Nau Tâm Mpơl 15 - Nau Brah Ndu Ngơi 2023

Nau mprơ phung bunuyh dơi đah mpô mpa dŭt janh

¹ Gâp saơ tâm trôk du nau mbên khlay êng ta klơ trôk dŭt toyh jêh ri khlay ngăn: Pơh tông mpăr djôt pơh ntil nau rêh ni nglĕ dŭt, yor ma lĕ ntil nau rêh ni aơ, nau Brah Ndu ji nuih lôch jêh.

² Gâp saơ du ndơ nâm bu dak mƀŭt măt rchŏk tâm rlŭk đah ŭnh, phung bunuyh dơi jêh đah mpô mpa dŭt janh jêh ri rup păng ndrel ma mrô amoh păng gŭ dâk êp meng ta dak mƀŭt măt rchŏk, nđâp ma lĕ gong rêng Brah Ndu tâm ti khân păng.

³ Khân păng mprơ nau mprơ Y-Môis, oh mon Brah Ndu, jêh ri nau mprơ Kon Biăp pô aơ: “Ơ Kôranh Brah Ndu Geh Lĕ Nau Brah! Kan May dŭt toyh jêh ri khlay ngăn! Ơ Hađăch lĕ rngôch rnôk n'ho ro, Trong May jêng sŏng srăng jêh ri nanê̆ ngăn!

⁴ Ơ Kôranh Brah, mbu nơm mâu mra klach yơk Kôranh Brah, Jêh ri mâu tâm rnê amoh may? Yorlah knŏng êng Kôranh Brah jêng kloh ueh. Lĕ rngôch mpôl băl mra văch Yơk mbah tanăp Kôranh Brah, Yorlah lĕ nau sŏng srăng May tâm mpơl jêh.”

Pơh tông mpăr jêh ri pơh ntil nau rêh ni

⁵ Jêh nau nây, gâp uănh ngih brah jêng Vâl Bok Nau Tâm Rnglăp ta klơ trôk pơk jêh.

⁶ Pơh nuyh tông mpăr djôt pơh ntil nau rêh ni hăn luh tă bơh ngih brah, nsoh ao bok mhay kloh rsang chrat ang, rêt ma rse mah ta ntang ntơh.

⁷ Du mlâm tâm puăn mlâm mpa rêh ăn ma pơh nuyh tông mpăr pơh mlâm ngan mah, dơ bêng ma nau Brah Ndu ji nuih, jêng Nơm gŭ rêh ƀaƀơ n'ho ro.

⁸ Ngih brah bêng ma nhhŭk ŭnh tă bơh nau chrêk rmah Brah Ndu jêh ri nau brah Păng; mâu geh ôh du huê klăp dơi lăp tâm ngih brah kŏ tât pơh ntil nau rêh ni tă bơh pơh nuyh tông mpăr lĕ lôch jêh.