Nau Ntơm 7 - Nau Brah Ndu Ngơi 2023

Dak lêng toyh

¹ Brah Yêhôva lah ma Y-Nôê: “May jêh ri lĕ rnăk may lăp hom tâm kumpăn, yorlah tâm rô̆ aơ Gâp saơ may jêng du huê bunuyh sŏng srăng tanăp măt Gâp.

² Ăn may djôt leo hom phung mpô mpa kloh, ăp ntil pơh kôp, nkuăng jêh ri me; bi ma ntil mpô mpa mâu kloh, ăp ntil du kôp, nkuăng jêh ri me.

³ May djôt leo đŏng phung mpôl sĭm klơ trôk, ăp ntil pơh kôp, nkuăng jêh ri me, gay prăp ntil khân păng lam klơ neh.

⁴ Yorlah hôm pơh nar đŏng, Gâp mra nkhŭt dak mih jŭr ta neh tâm puăn jât nar puăn jât măng, jêh ri Gâp mra pih kloh lĕ rngôch mpa rêh bơh klơ neh, jêng ndơ Gâp hŏ njêng jêh.”

⁵ Y-Nôê ƀư tĭng nâm nau Brah Yêhôva hŏ ntăm jêh ma păng.

⁶ Y-Nôê geh prao rhiăng năm jêh rnôk dak lêng ta neh ntu.

⁷ Y-Nôê ndrel ma ur păng, phung kon bu klâu jêh ri phung ƀăn păng lăp tâm kumpăn gay ma rklaih bơh dak lêng.

⁸ Lĕ mpô mpa kloh jêh ri mâu kloh, ntil sĭm, ntil mpa vơr ta neh,

⁹ tĭng kôp, nkuăng jêh ri me, lăp tâm kumpăn da dê ndrel ma Y-Nôê, tĭng nâm nau ngơi Brah Ndu hŏ ntĭnh ntăm jêh.

¹⁰ Pơh nar pakơi, dak lêng tât lip lam klơ neh.

¹¹ Di tâm nar jât pơh, khay bar, năm prao rhiăng nôk rô̆ Y-Nôê, lĕ tu dak bơh brŏng toyh rtoh ƀhing, jêh ri lĕ mpông dak klơ trôk pơk jêh.

¹² Mih ntâng tŭp ta neh tâm puăn jât nar puăn jât măng.

¹³ Tâm nar nây đŏng, Y-Nôê jêh ri ur păng, pe nuyh kon bu klâu păng jêng Y-sem, Y-Cham jêh ri Y-Japhet, jêh ri pe nuyh ƀăn păng lăp ndrel tâm kumpăn.

¹⁴ Khân păng jêh ri lĕ rngôch mpô mpa bri tĭng nâm ntil, mpô mpa rong tĭng nâm ntil, ntil mpa vơr klơ neh tĭng nâm ntil, sĭm tĭng nâm ntil, jêng lĕ ntil geh ntĭng năr,

¹⁵ ăp kôp tĭng Y-Nôê lăp tâm kumpăn da dê. Lĕ phung nglay săk geh n'hâm nsôr,

¹⁶ nkuăng nguay me nguay, hăn lăp tâm kumpăn, di nâm nau ngơi Brah Ndu hŏ ntĭnh ntăm ma Y-Nôê. Jêh nây Brah Yêhôva nchăng mpông kumpăn.

¹⁷ Dak lêng nkŭm lam klơ neh tâm puăn jât nar. Dak hao prêh ƀư nđông kumpăn bơh klơ neh.

¹⁸ Dak lơ hao, hao dŭt prêh klơ neh, jêh ri kumpăn nđông klơ n'ha dak.

¹⁹ Dak lơ hao prêh klơ neh, prêh kŏ tât lĕ rngôch yôk prêh tâm dâng trôk dak băm da dê.

²⁰ Dak nkŭm prêh lơn lĕ n'gơn yôk tât pơh met n'gul.

²¹ Lĕ rngôch mpa rêh klơ neh khĭt da dê, ntơm bơh sĭm och, mpô mpa rong, mpô mpa bri, lĕ rngôch mpa vơr klơ neh, tât ma phung bunuyh.

²² Lĕ rngôch mpa geh n'hâm nsôr ma trôm muh, nây jêng phung mpô mpa rêh klơ neh sơh, khĭt da dê.

²³ Păng hŏ ƀư rai jêh lĕ rngôch mpa rêh klơ neh, ntơm bơh bunuyh kŏ tât ma ntil mpô mpa, ntil mpa vơr, jêh ri ntil sĭm klơ trôk. Pih kloh lĕ rngôch mpa rêh klơ neh, knŏng hôm e Y-Nôê jêh ri lĕ mpô mpa gŭ ndrel ma păng tâm kumpăn ri dơm.

²⁴ Dak nkŭm klơ neh tâm du rhiăng prăm jât nar.