Nau Ntơm 49 - Nau Brah Ndu Ngơi 2023

Y-Yakôb ăn nau ueh uĭn ma phung kon bu klâu păng kêng nglĕ dŭt

¹ Y-Yakôb kuăl phung kon bu klâu păng jêh ri lah: “Rgum ndrel hom ta aơ, gâp mra lah dĭng lĕ nau mra tât ma phung khân may tâm rnôk kăndơ̆.

² Hơi phung kon bu klâu Y-Yakôb, rgum ndrel hom jêh ri iăt hom; Rkêng iăt hom ma Y-Israel, mbơ̆ khân may:

³ Hơi Y-Ruben! Kon bu klâu bôk rah gâp, Jêng nau dăng tă bơh gâp, jêng play dak bôk tâm nau dăng gâp, Geh nau kan toyh ngăn tâm nau yơk jêh ri nau dơi dŭt prêh;

⁴ Ktang tâm ban ma dak rbuh, rĭ dĭng may mâu rlau lơn mbu, Yorlah may hŏ hao klơ sưng bê̆ch mbơ̆ may Ƀư ma sưng bê̆ch mbơ̆ may ƀơ̆ ƀơch!

⁵ Y-Simêôn jêh ri Y-Lêvi jêng oh nâu. Đao khân păng jêng ndơ tâm lơh ƀư nau djơh mhĭk.

⁶ Mbơh sơm ma huêng gâp mâu ôh ndrel du trong ma khân păng, Huêng gâp mâu tâm rnglăp ôh đah phung khân păng; Yorlah tâm nau khân păng ji nuih hŏ nkhĭt jêh bunuyh, Nôk geh nau tâm ji nuih khân păng koh jêh jâng jon ndrôk nkuăng.

⁷ Di bu rak rtăp ma nau khân păng ji nuih, yorlah păng dŭt janh ƀai ngăn! Di bu rak rtăp ma nau khân păng ji nuih, yorlah nau nây djơh mhĭk ngăn! Gâp mra nkhah khân păng du luh tă ngih Y-Yakôb, Jêh ri mprơh khân păng bơh tâm phung ƀon lan Israel.

⁸ Y-Yuđa! Phung oh nâu may mra tâm rnê ma may, Ti may mra kuăn trô ko phung rlăng may, Phung kon bu klâu gâp mra chon mbah tanăp măt may.

⁹ Y-Yuđa! May jêng du huê kon yau mŭr; Hơi nâu! Hăn nchron geh jêh ăn may hăn sĭt. Păng chon mon, gŭ mơch nâm bu yau mŭr nkuăng, Jêh ri tâm ban yau mŭr me. Mbu nănh lôr rkhŭk păng?

¹⁰ Mâng jra hađăch mâu mra ngai ôh bơh Y-Yuđa, Mâng jra chiă uănh mâu ngai bơh jâng păng, Kŏ tât nôk Nơm Silô văch, Jêh ri phung ƀon lan tông bâr Nơm nây.

¹¹ Păng kât kon seh bri păng ta tơm krăk ƀâu, Jêh ri kât kon seh bri păng ta n'gĭng tơm krăk ƀâu nse ueh ngăn. Păng mra pih kho ao păng tâm ndrănh krăk ƀâu, Jêh ri pih ao păng tâm mham play krăk ƀâu.

¹² Măt păng chăng lơn ma ndrănh krăk ƀâu, Sêk păng nglang lơn ma dak toh.

¹³ Y-Sabulôn mra rêh ta kơh dak mƀŭt, Ntŭk nde krap ma phung kumpăn; N'har bri păng mra tât mpeh ma Sidôn.

¹⁴ Y-Isakar jêng du mlâm seh bri dăng ngăn, Gŭ rlu ta nklang ndrung;

¹⁵ Păng saơ jêh ntŭk rlu ueh reh ngăn, Jêh ri bri dak dŭt ueh ngăn. Rĭ dĭng păng hŏ nkêng jêh săng nglik păng gay mbăk tay ndơ jâk, Jêh ri pah kan hŏt tâm ban bunuyh dĭk bu.

¹⁶ Y-Dan mra phat dôih phung ƀon lan păng, Nâm bu nguay tâm phung mpôl băl Israel.

