Nau Ntơm 8 - Nau Brah Ndu Ngơi 2023

Lôch dak lip

¹ Brah Ndu kah gĭt ma Y-Nôê nđâp ma lĕ rngôch mpa bri jêh ri mpô mpa rong gŭ ndrel ma păng tâm kumpăn, yor ri Păng ƀư ăn geh sial khôm klơ neh jêh ri dak hŭch.

² Lĕ tu dak brŏng toyh jêh ri mpông dak bât klơ trôk nchăng lĕ, trôk mâu hôm mih ôh.

³ Dak hŭch mbrơi bơh klơ neh. Lôch du rhiăng prăm jât nar, ri mơ dak hŭch.

⁴ Tâm nar jât mpơh, khay pơh, kumpăn nsrŭng ta yôk Ararat.

⁵ Dak hŭch grĕ grĕ n'ho tât khay jât. Nar tal nguay khay jât, lĕ n'gơn yôk ntơm mpơl.

⁶ Lôch puăn jât nar Y-Nôê pơk mpông bloh păng hŏ lôk jêh ta kumpăn,

⁷ jêh ri mƀơk du mlâm nđak. Nđak mpăr nsong dâng lơ kŏ tât neh sơh ngăn.

⁸ Păng mƀơk đŏng du mlâm sĭm plŭk gay uănh dak hŏ hŭch jêh klơ neh mâu lah mâu.

⁹ Ƀiălah sĭm plŭk joi mâu saơ geh ntŭk drâm pôri păng mpăr plơ̆ sĭt ma Y-Nôê ta kumpăn, yorlah dak hôm e nkŭm lam klơ ntu. Y-Nôê yơr ti nhŭp plŭk leo nglăp tâm kumpăn ma păng nơm.

¹⁰ Păng gŭ kâp tay pơh nar, jêh nây mƀơk đŏng plŭk luh bơh kumpăn.

¹¹ Tât kêng mhaơ, plŭk plơ̆ sĭt ta păng, jêh ri aơ, păng gleng tâm muăr păng du n'ha play ôlive hôm ndrêh! Y-Nôê gĭt dak hŏ hŭch jêh klơ neh.

¹² Păng gŭ kâp tay pơh nar đŏng, jêh nây mƀơk plŭk luh, jêh ri aƀaơ aơ plŭk mâu hôm plơ̆ sĭt đŏng ôh ma păng.

¹³ Nar lơ nguay, khay nguay, năm tal prao rhiăng ma nguay, dak lĕ suăt jêh klơ neh. Y-Nôê pơk chor kumpăn, jêh ri uănh saơ neh hŏ sơh jêh.

¹⁴ Lơ bar jât pơh khay bar, neh lĕ sơh ngăn jêh.

Y-Nôê luh bơh kumpăn

¹⁵ Brah Ndu lah ma Y-Nôê:

¹⁶ “Ăn may luh hom tă bơh kumpăn nđâp ma ur may, phung kon bu klâu may jêh ri phung ƀăn may.

¹⁷ Ngluh hom bơh kumpăn lĕ rngôch mpô mpa hŏ gŭ ndrel ma may, jêng lĕ ntil mpa rêh nâm bu sĭm, lĕ ntil mpô mpa, lĕ ntil mpa vơr klơ neh, gay ma khân păng deh kon jêh ri bĭk rơ̆ âk râk klơ neh.”

¹⁸ Pôri, Y-Nôê nđâp ur păng, phung kon bu klâu păng jêh ri phung ƀăn păng luh bơh kumpăn.

¹⁹ Lĕ rngôch mpa bri, mpa vơr klơ neh, ntil sĭm nđâp ma lĕ rngôch mpa rêh nsong klơ neh luh bơh kumpăn da dê, tĭng nâm ntil khân păng.

Y-Nôê nhhơr ndơ ƀư brah gŭch

²⁰ Rnôk nây Y-Nôê ndâk du nơng ƀư brah ma Brah Yêhôva. Păng nhŭp lĕ rngôch mpa kloh jêh ri lĕ rngôch sĭm kloh gay nhhơr ndơ ƀư brah gŭch ta klơ nơng nây.

²¹ Brah Yêhôva maak dơn nau n'hôl ƀâu kah jêh ri mĭn êng: “Gâp mâu mra rtăp rak neh ntu đŏng ôh yor ma phung bunuyh, nđâp lah nau mĭn phung bunuyh djơh mhĭk ntơm bơh păng hôm mom. Gâp mâu mra ƀư rai đŏng ôh lĕ rngôch mpa rêh tâm ban ma Gâp hŏ ƀư jêh.

²² Moh nar neh ntu hôm, Pôri yan srih ntil jêh ri nau kăch roih, yan nđik jêh ri duh, Yan vai jêh ri yan puh, nar jêh ri măng, Mâu mra lôch ôh.”