Nau Tâm Mpơl 18 - Nau Brah Ndu Ngơi 2023

Nau rlâm rai ƀon toyh Babilôn

¹ Pakơi nây, gâp saơ du huê tông mpăr êng geh nau dơi toyh ngăn jŭr tă bơh trôk; lĕ neh ntu jêng n'gă ang da dê ma nau chrêk rmah tông mpăr nây.

² Tông mpăr nter huy: “Ƀon Babilôn dŭt toyh rlâm rai jêh, rlâm rai jêh! Păng plơ̆ jêng ntŭk phung brah mhĭk gŭ, Ntu rsuăn ma lĕ huêng djơh, Jêh ri ma lĕ rngôch ntil sĭm ƀơ̆ ƀơch bu tâm rmot.

³ Yorlah lĕ ntil mpôl bunuyh nhêt ndrănh pâl rlưn rlau keh păng mâu jan tĭng nau vay, Phung hađăch ta neh ntu ƀư tih văng tĭr đah păng jêh, Phung tăch rgâl ta neh ntu jêng ndrŏng yor tă bơh nau păng gŭ rêh dŭt mpŭng.”

⁴ Jêh nây gâp tăng du bâr êng tă bơh trôk, lah pô aơ: “Hơi phung ƀon lan Gâp, luh hom bơh ƀon Babilôn! Klach lah khân may hăn lăp nau tih ndrel ma păng, Jêh ri khân may dơn nau rêh ni ndrel ma păng:

⁵ Yorlah nau tih păng bun prêh tât ta klơ trôk. Jêh ri Brah Ndu kah gĭt ma nau tih mhĭk păng.

⁶ Mplơ̆ lơi ma păng nâm bu păng hŏ ƀư ma bu, Mplơ̆ sĭt ma păng bar tơ̆ lĕ kan păng ƀư jêh. Rlŭk hom ma păng bar tơ̆ kachok păng rlŭk jêh.

⁷ Păng tâm rnê êng ma păng nơm jêh ri gŭ rêh dŭt ndrŏng dŭt maak, Ri mơ ƀư hom ma păng dơn nau rêh ni jêh ri nau klâng ndrê kơt nây đŏng. Yorlah păng lah tâm nuih n'hâm pô aơ: ‘Gâp gŭ jêh tâm ban ma hađăch bu ur! Gâp mâu di jêng bu ur ndrô, Gâp mâu mra geh nau klâng rvê ôh.’

⁸ Yor ri, tâm du nar lĕ nau rêh ni mra văch ma păng: Nau khĭt, nau klâng ndrê, nau sa sât ji ngot. Ŭnh mra su lơi păng, Yorlah Kôranh Brah, Nơm phat dôih păng, jêng Brah Ndu geh bêng nau dơi.”

⁹ Lĕ rngôch phung hađăch ta neh ntu, đơ phung bunuyh ƀư tih văng tĭr jêh ri gŭ rêh dŭt ndrŏng dŭt maak đah păng, mra nhĭm nhhiăng, lŭng nter tơlah khân păng saơ nhhŭk ŭch sa păng.

¹⁰ Yorlah klach nau rêh ni păng, rĭ dĭng khân păng gŭ dâk ngai, jêh ri khân păng lah: “Rêh ni ngăn! Rêh ni ngăn! Ƀon dŭt toyh, Ƀon Babilôn ndrŏng kuăng! Knŏng tâm du mông, nau phat dôih ma may tât jêh!”

¹¹ Phung tăch rgâl ndơ ta neh ntu nhĭm đŏng jêh ri klâng yor păng, yorlah mâu hôm geh bunuyh rvăt tay drăp ndơ khân păng.

¹² Drăp ndơ nây geh mah, prăk, lŭ khlay, lŭ rmah; bok mhay rhên, bok chăng krăk, bok ek ndrŭng jêh ri bok chăng; ăp ntil tơm si ƀâu kah, ăp ntil ndơ ma la, ma tơm si khlay, ma kông, ma loih, ma lŭ marbrơ;

¹³ ma sinamôn, ndơ ƀâu kah, dak ƀâu kah, dak si tăng jêh ri ntăk si ƀâu kah; ndrănh jêh ri dak ngi ôlive, rnih môi jêh ri ba ƀlê; mpô mpa rong jêh ri biăp, seh jêh ri ndeh seh; dĭk bu jêh ri huêng kon bunuyh.

