Nau Ntơm 9 - Nau Brah Ndu Ngơi 2023

Brah Ndu ăn nau ueh uĭn ma Y-Nôê

¹ Brah Ndu ăn nau ueh uĭn ma Y-Nôê jêh ri ma phung kon bu klâu păng. Păng lah ma khân păng: “Ăn deh hom, bĭk rơ̆ âk râk, jêh ri ƀư bêng ler neh.

² Lĕ rngôch mpô mpa klơ neh ntu, lĕ ntil sĭm klơ trôk, lĕ ntil mpa vơr klơ neh, jêh ri lĕ ntil ka tâm dak mƀŭt, mra klach ma khân may jêh ri jao tâm ti khân may da dê.

³ Moh ntil mpa rêh blau mpât nsong jêh ri geh nau rêh jêng ndơ sa ma khân may. Gâp ăn ma khân may lĕ rngôch mpa nây nâm bu Gâp hŏ ăn jêh n'ha biăp ndrêh ma khân may.

⁴ Ƀiălah khân may mâu dơi sa ôh puăch hôm e mham, jêng hôm nau rêh.

⁵ Nanê̆ Gâp mra sŏk tay mham ma nau rêh khân may. Gâp mra sŏk tay mham nĕ bơh lĕ rngôch mpô mpa jêh ri Gâp mra sŏk tay nau rêh bunuyh tă bơh băl păng, jêng tă bơh ti oh nâu păng.

⁶ Mbu moh ƀư nkhŭt mham bunuyh, Mra geh bunuyh êng ƀư nkhŭt tay mham nơm nây; Yorlah Brah Ndu njêng bunuyh Tĭng nâm rup Păng nơm.

⁷ Pôri, ăn khân may deh kon, bĭk rơ̆ âk râk, jêh ri ƀư bêng ler klơ neh.”

Brah Ndu njêng nau tâm rnglăp đah kon bunuyh

⁸ Brah Ndu lah ma Y-Nôê jêh ri phung kon bu klâu păng dôl gŭ ndrel păng pô aơ:

⁹ “Aơ, Gâp njêng nau tâm rnglăp đah khân may jêh ri noi deh khân may,

¹⁰ jêh ri lĕ rngôch mpa rêh dôl gŭ ndrel ma khân may tâm ban ntil sĭm, mpô mpa rong, mpô mpa bri, jêng lĕ rngôch mpô mpa luh tă tâm kumpăn, tâm ban đŏng lĕ rngôch mpô mpa rêh klơ neh kăndơ̆.

¹¹ Pôri Gâp ƀư nau tâm rnglăp đah khân may: Lĕ ntil nglay săk mâu mra hôm geh dak lêng ƀư rai đŏng ôh, jêh ri kŏ mâu hôm lĕ geh dak lêng ƀư rai neh ntu.”

¹² Brah Ndu lah: “Aơ jêng nau mbên ma nau tâm rnglăp n'ho ro Gâp njêng ta nklang Gâp đah khân may, đah lĕ rngôch mpa rêh dôl gŭ ndrel ma khân may, găn lĕ rngôch rô̆.

¹³ Gâp dơm bêh tŭng tĭng Gâp klơ ndâr tŭk gay ƀư nau mbên ma nau tâm rnglăp Gâp jêh ri đah rplay neh.

¹⁴ Ăp tơ̆ Gâp nthăng tŭk klơ trôk jêh ri bêh tŭng tĭng mpơl ta klơ ndâr tŭk,

¹⁵ Gâp mra kah gĭt nau tâm rnglăp Gâp hŏ ƀư đah khân may, tâm ban đŏng đah lĕ rngôch mpa rêh, lĕ ntil mlay săk, dak mâu hôm ôh mra jêng dak lêng gay ƀư rai lĕ ntil nglay săk.

¹⁶ Tơlah bêh tŭng tĭng mpơl ta klơ ndâr tŭk, Gâp uănh păng gay kah gĭt tay nau tâm rnglăp n'ho ro vah vang Brah Ndu jêh ri lĕ rngôch mpa rêh, lĕ ntil nglay săk klơ neh.”

¹⁷ Brah Ndu lah tay ma Y-Nôê: “Nây jêng nau mbên ma nau tâm rnglăp Gâp hŏ njêng jêh ta nklang Gâp jêh ri lĕ ntil nglay săk klơ neh.”

Phung kon bu klâu Y-Nôê

¹⁸ Phung kon bu klâu Y-Nôê luh tă bơh kumpăn jêng Y-Sem, Y-Cham, jêh ri Y-Japhet. Y-Cham jêng mbơ̆ Y-Kanaan.

¹⁹ Nây jêng pe phung kon bu klâu Y-Nôê, jêh ri tă bơh khân păng geh bunuyh pă gŭ lam bri neh.

Y-Nôê nhŭl ndrăng, Kanaan geh nau rtăp rak

²⁰ Y-Nôê jêng bunuyh ƀư mir. Păng jêng bunuyh dak bôk tăm tơm krăk ƀâu.

²¹ Păng nhêt ndrănh jêh ri nhŭl, jêh nây doh kho ao bê̆ch tâm nklang ngih bok păng.

²² Y-Cham, jêng mbơ̆ Y-Kanaan, saơ mbơ̆ păng bê̆ch gŭ rhôk, păng luh padih nkoch tay ma bar hê nâu păng.

²³ Y-Sem jêh ri Y-Japhet sŏk ao jong, mbăk ta săng nglik, jêh nây hăn rŭch nkơi tât ntâk an ma mbơ̆. Khân păng ndôn muh măt ta ntŭk êng yor ri mâu saơ ôh nau gŭ rhôk mbơ̆ khân păng.

²⁴ Tơlah Y-Nôê kah rngăl aih nhŭl ndrănh, păng gĭt ro moh nau kon mpô̆t hŏ ƀư jêh ma păng,

²⁵ păng lah: “Ăn Kanaan geh nau rtăp rak! Păng mra jêng dĭk ma oh nâu păng.”

²⁶ Păng hôm lah đŏng: “Yơk rnê Brah Yêhôva, jêng Brah Ndu Y-Sem; Y-Kanaan mra ƀư dĭk ma Y-Sem!

²⁷ Dăn Brah Ndu pơk huy n'har bri ma Y-Japhet, Jêh ri ăn păng gŭ tâm ngih bok Y-Sem; Bi Y-Kanaan mra ƀư dĭk ma Y-Japhet.”

²⁸ Lôch dak lêng, Y-Nôê hôm e rêh pe rhiăng prăm jât năm đŏng.

²⁹ Y-Nôê dơi rêh sĭn rhiăng prăm jât năm, jêh nây păng khĭt.