Nau Tâm Mpơl 13 - Nau Brah Ndu Ngơi 2023

Bar mlâm mpô mpa dŭt janh

¹ Pakơi nây, gâp saơ du mlâm mpô mpa dŭt janh văch tă bơh dak mƀŭt. Păng geh jât mlâm nke, pơh bôk; ta klơ lĕ nke geh jât đon hađăch, ta klơ lĕ bôk geh amoh nau sưr rlau.

² Mpô mpa dŭt janh gâp uănh saơ nâm bu yau brăch; jâng păng nâm bu jâng kau, mbung nâm bu mbung yau mŭr. Bêh nhŭk nhăk ăn ma păng nau dơi ktang, sưng hađăch jêh ri nau dơi toyh.

³ Du mlâm tâm lĕ bôk păng nâm bu geh sôt rmanh; ƀiălah ntŭk sôt nây lĕ bah jêh, jêh ri lam neh ntu hih rhâl da dê ngăn hăn tĭng mpô mpa dŭt janh nĕ.

⁴ Bu yơk mbah ma bêh nhŭk nhăk yorlah păng ăn jêh nau dơi ma mpô mpa dŭt janh. Khân păng yơk mbah ma mpô mpa dŭt janh đŏng jêh ri lah pô aơ: “Mbu nơm tâm ban ma mpô mpa dŭt janh, mbu dơi tâm lơh đah păng?”

⁵ Bu ăn ma mpô mpa dŭt janh mbung ngơi lĕ nau ngơi ƀlăch ƀlêr, sưr rlau; bu ăn ma păng dơi vay ƀư nau ktang tâm puăn jât ma bar khay.

⁶ Păng hă mbung ngơi lĕ nau ngơi djơh tât Brah Ndu, ngơi djơh tât amoh Păng, ma ngih bok Păng jêh ri phung gŭ ta klơ trôk.

⁷ Bu ăn păng dơi vay tâm lơh đah phung kloh ueh jêh ri ăn păng dơi đah phung nây. Bu ăn đŏng ma păng nau dơi chiă uănh phung ndŭl mpôl, phung mpôl băl bunuyh, lĕ nau ngơi, jêh ri lĕ bri dak.

⁸ Lĕ rngôch bunuyh gŭ rêh ta neh ntu mra yơk mbah ma păng, nâm bu ntĭt phung mâu geh amoh săk nchih tâm ndrom samƀŭt nau rêh Kon Biăp bu nkhĭt jêh ntơm bơh nau rhăk njêng neh ntu.

⁹ Mbu nơm geh tôr, gŭ iăt hom!

¹⁰ Tơlah mbu nơm bu njŭn leo jêng bu nă, Păng mra jêng bu nă. Tơlah mbu nơm bu nkhĭt ma đao gưm, Bu mra nkhĭt păng ma đao gưm. Aơ jêng nau srôih jêh ri nau chroh phung kloh ueh.

Mpô mpa dŭt janh tal bar

¹¹ Gâp saơ du mlâm mpô mpa dŭt janh êng văch tă bơh neh. Păng geh bar mlâm nke nâm bu nke Kon Biăp, jêh ri păng ngơi nâm bu bêh nhŭk nhăk.

¹² Păng ƀư lĕ rngôch nau dơi mpô mpa dŭt janh tal nguay tanăp măt mpô mpa dŭt janh nây, jêh ri ƀư ăn neh ntu jêh ri phung gŭ ta klơ neh ntu yơk mbah ma mpô mpa dŭt janh tal nguay, jêng mpô mpa geh sôt rmanh, bah jêh.

¹³ Păng ƀư âk nau mbên khlay toyh, kŏ tât ƀư ăn ŭnh tă bơh trôk tŭp jŭr ta neh ntu tanăp lĕ rngôch bunuyh.

¹⁴ Păng ndơm mƀruh phung gŭ ta neh ntu ma nau mbên khlay, bu ăn păng dơi vay ƀư tanăp mpô mpa dŭt janh; jêh ri đă ma khân păng ƀư rup trah mpô mpa geh ntŭk sôt rmanh ƀơh đao gưm ƀiălah ăt hôm rêh.

¹⁵ Bu ăn păng dơi vay ăn n'hâm nsôr ma rup mpô mpa dŭt janh gay ma rup nây dơi ngơi, jêh ri păng đă bu nkhĭt khĭt lĕ rngôch phung mâu mbah ma rup mpô mpa nây.

¹⁶ Păng ƀư ăn lĕ rngôch bunuyh, phung jê̆ nđâp ma phung toyh, phung ndrŏng nđâp ma phung o ach, phung kon me nđâp ma phung dĭk sŏk dơn du ndơ mbên ta ti ma mâu lah ta ndăr kleng,

¹⁷ gay ma mâu geh bunuyh dơi rvăt mâu lah tăch tơlah mâu geh ndơ mbên nây, nâm bu ntĭt amoh mpô mpa dŭt janh mâu lah mrô amoh păng.

¹⁸ Tâm nau geh aơ ăn geh nau blau mĭn. Mbu nơm jêng bunuyh gĭt rbăng, kơp hom mrô mpô mpa dŭt janh, yorlah nây jêng mrô rnha du huê bunuyh; mrô nĕ jêng prao rhiăng prao jât ma prao.