¹⁴ Khân păng lah: “Lĕ play kah huêng may ŭch, du ngai jêh đah may; lĕ rngôch nau dŭt ueh, nau chrêk ma lơp rai roh jêh bơh may jêh ri may mâu mra joi saơ khân păng ôh.”

¹⁵ Phung tăch rgâl lĕ drăp ndơ aơ, jêng phung bunuyh ƀư ndrŏng jêh tă bơh Babilôn, khân păng mra gŭ ngai yorlah klach ma nau rêh ni păng; khân păng mra nhĭm nhhiăng, klâng ndrê,

¹⁶ lah pô aơ: “Rêh ni ngăn! Rêh ni ngăn! Hơi ƀon dŭt toyh ri hŏ tă nsoh jêh bok mhay rhên, chăng krăk, chăng, nkrơ̆ ma mah, lŭ khlay jêh ri lŭ rmah!

¹⁷ Yorlah tâm du mông, nau dŭt ndrŏng bơh păng rai lĕ jêh.” Lĕ rngôch kôranh kumpăn, lĕ rngôch phung ncho ta klơ kumpăn, phung bunuyh ƀĭt kumpăn jêh ri lĕ rngôch phung tăch rgâl drăp ndơ tâm dak mƀŭt gŭ ngai da dê;

¹⁸ dôl saơ nhhŭk ŭnh sa păng, khân păng kuăl huy: “Ê hŏ mâp geh ƀon dŭt toyh nâm bu ƀon aơ!”

¹⁹ Khân păng suy ndruyh neh ta klơ bôk khân păng nơm, nhĭm nhhiăng, lŭng nter, klâng ndrê, jêh ri lah: “Rêh ni ngăn! Rêh ni ngăn! Hơi ƀon dŭt toyh aơ, Tă bơh nau păng ndrŏng ƀư ndrŏng ma lĕ rngôch phung geh kumpăn ta dak mƀŭt; ƀiălah knŏng tâm du mông ƀon nây rai ƀhiau jêh!

²⁰ Hơi trôk, răm maak hom yorlah păng! Hơi phung kloh ueh, phung kôranh oh mon, jêh ri phung nơm mbơh lor răm maak hom đŏng! Yorlah Brah Ndu tâm rmal jêh păng tĭng nâm nau păng ƀư jêh đah khân may!”

²¹ Nôk nây, du huê tông mpăr bêng nau dơi sŏk du mlâm lŭ toyh nâm bu mpăl kĭn toyh klŭp tâm dak mƀŭt jêh ri lah: “Babilôn, ƀon dŭt toyh bu mra klŭp păng trŭnh tâm ban pônây, jêh ri mâu hôm geh nơm mra joi saơ păng.

²² Mâu hôm geh nơm tăng ôh tâm may saơ nteh phung kreh gong rêng, nteh phung mprơ, nteh phung uh n'hôm, nơm uh nŭng đŏng. Tâm may bu mâu mra saơ du huê bunuyh blau tă bơh ăp nau pah kan êng ôh; jêh ri nteh mpăl kĭn ăt mâu hôm đŏng.

²³ Nau ang kađen mâu mra nchrat ang ta ntŭk may đŏng; nteh maak ma ur sai mhe mâu mra hôm tăng ta ntŭk may đŏng, yorlah phung tăch rgâl may jêng phung bunuyh geh nau ktang ta neh ntu, jêh ri yorlah may dŏng nau ƀŭk rƀên gay ndơm mƀruh ma lĕ rngôch mpôl băl bunuyh.

²⁴ Jêh ri ta ƀon aơ, bu joi saơ mham phung nơm mbơh lor, phung kloh ueh jêh ri lĕ rngôch phung bu tâm nkhĭt ta neh ntu.”