Nau Tâm Mpơl 2 - Nau Brah Ndu Ngơi 2023

Lĕ samƀŭt njuăl ma pơh Ngih Brah Ndu ( 2:1 – 3:22 ) Samƀŭt njuăl ma Ngih Brah Ndu ta ƀon Êphêsô

¹ “Nchih hom ma phung tông mpăr ma Phung Ngih Brah Ndu ta ƀon Êphêsô pô aơ: Aơ jêng nau ngơi Nơm djôt pơh mănh mbing tâm ti ma, jêh ri hăn ta nklang pơh jâng kađen mah:

² ‘Gâp gĭt năl lĕ kan may ƀư jêh, nau jâk jêr may, nau may srôih. Gâp gĭt may mâu dơi dơn phung mhĭk, jêh ri rlong uănh jêh phung kơp êng săk khân păng nơm jêng kôranh oh mon, ƀiălah mâu di jêng kôranh oh mon, jêh ri may gĭt năl jêh khân păng jêng phung ngơi mƀruh.

³ May srôih, nsrôih dơn yor amoh Gâp mâu geh nau rgănh ôh.

⁴ Ƀiălah nau Gâp nduyh may, nây jêng nau may chalơi jêh nuih n'hâm yơk rŏng ntơm saơm.

⁵ Pôri, kah gĭt tay hom bơh ntŭk may rdja! Rmal hom nau tih jêh ri ƀư tay lĕ kan ntơm saơm. Tơlah mâu rmal nau tih, Gâp mra văch ta may jêh ri sŏk lơi jâng kađen may bơh ntŭk păng.

⁶ Ƀiălah, may geh nau aơ: Nây jêng nau may tâm rmot ma lĕ kan mpôl Nikôlas, Gâp tâm rmot lĕ.’

⁷ Mbu nơm geh tôr, iăt hom nau Brah Huêng Ueh lah ma Phung Ngih Brah Ndu: ‘Ma mbu nơm mra dơi, Gâp mra ăn păng sa play bơh tơm si nau rêh tâm Parađi Brah Ndu.’ ”

Samƀŭt njuăl ma Phung Ngih Brah Ndu ta ƀon Smirna

⁸ “Nchih hom ma phung tông mpăr Phung Ngih Brah Ndu ta ƀon Smirna pô aơ: Aơ jêng nau ngơi Nơm Lor Lơn jêh ri Nglĕ Dŭt, Nơm hŏ khĭt jêh, jêh ri dâk rêh tay:

⁹ ‘Gâp gĭt năl nau rêh ni jêh ri nau o ach may, ƀiălah may jêng ndrŏng ngăn! Gâp gĭt lĕ nau nchơt bơh phung kơp êng săk khân păng nơm jêng phung Yuđa, ƀiălah nanê̆ mâu di, ƀiălah khân păng jêng phung ngih rƀŭn Satan.

¹⁰ May lơi klach ôh ma lĕ nau rêh ni may bơi dơn. Aơ, brah mhĭk dăch mƀăr ƀaƀă tâm phung khân may ăn tâm ndrung gay rlong uănh khân may; jêh ri khân may mra geh nau rêh ni tâm jât nar. Gŭ răp jăp hom tât khĭt, jêh ri Gâp mra ăn ma may đon hađăch nau rêh.’

¹¹ Mbu nơm geh tôr, iăt hom nau Brah Huêng Ueh lah ma Phung Ngih Brah Ndu: ‘Mbu nơm dơi mâu mra geh nau mhĭk tă bơh nau khĭt rơh bar ôh.’ ”

Samƀŭt njuăl ma Ngih Brah Ndu ta ƀon Pergam

¹² “Nchih hom ma phung tông mpăr Phung Ngih Brah Ndu ta ƀon Pergam nâm pô aơ: Aơ jêng nau ngơi bơh Nơm geh đao bar măt mplônh ngăn:

¹³ ‘Gâp gĭt ta ntŭk may gŭ; ntŭk nây jêng sưng hađăch Satan. May djôt nâp amoh Gâp jêh ri may mâu dun ôh nau chroh ma Gâp, nđâp tâm lĕ nar Y-Antipas, bunuyh mbơh răp jăp ma Gâp, bu hŏ nkhĭt păng ta ntŭk khân may, ta nây Satan gŭ.

