mâu hôm ŭch geh nar ôh, mâu lah khay sol ang, yorlah nau chrêk rmah Brah Ndu sol ang ƀon nây, jêh ri Kon Biăp jêng kađen ma ƀon.

²⁴ Phung mpôl băl bunuyh mra nhuat hăn tă bơh nau ang ƀon; phung hađăch tâm neh ntu mra djôt nau chrêk rmah khân păng nơm lăp ta nây.

²⁵ Lĕ mpông ƀon bu mâu hôm ntĭl ôh dôl nar, yorlah ta nây mâu hôm geh măng ôh.

²⁶ Bu mra djôt leo nau chrêk rmah jêh ri nau yơk phung mpôl băl bunuyh lăp ta nây.

²⁷ Lĕ rngôch phung ƀơ̆ ƀơch, nơm ƀư nau mưch rmot, nơm ngơi mƀruh mâu dơi lăp ƀon ôh, knŏng phung geh amoh nchih jêh tâm ndrom samƀŭt nau rêh Kon Biăp.