¹⁷ Y-Dan mra jêng du mlâm bêh ta meng trong, Du mlâm bêh kăch rŏ trong jê̆, Kăp ndơl jâng seh, Ƀư ăn ma nơm ncho seh prah rlăm ƀlêr.

¹⁸ Ơ Brah Yêhôva! Gâp gŭ kâp nau May sâm rklaih!

¹⁹ Du phung tahan mra lơh Y-Gat, Ƀiălah păng đŏng mra lơh tay jêh ri hăn tĭng phung tahan nây.

²⁰ Y-Aser ndrŏng geh ndơ sông sa dŭt kah, Păng mra ăn ndơ sông sa kah ma hađăch.

²¹ Y-Naptali jêng du mlâm jun me mƀơk ling Deh phung kon jun ueh reh.

²² Y-Yôsep jêng du n'gĭng tơm si play âk ngăn, N'gĭng tơm si geh play âk ta kơh dak n'hor; N'gĭng păng nkŭm ta klơ pêr.

²³ Lĕ rngôch bunuyh djôt na hŏ rduh lơh păng hô ngăn Pănh ma hăr jêh ri ƀư nkrit păng.

²⁴ Ƀiălah rnơm bơh ti Nơm Geh Nau Brah bơh Y-Yakôb, Ƀiălah na păng hôm e dăng; Rnơm tă bơh Nơm Rmăk Biăp, jêng Lŭ Toyh ma phung Israel Bar đah ti păng hôm ngăch ngăn.

²⁵ Brah Ndu mbơ̆ may mra kơl may; Nơm Geh Lĕ Nau Brah mra ăn nau ueh uĭn ma may, Jêng nau ueh lăng bơh klơ trôk jŭr, Nđâp nau ueh lăng bơh dak jru tâm dâng hao dŭl klơ, Nau ueh lăng bơh toh me jêh ri bơh rsok rtat.

²⁶ Nau ueh lăng bơh mbơ̆ ăn ma may Toyh lơn lĕ nau ueh lăng bơh chô yau ăn ma gâp, Rlau klơ lĕ n'gơn yôk bơh rbăn năm kăl e. Ăn lĕ nau ueh lăng aơ gŭ ta klơ bôk Y-Yôsep, Ta ndăr kleng kon hađăch nklang phung oh nâu păng.

²⁷ Y-Benjamin jêng du mlâm so bri vay ŭch sa hêk; Kêng ôi păng sa mpa păng kăp, Kêng mhaơ păng tâm pă ndơ păng pit in.”

²⁸ Nây jêng jât ma bar ndŭl mpôl phung Israel jêh ri dĭng lĕ nau mbơ̆ khân păng hŏ ngơi jêh ma khân păng nôk păng ăn nau ueh uĭn ma khân păng, ăp nơm geh du nau ueh uĭn êng êng.

Y-Yakôb khĭt

²⁹ Jêh nây Y-Yakôb ntĭnh ma phung kon păng: “Gâp dăch plơ̆ sĭt gŭ nsum ma chô yau gâp. Ăn phung khân may tâp hom gâp ta meng phung chô yau gâp, tâm trôm lŭ ta mir Y-Ephrôn, bunuyh Hitit,

³⁰ jêng trôm lŭ tâm mir Makpêla, dăch Mamrê, tâm n'gor Kanaan, ntŭk Y-Abraham hŏ rvăt jêh bơh Y-Ephrôn, bunuyh Hitit, gay geh ntŭk ƀư môch.

³¹ Ta nây, bu hŏ tâp jêh Y-Abraham jêh ri H'Sara ur păng, Y-Isăk jêh ri H'Rêbêka ur păng, jêh ri ta nây đŏng gâp hŏ tâp jêh H'Lêa.

³² Mir jêh ri trôm lŭ ta nây bu hŏ rvăt jêh bơh ndŭl mpôl Het.”

³³ Lah Y-Yakôb lôch jêh ntĭnh ma phung kon păng, Y-Yakôb rhuăt jâng păng lâng tay klơ sưng bê̆ch, jêh nây tăch n'hâm, jêh ri hăn gŭ nsum ma chô yau păng.