Nau Tâm Mpơl 19 - Nau Brah Ndu Ngơi 2023

Nau mprơ ma nau ƀư rai ƀon Babilôn

¹ Jêh nau nây, gâp tăng ta klơ trôk nâm bu geh bâr ktang du mpôl bunuyh âk lah pô aơ: “Halêluya! Nau tâm rklaih, nau chrêk rmah jêh ri nau brah jêng ndơ Brah Ndu he.

² Yorlah lĕ nau Păng phat dôih jêng nanê̆ ngăn jêh ri sŏng. Păng phat dôih jêh bu ur văng tĭr toyh, nơm hŏ sŏk nau păng văng tĭr ƀư djơh tâm neh ntu; jêh ri Brah Ndu plơng bôk jêh yor mham phung oh mon Păng bơh bu ur văng tir nây ƀư nkhŭt jêh.”

³ Khân păng lah tay tơ̆ rơh bar: “Halêluya! Nhhŭk ŭnh păng thŭl hao n'ho ro!”

⁴ Bar jât ma puăn nuyh kôranh bu ranh jêh ri puăn mlâm mpa rêh chon mon jêh ri yơk mbah ma Brah Ndu jêng Nơm gŭ ta sưng hađăch, jêh ri lah: “Amen! Halêluya!”

⁵ Geh nteh luh bơh sưng hađăch lah pô aơ: “Lĕ rngôch phung oh mon Brah Ndu he, phung bunuyh klach yơk ma Păng, lĕ phung toyh nđâp phung jê̆, tâm rnê hom ma Păng!”

Rƀŭn tâm nsông Kon Biăp

⁶ Jêh nây gâp tăng geh nteh nâm bu nteh du mpôl bunuyh âk ngăn, nâm bu nteh n'gôr âk n'hong dak, nâm bu nteh nglaih ktang, lah: “Halêluya! Yorlah Kôranh Brah he jêng Brah Ndu Geh Lĕ Nau Brah chiă uănh.

⁷ Răm maak hom, hâk maak hom, tâm rnê hom ma Păng, yorlah rƀŭn tâm nsông Kon Biăp tât jêh jêh ri Ur Păng ndrăp lor jêh săk păng.

⁸ Bu ăn ur păng nsoh ao bok mhay rhên nchrat ral ngăn jêh ri kloh!” (bok mhay rhên nĕ jêng lĕ kan sŏng srăng phung kloh ueh).

⁹ Tông mpăr lah ma gâp pô aơ: “Nchih hom: Ueh maak yơh ma phung bunuyh râng nhêt tâm nsông Kon Biăp!” Tông mpăr lah tay: “Aơ jêng lĕ nau ngơi nanê̆ ngăn tă bơh Brah Ndu.”

¹⁰ Gâp chon mon ta jâng tông mpăr gay yơk mbah, ƀiălah tông mpăr lah: “Lơi ƀư kơt nây, gâp jêng mĭt jiăng pah kan ndrel ma may jêh ri ma phung oh nâu may, jêng phung bunuyh djôt prăp nau Brah Yêsu mbơh. Yơk mbah hom ma Brah Ndu. Yorlah nau mbơh nkoch ma Brah Yêsu jêng nau du nđơr tâm nau mbơh lor.”

Nơm Răp Jăp jêh ri Nanê̆ Ngăn

¹¹ Dôl nây gâp saơ trôk pơk jêh, jêh ri, ri, geh du mlâm seh nglang! Nơm ncho seh geh amoh NAU RĂP JĂP JÊH RI NANÊ̆ NGĂN; Păng phat dôih jêh ri tâm lơh ma nau sŏng srăng.

¹² Măt Păng nâm bu mpiăt ŭnh; ta bôk Păng geh âk đon hađăch, ta klơ geh nchih du amoh, mâu geh nơm gĭt ôh, knŏng Păng nơm.

¹³ Păng nsoh ao mbŭk tâm mham. Amoh Păng dơi rnha jêng NAU BRAH NDU NGƠI.

¹⁴ Phung tahan ta klơ trôk nsoh ao bok mhay rhên, nglang jêh ri kloh da dê, ncho seh nglang hăn tĭng Păng.

¹⁵ Tă bơh trôm mbung Păng geh du mlâm đao hơr ngăn gay ma dong lĕ bri dak; Păng mra chiă uănh khân păng ma du mlâm mâng jra loih. Păng mra jot mpet thŭng play krăk ƀâu ma nau ji nuih Brah Ndu Geh Lĕ Nau Brah.

¹⁶ Ta ao jêh ri ta tơm blu Păng geh nchih du amoh: HAĐĂCH MA PHUNG HAĐĂCH, KÔRANH BRAH MA PHUNG KÔRANH BRAH.

Dơi đah mpô mpa jêh ri nơm mbơh lor nklă

¹⁷ Jêh nây gâp saơ du huê tông mpăr gŭ dâk tâm nar, nter bâr huy kuăl ma lĕ rngôch sĭm dôl mpăr tâm nklang trôk: “Văch hom, tâm rgum băl hom gay râng nhêt sông sa toyh Brah Ndu,

¹⁸ gay sa săk phung hađăch, săk phung kôranh tahan, săk phung bunuyh geh nau ktang, săk seh jêh ri phung ncho seh, săk lĕ rngôch bunuyh, nđâp ma kon me mâu lah dĭk bu, nđâp ma jê̆ jêh ri toyh.”

¹⁹ Gâp saơ mpô mpa dŭt janh jêh ri phung hađăch tâm neh ntu nđâp ma phung tahan khân păng rgum băl gay tâm lơh đah Nơm ncho seh jêh ri đah phung tahan Păng.

²⁰ Ƀiălah bu nhŭp jêh mpô mpa dŭt janh nây jêh ri nơm mbơh lor nklă — nơm ƀư jêh lĕ nau mbên khlay tanăp mpô mpa, gay ndơm mƀruh ma phung bunuyh dơn jêh nau mbên tă bơh mpô mpa jêh ri phung bunuyh yơk mbah ma rup păng — bu nhŭp đŏng. Lĕ bar hê khân păng bu mƀăr rêh jŭr tâm nglao ŭnh mô ŭnh dôl hit.

²¹ Phung bunuyh hôm e ƀaƀă, khĭt da dê đah đao gưm luh tă bơh trôm mbung Nơm ncho seh; lĕ rngôch phung sĭm sa puăch khân păng hơm bêng da dê.