Nau Tâm Mpơl 1 - Nau Brah Ndu Ngơi 2023

Nau ngơi dak bôk ( 1:1-20 ) Ntơm lăp

¹ Nau Yêsu Krist tâm mpơl tĭng nâm Brah Ndu ăn ma Păng gay tâm mpơl ma phung oh mon Păng lĕ nau kan bơi tât. Păng njuăl tông mpăr hăn tât gay tâm mpơl ma Y-Yôhan, oh mon Păng,

² jêng bunuyh hŏ mbơh nkoch jêh nau ngơi Brah Ndu jêh ri mbơh nkoch Brah Yêsu Krist, jêng lĕ rngôch nau păng hŏ saơ jêh.

³ Ueh maak yơh ma bunuyh răk ndrel ma phung tăng nau mbơh lor aơ jêh ri djôt prăp lĕ nau bu nchih jêh tâm nây, yorlah mông nar dăch tât.

Nau mbah jô̆ khâl ma pơh Phung Ngih Brah Ndu ta n'gor Asi

⁴ Y-Yôhan nchih samƀŭt njuăl ma phung pơh Phung Ngih Brah Ndu tâm n'gor Asi: Dăn ăn ma khân may dơn nau yô̆ jêh ri nau đăp mpăn tă bơh NƠM AɃAƠ AƠ, HŎ GEH JÊH RI DÔL VĂCH, tă bơh pơh Huêng gŭ panăp sưng hađăch Păng,

⁵ jêh ri bơh Brah Yêsu Krist jêng Nơm mbơh nkoch ma nau răp jăp, Nơm deh lor lơn tă bơh nau khĭt jêh ri Kôranh Brah ma phung hađăch ta klơ neh ntu! Nơm rŏng ma he sŏk jêh mham Păng nơm tâm rklaih jêh he bơh nau tih,

⁶ jêh ri ƀư ma he plơ̆ jêng ƀon bri hađăch, plơ̆ jêng phung kôranh ƀư brah ma Brah Ndu, Mbơ̆ Păng, khư geh nau tâm rnê jêh ri nau dơi n'ho ro! Amen.

⁷ Ri, Păng văch ndrel ma lĕ ndâr tŭk! Lĕ rngôch măt mra saơ Păng, nđâp ma phung hŏ tă ntâp Păng; lĕ rngôch ndŭl mpôl ta neh ntu mra nhĭm nhhiăng yor ma Păng. Nanê̆ di nâm kơt nây! Amen.

⁸ Kôranh Brah jêng Brah Ndu, NƠM AɃAƠ AƠ, HŎ GEH JÊH RI DÔL VĂCH, jêng Nơm Geh Lĕ Nau Brah lah pô aơ: “Gâp jêng Alpha jêh ri Ômêga.”

Nau tâm saơ ta kôdak Patmôs

⁹ Gâp jêng Y-Yôhan, nâu khân may, bunuyh tâm pă ndrel nau rêh ni, ƀon bri hađăch jêh ri nau srôih ma khân may tâm Brah Yêsu, aƀaơ aơ gâp dôl gŭ ta kôdak rnha jêng Patmôs, yor nau ngơi Brah Ndu jêh ri nau Brah Yêsu mbơh.

¹⁰ Ta nar Kôranh Brah, Brah Huêng Ueh ntrŭt ntrôl gâp jêh ri gâp tăng pakơi gâp du bâr ktang nâm bu bâr nŭng

¹¹ đă pô aơ: “Nchih hom lĕ nau may saơ tâm du ndrom samƀŭt jêh ri njuăl ma phung pơh Phung Ngih Brah Ndu ta ƀon Êphêsô, ƀon Smirna, ƀon Pergam, ƀon Thiatir, ƀon Sardis, ƀon Philađelphi jêh ri ƀon Laođisê.”

¹² Gâp n'gĭl pakơi gay uănh bâr ngơi ma gâp. Tơlah gâp n'gĭl uănh, gâp saơ pơh jâng kađen mah,

¹³ ta nklang lĕ jâng kađen geh du huê tâm ban ma Kon Bunuyh nsoh ao jâr jong, rêt ma rse mah ta ntang ntơh.

¹⁴ Bôk jêh ri sŏk Păng nglang nâm bu rsau biăp nglang nâm bu pler; măt Păng nâm bu mpiăt ŭnh;

¹⁵ jâng păng nâm bu kông tho chrêk hŏ ƀư kloh jêh tâm ŭnh năk; bâr Păng nâm bu nteh n'gôr âk n'hor dak.

¹⁶ Ti pa ma Păng djôt pơh mănh mbing; geh du mlâm đao bar măt mplônh ngăn luh tă bơh trôm mbung Păng; muh măt Păng tâm ban ma nar nchrat ang ma lĕ nau ktang.

¹⁷ Tơlah saơ Păng, gâp cha lôt ta jâng Păng nâm bu khĭt. Ƀiălah Păng pah ti ma Păng klơ gâp jêh ri lah: “Lơi klach ôh, Gâp jêng Nơm Lor Lơn jêh ri Nơm Nglĕ Dŭt,

¹⁸ jêng Nơm Rêh; Gâp hŏ khĭt, aƀaơ aơ Gâp rêh n'ho ro, djôt keh khuă Nau Khĭt jêh ri Ƀon Phung Khĭt.

¹⁹ Pôri, nchih hom lĕ nau may hŏ saơ jêh, lĕ nau geh jêh jêh ri lĕ nau mra tât kăndơ̆.

²⁰ Aơ jêng nau khlay ndâp ma pơh mănh mbing may saơ jêh tâm ti ma Gâp, jêh ri pơh jâng kađen mah: Pơh mănh mbing jêng phung tông mpăr ma phung pơh Ngih Brah Ndu, jêh ri pơh jâng ŭnh kađen jêng pơh Phung Ngih Brah Ndu.”