Nau Tâm Mpơl 16 - Nau Brah Ndu Ngơi 2023

Pơh ngan nau Brah Ndu ji nuih

¹ Nôk nây, gâp tăng bâr ngơi ktang luh bơh ngih brah đă pơh nuyh tông mpăr pô aơ: “Hăn hom, nkhŭt pơh ngan nau Brah Ndu ji nuih tâm neh ntu.”

² Tông mpăr tal nguay hăn nkhŭt ngan păng nơm tâm neh ntu, geh lĕ ok eh jêh ri ji ngăn tâm mpơl ta klơ phung bunuyh geh nau mbên mpô mpa dŭt janh jêh ri yơk mbah rup păng.

³ Tông mpăr rơh bar nkhŭt ngan păng nơm tâm dak mƀŭt jêh ri dak mƀŭt jêng nâm bu mham bunuyh khĭt; jêh ri lĕ rngôch mpa rêh gŭ tâm dak mƀŭt khĭt lĕ.

⁴ Tông mpăr rơh pe nkhŭt ngan păng nơm tâm dak krong jêh ri tâm lĕ tu dak, jêh ri khân păng jêng mham.

⁵ Gâp tăng tông mpăr geh nau dơi tâm dak lah pô aơ: “Ơ Nơm Kloh Ueh, NƠM AɃAƠ AƠ, GEH JÊH, May jêng sŏng srăng, Yorlah May phat dôih lĕ nau aơ jêh;

⁶ Yorlah khân păng ƀư nkhŭt jêh mham phung kloh ueh jêh ri phung nơm mbơh lor, Pôri May ăn jêh ma khân păng nhêt mham. Nĕ mơ tâm di!”

⁷ Jêh nây gâp tăng bâr tă bơh nơng ƀư brah lah pô aơ: “N'hêl nanê̆ ngăn, ơ Kôranh Brah jêng Brah Ndu Geh Lĕ Nau Brah, Lĕ nau May phat dôih jêng nanê̆ ngăn jêh ri sŏng.”

⁸ Tông mpăr rơh puăn nkhŭt ngan păng nơm ta nar, nar dơi vay ăn ŭnh su kon bunuyh.

⁹ Jêh ri n'hôl duh hâu ir ngăn su kon bunuyh jêh ri khân păng ngơi djơh tât amoh Brah Ndu, jêng Nơm geh nau dơi ma ntil nau rêh ni nây, ƀiălah khân păng mâu đŏng rmal nau tih gay ma tâm rnê Păng.

¹⁰ Tông mpăr rơh prăm nkhŭt ngan păng nơm ta sưng hađăch mpô mpa dŭt janh, ƀon bri hađăch păng nkŭm ma nau ngo ro, jêh ri bu kăp mpiăt yor nau ji ngăn.

¹¹ Khân păng ngơi djơh tât Brah Ndu ta klơ trôk yor nau rêh ni jêh ri ok eh khân păng nơm, ƀiălah khân păng mâu rmal ôh lĕ kan khân păng nơm ƀư.

¹² Tông mpăr rơh prao nkhŭt ngan păng nơm tâm dak krong Ơphrat, dak krong suăt, gay ma nkra trong ma phung hađăch mpeh luh nar.

¹³ Gâp saơ tă bơh mbung bêh nhŭk nhăk, mbung mpô mpa dŭt janh jêh ri bơh trôm mbung nơm mbơh lor nklă geh pe huêng djơh nâm bu phung kĭt hăn luh.

¹⁴ Khân păng jêng phung huêng brah mhĭk, ƀư lĕ nau mbên khlay, jêh ri hăn ma phung hađăch lam neh ntu gay ma rgum phung nây ma nau tâm lơh ta nar toyh Brah Ndu Geh Lĕ Nau Brah.

¹⁵ “Aơ, gâp văch nâm bu du huê bunuyh ntŭng, ueh maak yơh ma mbu nơm gŭ njrăng jêh ri mât mray ma kho ao păng nơm, gay ma lơi ăn păng rhôk, lơi ăn bu saơ nau bêk păng nơm!”

¹⁶ Khân păng tâm rgum phung hađăch tâm du ntŭk, tâm nau ngơi Hêbrơ rnha jêng Harmagêdôn.

¹⁷ Tông mpăr rơh pơh nkhŭt ngan păng nơm tâm trôk nđôch, geh du bâr ngơi ktang bơh sưng hađăch tâm ngih brah lah pô aơ: “Kan lĕ jêh!”

¹⁸ Geh ro lơp nchrat, bâr ngơi, nteh nglaih jêh ri nau n'găr neh ntu ktang; nau n'găr neh ntu ktang kŏ tât ntơm bơh geh kon bunuyh gŭ ta neh ntu ê hŏ geh kơt nây.

¹⁹ Ƀon dŭt toyh tâm pă jêng pe; bi lĕ ƀon toyh tâm ntil mpôl bunuyh rlâm lĕ. Brah Ndu kah gĭt ma ƀon Babilôn dŭt toyh, gay ma ăn păng nhêt kachok ndrănh nau Păng ji nuih hâu ngăn.

²⁰ Lĕ rngôch kôdak mƀŭt du, lĕ yôk roh lĕ.

²¹ Geh mih pler dŭt toyh, jâk klăp lah puăn jât kilô, tă bơh trôk tŭp ta kon bunuyh, kon bunuyh ngơi djơh tât Brah Ndu yor lĕ ntil nau rêh ni tă bơh mih pler nây, yorlah nây jêng du ntil nau rêh ni dŭt krit kir.