¹⁴ Ƀiălah Gâp geh nau ƀaƀă nduyh may: Ntŭk may gŭ geh bunuyh ƀaƀă hăn tĭng nau ntĭm nti Y-Balam, păng hŏ ntĭm ma Y-Balak dơm lŭ chêh jâng tanăp phung Israel gay ma khân păng sa ndơ ƀư brah ma rup brah jêh ri ƀư tih nau văng tĭr.

¹⁵ May geh đŏng bunuyh ƀaƀă tĭng nau phung Nikôlas ntĭm nti.

¹⁶ Pôri, rmal hom nau tih! Tơlah mâu, Gâp mra văch ma may gơnh, sŏk đao gưm bơh trôm mbung Gâp tâm lơh đah khân păng.’

¹⁷ Mbu nơm geh tôr, iăt hom nau Brah Huêng Ueh lah ma Phung Ngih Brah Ndu: ‘Mbu nơm mra dơi, Gâp mra ăn mana pôn ndâp; Gâp mra ăn ma bunuyh nây du lŭ jê̆ nglang, ta lŭ nây bu nchih jêh du amoh mhe, mâu geh bunuyh gĭt ôh, knŏng nơm sŏk dơn dơm dơi gĭt.’ ”

Samƀŭt njuăl ma Ngih Brah Ndu ta ƀon Thiatir

¹⁸ “Nchih hom ma phung tông mpăr ma Phung Ngih Brah Ndu ta ƀon Thiatir pô aơ: Aơ jêng nau Kon Brah Ndu lah, Nơm geh măt tâm ban ma mpiăt ŭnh jêh ri jâng păng jêng nâm bu kông tho chrêk:

¹⁹ ‘Gâp gĭt kan may, nau rŏng may, nau chroh, nau pah kan jêh ri nau may srôih; lĕ nau kan nglĕ dŭt may âk lơn ma lĕ nau kan ntơm saơm.

²⁰ Ƀiălah geh nau Gâp nduyh may, nây jêng may ăn ma H'Jêsêbel, bu ur kơp êng săk păng nơm jêng nơm mbơh lor, ntĭm nti jêh ri ndơm phung oh mon Gâp, gay ma khân păng ƀư tih nau văng tĭr jêh ri sa ndơ ƀư brah ma rup brah.

²¹ Gâp ăn jêh ma bu ur aơ mông nar gay rmal nau tih, ƀiălah păng mâu ŭch rmal nau tih văng tĭr păng ôh.

²² Aơ, Gâp mra klŭp mƀăr păng ta klơ sưng bê̆ch, jêh ri klŭp mƀăr phung bunuyh ƀư tih nau văng tĭr đah păng lăp tâm nau rêh ni toyh, tơlah khân păng mâu tâm rmal ma lĕ kan khân păng nơm.

²³ Gâp mra nkhĭt phung kon păng. Nôk nây, lĕ rngôch Phung Ngih Brah Ndu mra gĭt năl Gâp jêng Nơm sek uănh nuih n'hâm kon bunuyh; Gâp mra mplơ̆ sĭt ma ăp nơm tâm khân may tĭng nâm lĕ kan khân may.

²⁴ Ƀiălah Gâp lah đah phung bunuyh khân may hôm e ta ƀon Thiatir, jêng phung bunuyh mâu sŏk dơn ôh nau nti nây, mâu mâp gĭt năl ôh mâm bu rnha nau jru brah Satan, pô aơ: Gâp mâu dơm nau jâk jêr êng ma khân may.

²⁵ Ƀiălah, knŏng ăn khân may djôt nâp nau khân may nơm geh kŏ tât Gâp văch.

²⁶ Mbu nơm dơi jêh ri djôt prăp lĕ nau kan Gâp kŏ tât nglĕ dŭt, Gâp mra ăn bunuyh nây nau dơi klơ lĕ bri dak;

²⁷ păng mra chiă uănh lĕ bri dak ma mâng jra loih, jêh ri mbang nchah khân păng nâm bu ndơ neh uk, tâm ban đŏng Gâp hŏ dơn jêh nau dơi nây bơh Mbơ̆ Gâp.

²⁸ Gâp mra ăn ma bunuyh nây mănh mbing.

²⁹ Mbu nơm geh tôr, iăt hom nau Brah Huêng Ueh lah ma Phung Ngih Brah Ndu.’”