Nau Tâm Mpơl 17 - Nau Brah Ndu Ngơi 2023

Nau phat dôih ƀon Babilôn dŭt toyh

¹ Nôk nây, du huê tâm pơh nuyh tông mpăr djôt pơh mlâm ngan văch tât jêh ri đă ma gâp pô aơ: “Văch hom aơ, gâp mra ntĭm ma may nau phat dôih bu ur văng tĭr toyh gŭ ta klơ lĕ n'hong dak ri.

² Phung hađăch ta klơ neh ntu ƀư tih nau văng tĭr ndrel păng, jêh ri phung ƀon lan gŭ ta klơ neh nhŭl ndrănh đŏng yorlah ndrănh nau văng tĭr păng.”

³ Huêng Brah ntrŭt ntrôl tâm gâp, jêh ri tông mpăr njŭn leo gâp mŭt tâm bri rdah. Ta nây, gâp saơ du huê bu ur gŭ ta klơ du mlâm mpô mpa dŭt janh chăng rhưch geh pơh mlâm bôk, jât mlâm nke, jêh ri ta săk păng djôt bêng ma lĕ amoh nau sưr rlau.

⁴ Bu ur nĕ nsoh ao chăng krăk jêh ri chăng rhưch, ndơ nkrơ̆ ma mah, lŭ khlay, jêh ri lŭ rmah khlay, ta ti djôt du mlâm kachok mah bêng ma lĕ nau mưch rmot, ƀơ̆ ƀơch ma nau văng tĭr păng nơm.

⁵ Ta ndăr kleng păng geh nchih du amoh bêng ma nau ndâp: “BABILÔN DŬT TOYH, MÊ̆ PHUNG BU UR VĂNG TĬR JÊH RI LĔ NAU ɃƠ̆ ɃƠCH TA NEH NTU.”

⁶ Gâp saơ bu ur nĕ nhŭl mham phung kloh ueh jêh ri mham phung mbơh nkoch ma Brah Yêsu. Tơlah gâp saơ păng, gâp hih rhâl hâu ngăn.

⁷ Ƀiălah tông mpăr lah ma gâp pô aơ: “Mâm ƀư may hih rhâl? Gâp mra ngơi ma may gĭt ma nau ndâp mpôn tâm bu ur nĕ jêh ri tâm mpô mpa dŭt janh pơh mlâm bôk, jât mlâm nke rdeng jêh păng.

⁸ Mpô mpa dŭt janh may hŏ saơ jêh, bơh saơm geh jêh, aƀaơ aơ mâu geh, păng dăch hao tă bơh brŏng jru jêh ri hăn tât ntŭk roh rai. Phung ƀon lan gŭ ta neh ntu mâu geh nchih amoh tâm ndrom samƀŭt nau rêh ntơm bơh rhăk njêng neh ntu, khân păng mra hih rhâl dôl saơ mpô mpa nây; yorlah păng bơh saơm geh jêh, aƀaơ aơ mâu geh, jêh ri păng mra mpơl.

⁹ Tâm nau geh nây, ăn geh bôk rngok blau mĭn. Pơh mlâm bôk jêng pơh yôk, bu ur nây gŭ ta nây.

¹⁰ Khân păng ăt jêng pơh nuyh hađăch: Prăm nuyh tŭp jêh, du huê hôm chiă uănh, du huê êng ê hŏ văch ôh. Tơlah păng văch, păng knŏng hôm geh tâm ƀât lât.

¹¹ Mpô mpa dŭt janh bơh saơm geh jêh, aƀaơ aơ mâu geh, jêng hađăch rơh pham; păng jêng tâm phung pơh nuyh hađăch, jêh ri păng dôl hăn tât ntŭk roh rai.

¹² Jât mlâm nke may saơ jêh jêng jât nuyh hađăch ê mâp sŏk dơn ƀon bri hađăch ôh, ƀiălah khân păng mra sŏk dơn nau dơi jêng hađăch ndrel ma mpô mpa dŭt janh tâm du mông.

¹³ Khân păng geh du ai nuih n'hâm jao nau ktang jêh ri nau dơi khân păng ma mpô mpa dŭt janh.

¹⁴ Khân păng mra tâm lơh đah Kon Biăp jêh ri Kon Biăp mra dơi đah khân păng, yorlah Kon Biăp jêng hađăch ma phung hađăch, Kôranh Brah ma lĕ rngôch kôranh brah; jêh ri phung gŭ ndrel ma Păng, jêng phung bunuyh geh nau kuăl jêh, nau săch jêh, jêh ri gŭ răp jăp, ăt mra dơi.”

¹⁵ Jêh nây tông mpăr lah ma gâp: “Lĕ n'hong dak may saơ bu ur văng tĭr gŭ ta klơ jêng lĕ ntil mpôl bunuyh, phung mpôl bunuyh, lĕ bri dak jêh ri lĕ nau ngơi.

¹⁶ Jât mlâm nke may saơ jêh jêh ri mpô mpa dŭt janh mra tâm rmot ma bu ur văng tĭr. Khân păng mra chalơi jêh ri ƀư ma păng gŭ rhôk; khân păng mra sa puăch bu ur văng tĭr jêh ri gŭch păng tâm ŭnh.

¹⁷ Yorlah Brah Ndu ƀư ăn khân păng mĭn ntrâng ƀư nau Păng mĭn tâm du ai nuih n'hâm ndrăng khân păng jao ƀon bri hađăch khân păng nơm ma mpô mpa dŭt janh, ma tât nôk nau ngơi Brah Ndu lĕ tât di ngăn.

¹⁸ Bu ur may saơ nĕ jêng du ƀon dŭt toyh geh nau dơi ktang ta klơ phung hađăch lam neh ntu.”