Nau Ntơm 50 - Nau Brah Ndu Ngơi 2023

Nau khĭt Y-Yakôb

¹ Y-Yôsep kŭnh n'grêp măt mbơ̆ păng, chŭm n'ho nhĭm.

² Y-Yôsep đă phung kôranh dak si dôl pah kan păng, dŏng dak si ƀâu kah hŏ nkra jêh săk jăn mbơ̆ păng, jêh ri phung kôranh dak si nkra săk jăn Y-Israel.

³ Khân păng ƀư nau nây tâm puăn jât nar, yor nây jêng nar prăp nkra săk jăn. Phung ƀon lan Êjipt rngot klâng ma Y-Yakôb tâm pơh jât nar.

⁴ Lah nar rngot klâng lôch jêh, Y-Yôsep ngơi ma phung oh mon Pharaôn: “Tơlah gâp geh nau yô̆ tanăp măt khân may, dăn khân may ngơi an ma Pharaôn kơt aơ:

⁵ Mbơ̆ gâp hŏ đă gâp ton pô aơ: ‘Aơ, gâp dăch khĭt. Ăn may tâp gâp tâm môch gâp ơm lôk jêh tâm n'gor Kanaan.’ Pôri, aƀaơ, ăn gâp hăn hao ta nây gay tâp mbơ̆ gâp, jêh nây gâp mra plơ̆ tay.”

⁶ Pharaôn lah: “Hăn hom, tâp mbơ̆ may tĭng nâm nau păng hŏ đă may ton.”

⁷ Pôri, Y-Yôsep hăn tâp mbơ̆ păng ta n'gor Kanaan. Lĕ rngôch phung oh mon Pharaôn hăn ndrel ma păng, lĕ rngôch kôranh, bu ranh tâm ngih hađăch, lĕ rngôch kôranh bu ranh tâm n'gor Êjipt,

⁸ tâm ban đŏng lĕ rngôch phung ngih Y-Yôsep, phung oh nâu păng jêh ri ndŭl mpôl mbơ̆ păng. Tâm n'gor Gôsen knŏng hôm phung kon se jê̆, jêh ri phung biăp, ndrôk khân păng.

⁹ Rlau ma nây geh ndeh seh jêh ri phung rmăk ndeh seh hăn ndrel ma păng đŏng. Khân păng jêng du mpôl bunuyh âk ngăn.

¹⁰ Lah tât ta ntŭk bu mprah ba ta Atat, ta mpeh đah ri dak krong Yurdan, ta nây khân păng nhĭm nhhiăng du nau rngot toyh ngăn. Y-Yôsep ăn bu rngot rvê ma mbơ̆ păng pơh nar.

¹¹ Phung ƀon lan tâm n'gor nây, jêng phung Kanaan saơ nau rngot rvê nây tâm ntŭk mprah ba ta Atat, khân păng lah: “Aơ jêng du nau rngot rvê toyh ma phung Êjipt.” Yor ri bu rnha ntŭk nây jêng Abel Misraim, ta mpeh đah ri dak krong Yurdan.

¹² Pôri, phung kon bu klâu Y-Yakôb hŏ ƀư jêh tĭng nâm nau păng ntĭnh.

¹³ Khân păng rdeng njŭn păng plơ̆ sĭt ta n'gor Kanaan, tâp păng tâm trôm lŭ ta mir Makpêla, dăch Mamrê, Y-Abraham hŏ rvăt jêh bơh Ephrôn, bunuyh Hitit, jêng ntŭk ƀư môch.

¹⁴ Jêh tâp mbơ̆, Y-Yôsep plơ̆ sĭt ta n'gor Êjipt ndrel phung oh nâu păng nđâp lĕ rngôch bunuyh hăn ndrel tâp mbơ̆ păng.

Y-Yôsep bonh leng phung oh nâu păng

¹⁵ Phung nâu Y-Yôsep saơ mbơ̆ khân păng khĭt jêh, khân păng lah ndrăng khân păng: “Tơlah Y-Yôsep hôm e djôt prăp nau rkeh jêh ri har plơng he lĕ nau mhĭk he hŏ ƀư jêh ma păng mâm mêh?”

¹⁶ Khân păng njuăl bu đă hăn ngơi ma Y-Yôsep: “Êlor khĭt, mbơ̆ may ntĭnh jêh pô aơ:

¹⁷ ‘Ăn khân may lah ma Y-Yôsep kơt aơ: Dăn ma may yô̆ an nau tih jêh ri nau djơh hên hŏ ƀư mhĭk jêh ma may.’ Pôri, aƀaơ dăn ma may yô̆ an nau tih phung oh mon Brah Ndu mbơ̆ may.” Nôk tăng nau ngơi nây Y-Yôsep nhĭm.

¹⁸ Phung nâu păng hăn văch chon mon tanăp măt păng jêh ri lah: “Aơ, hên knŏng jêng dĭk may.”

¹⁹ Y-Yôsep ngơi ma khân păng: “Phung nâu lơi klach ôh! Ơm gâp dơi jêng Brah Ndu?

²⁰ Khân may mĭn ƀư mhĭk ma gâp, ƀiălah Brah Ndu ăn nau nây jêng nau ueh gay ƀư du nau dôl tât geh nar aơ, nâm bu ntĭt mât njrăng nau rêh ma âk bunuyh tât jêh nar aơ.

²¹ Pôri, lơi klach ôh, gâp mra siăm khân may jêh ri phung kon jê̆ khân may.” Y-Yôsep bonh leng phung nâu păng, jêh ri ngơi dêh rhêt ma phung nâu păng.

Y-Yôsep khĭt

²² Y-Yôsep jêh ri ngih mbơ̆ păng gŭ tâm n'gor Êjipt. Y-Yôsep rêh du rhiăng jât năm.

²³ Păng dơi saơ phung kon sau Y-Êphraim tât ta rô̆ tal pe, jêh ri nđâp phung kon Y-Makir, phung kon Y-Manasê, deh dơi pư ta kômâk Y-Yôsep đŏng.

²⁴ Y-Yôsep ngơi ma phung nâu păng: “Gâp dăch khĭt, ƀiălah nanê̆ ngăn Brah Ndu mra khâl khân may, njŭn leo khân may luh bơh n'gor aơ gay plơ̆ sĭt ma n'gor Păng hŏ ton jêh ma Y-Abraham, ma Y-Isăk, jêh ri ma Y-Yakôb.”

²⁵ Y-Yôsep đă phung kon sau Israel ton, lah: “Lah Brah Ndu khâl khân may, ăn khân may mra rdeng nting gâp luh bơh n'gor aơ.”

²⁶ Pôri Y-Yôsep khĭt, dơi rêh du rhiăng jât năm. Bu dŏng dak si ƀâu kah gay nkra săk jăn Y-Yôsep, jêh ri njor păng tâm băng ta n'gor Êjipt.