Nau Tâm Mpơl 14 - Nau Brah Ndu Ngơi 2023

Kon Biăp jêh ri phung geh nau tâm chuai

¹ Gâp uănh, ri, Kon Biăp dâk ta klơ yôk Siôn ndrel ma du rhiăng puăn jât ma puăn rbăn nuyh geh amoh Kon Biăp jêh ri amoh Mbơ̆ Kon Biăp nchih ta ndăr kleng khân păng nơm.

² Gâp tăng tă bơh trôk nteh nâm bu nteh âk n'hor dak jêh ri nâm bu nteh nglaih ktang. Nau nteh gâp tăng nâm bu nteh gong rêng dôl khân păng kreh gong rêng.

³ Khân păng mprơ du nau mprơ mhe tanăp sưng hađăch, tanăp puăn mlâm mpa rêh jêh ri phung kôranh bu ranh. Mâu geh bunuyh dơi nti nau mprơ nây, knŏng phung du rhiăng puăn jât ma puăn rbăn, phung bu hŏ chuai jêh bơh neh ntu.

⁴ Phung bunuyh nây mâu mâp ƀư ƀơ̆ ƀơch đah bu ur ôh, yorlah khân păng jêng phung kloh. Mbah ntŭk Kon Biăp hăn, phung bunuyh nây hăn tĭng ta ntŭk nây. Bu hŏ chuai jêh khân păng tă bơh nklang kon bunuyh gay ƀư play bôk yan ma Brah Ndu jêh ri ma Kon Biăp.

⁵ Tâm trôm mbung khân păng mâu mâp geh nau mƀruh ôh; khân păng jêng phung bunuyh mâu geh têl khap.

Pe tông mpăr

⁶ Jêh nây gâp saơ du huê tông mpăr êng mpăr ta nklang trôk, geh Nau Mhe Mhan Ueh n'ho ro gay mbơh ma phung gŭ ta neh ntu, ma lĕ rngôch bri dak, phung ndŭl mpôl, lĕ rngôch nau ngơi, lĕ rngôch phung ƀon lan.

⁷ Tông mpăr ngơi huy pô aơ: “Klach yơk hom ma Brah Ndu jêh ri tâm rnê Păng, yor mông Păng phat dôih tât jêh. Yơk mbah hom ma Nơm rhăk njêng trôk, neh ntu, dak mƀŭt jêh ri lĕ tu dak.”

⁸ Du huê tông mpăr êng, jêng nơm rơh bar tĭng groi pakơi, lah pô aơ: “Ƀon Babilôn dŭt toyh rlâm rai jêh, rlâm rai jêh! Păng ƀư ăn lĕ rngôch bri dak nhêt ndrănh pâl rlưn rlau keh păng mâu jan tĭng nau vay.”

⁹ Du huê tông mpăr êng, jêng nơm rơh pe tĭng groi pakơi, lah ma bâr ktang pô aơ: “Tơlah du huê yơk mbah ma mpô mpa mpô mpa dŭt janh ndrel ma rup păng jêh ri sŏk dơn nau mbên ta ndăr kleng mâu lah ta ti păng nơm,

¹⁰ bunuyh nây mra nhêt ndrănh nau ji nuih mâu pot lai tă bơh Brah Ndu kêt tâm kachok nau Păng ji nuih, păng mra dơn nau nđêh nji tâm ŭnh jêh ri mô ŭnh tanăp phung tông mpăr kloh jêh ri tanăp Kon Biăp.

¹¹ Nhhŭk ŭnh bơh nau nđêh nji khân păng thŭl hao n'ho ro. Phung bunuyh yơk mbah ma mpô mpa dŭt janh ndrel ma rup păng, jêh ri mbu nơm sŏk dơn nau mbên amoh păng, pôri măng nâm nar mâu mâp rlu ôh.”

¹² Aơ yơh jêng nuih n'hâm srôih phung kloh ueh, jêng phung djôt prăp lĕ nau vay Brah Ndu ntăm jêh ri nau chroh ma Brah Yêsu.

¹³ Gâp tăng nteh tă bơh trôk ngơi pô aơ: “Nchih hom: Ntơm aƀaơ tât kăndơ̆, ueh maak yơh phung bunuyh khĭt jêng khĭt tâm Kôranh Brah!” Brah Huêng Ueh lah: “N'hêl nanê̆ ngăn, khân păng mra gŭ rlu bơh lĕ hŏt rgănh khân păng nơm jêh ri lĕ kan khân păng tĭng groi khân păng.”

Yan rek jêh ri yan pĕ play krăk ƀâu

¹⁴ Jêh nây gâp uănh saơ, ri, geh du ndâr tŭk nglang; klơ ndâr tŭk geh bunuyh nâm bu Kon Bunuyh dôl gŭ, bôk ndô đon hađăch ma mah, ti djôt du mlâm nhuĕ hơr.

¹⁵ Du huê tông mpăr êng hăn luh tă bơh ngih brah, nter bâr huy kuăl ma Nơm gŭ tâm ndâr tŭk: “Yơr hom nhuĕ May luh jêh ri rek hom, yorlah yan rek tât jêh, yan kăch roih tâm neh ntu dŭm jêh.”

¹⁶ Nơm gŭ ta ndâr tŭk klŭp mƀăr nhuĕ păng nơm ta neh ntu jêh ri rek lĕ neh ntu.

¹⁷ Gâp saơ du huê tông mpăr êng tă bơh ngih brah ta klơ trôk hăn luh, geh đŏng du mlâm nhuĕ hơr.

¹⁸ Jêh nây du huê tông mpăr êng đŏng, geh nau dơi đah ŭnh, tă bơh nơng ƀư brah hăn luh, păng kuăl dŭt hâu ngăn ma nơm geh nhuĕ hơr pô aơ: “Yơr hom nhuĕ may luh jêh ri koh lĕ rkŭm play krăk ƀâu tâm neh ntu, yorlah play krăk ƀâu dŭm jêh.”

¹⁹ Tông mpăr nây klŭp mƀăr nhuĕ jŭr ta neh ntu, koh lĕ rkŭm play krăk ƀâu tă bơh rse krăk ƀâu, jêh ri klŭp play krăk ƀâu lăp tâm thŭng mpet toyh tă bơh nau Brah Ndu ji nuih.

²⁰ Bu jot plên khân păng tâm thŭng mpet nây padih ƀon, jêh nây geh mham tă bơh thŭng mpet hoch luh; hao tât ta mbung seh, jêh ri lêng tât geh pe rhiăng kilômet.