Nau Tâm Mpơl 11 - Nau Brah Ndu Ngơi 2023

Bar hê nơm mbơh

¹ Nôk nây bu ăn ma gâp du mâng veh nâm bu mâng jra jêh ri lah pô aơ: “Dâk hom jêh ri veh ngih brah Brah Ndu jêh ri nơng ƀư brah nđâp ma phung bunuyh yơk mbah tâm ntŭk nây.

² Ƀiălah ndring padih nây om, lơi veh; yorlah bu jao jêh păng ma phung bu năch, jêh ri khân păng mra jot plên ƀon kloh ueh tâm puăn jât ma bar khay.

³ Gâp mra ăn ma bar hê nơm mbơh Gâp, khân păng nsoh ao bok ƀau jêh ri ngơi nau mbơh lor tâm du rbăn bar rhiăng prao jât nar.”

⁴ Bar hê bunuyh aơ jêng bar tơm play ôlive jêh ri bar jâng kađen dâk tanăp Kôranh Brah neh ntu.

⁵ Tơlah mbu nơm ŭch ƀư mhĭk ma bar hê bunuyh aơ, ri mơ ŭnh luh tă bơh trôm mbung khân păng mra su lơi phung rlăng khân păng; mbu nơm ŭch ƀư mhĭk ma khân păng, bunuyh nây mra khĭt tâm ban pônây.

⁶ Khân păng geh nau dơi nchăng trôk, gay ma mâu geh mih tâm lĕ nar nây khân păng ngơi nau mbơh lor; khân păng geh đŏng nau dơi tâm dak gay rgâl dak jêng mham, jêh ri sŏk ăp ntil nau rêh ni ƀư nau mhĭk ma neh ntu ăp tơ̆ khân păng ŭch.

⁷ Tơlah bar hê khân păng mbơh nkoch lôch jêh, geh mpô mpa dŭt janh hăn hao tă bơh brŏng jru, tâm lơh jêh ri păng dơi jêh ri nkhĭt khân păng.

⁸ Săk jăn bar hê khân păng mra gŭ tâm trong ƀon toyh, rnha tĭng tâm nau hôr jêng ƀon Sôdôm jêh ri n'gor Êjipt, jêng ntŭk bu pâng kđĭn Kôranh Brah khân păng ta si tâm rkăng.

⁹ Lĕ rngôch bunuyh tă bơh phung ƀon lan, phung ndŭl mpôl, lĕ nau ngơi, lĕ bri dak mra uănh ma săk jăn khân păng tâm pe nar n'gul, jêh ri mâu ăn ôh tâp brôi tâm môch.

¹⁰ Phung ƀon lan gŭ ta neh ntu răm maak ma khân păng, hâk maak njuăl ndơ ăn ma ndrăng khân păng; yorlah bar hê nơm mbơh lor nây ƀư rêh ni jêh phung gŭ tâm neh ntu.

¹¹ Jêh pe nar n'gul, n'hâm rêh luh tă bơh Brah Ndu lăp tâm bar hê khân păng jêh ri khân păng dâk sŏng, ƀư ăn phung bunuyh uănh saơ klach dŭt n'hâm ngăn.

¹² Bar hê khân păng tăng du bâr ngơi huy ngăn tă bơh trôk lah pô aơ: “Hăn hao hom ta aơ!” Bar hê khân păng hao klơ trôk tâm ndâr tŭk; jêh ri phung rlăng khân păng saơ da dê.

¹³ Nôk nây, geh du nau n'găr neh dŭt hâu ngăn; du kô̆ tâm jât ƀon toyh rlâm; pơh rbăn nuyh khĭt tâm nau n'găr neh ntu. Phung bunuyh hôm e klach krit da dê jêh ri nhhơr nau chrêk rmah ma Brah Ndu ta klơ trôk.

¹⁴ Nau rêh ni rơh bar rlau jêh; aơ, nau rêh ni rơh pe mra tât gơnh ro.

Nŭng rơh pơh

¹⁵ Tông mpăr rơh pơh uh nŭng, geh bâr dŭt nteh ngăn tă bơh ta klơ trôk lah pô aơ: “Ƀon bri hađăch neh ntu jêng ndơ Kôranh Brah he, Jêh ri Brah Krist Păng. Păng mra chiă uănh n'ho ro.”

¹⁶ Bar jât ma puăn nuyh phung kôranh bu ranh dôl gŭ ta sưng hađăch tanăp Brah Ndu, khân păng păn ta neh, yơk mbah ma Brah Ndu,

¹⁷ jêh ri lah pô aơ: “Ơ Kôranh Brah, jêng Brah Ndu Geh Lĕ Nau Brah, NƠM AɃAƠ AƠ JÊH RI GEH JÊH, Hên lah ueh ma May yorlah May djôt jêh nau dơi dŭt prêh, Jêh ri chiă uănh jêh.

¹⁸ Phung mpôl băl bunuyh ji nuih hâu ngăn; Ƀiălah nau May ji nuih tât jêh, Jêng mông phat dôih ma phung khĭt, Ăn nau nkhôm ma phung oh mon May, phung nơm mbơh lor, phung kloh ueh, Jêh ri phung klach yơk ma amoh May, Lĕ phung jê̆ nđâp ma phung toyh, Jêh ri ƀư rai phung ƀư rai neh ntu.”

¹⁹ Ngih brah Brah Ndu ta klơ trôk pơk jêh, tâm trôm saơ geh Hip Nau Tâm Rnglăp Păng, jêh nây geh lĕ lơp nglaih, bâr ngơi, nteh nglaih, nau n'găr neh jêh ri mih pler ktang.