Nau Ntơm 48 - Nau Brah Ndu Ngơi 2023

Y-Yakôb ăn nau ueh uĭn ma bar hê kon bu klâu Y-Yôsep

¹ Jêh nau nây, bu mbơh ma Y-Yôsep: “Mbơ̆ may ji.” Pôri Y-Yôsep leo bar hê kon bu klâu păng jêng Y-Manasê jêh ri Y-Êphraim hăn ndrel ma păng tât khâl Y-Yakôb.

² Nôk Y-Yakôb tăng bu mbơh: “Kon bu klâu may Y-Yôsep văch khâl may,” Y-Israel srôih dâk gŭ ta sưng bê̆ch.

³ Y-Yakôb lah ma Y-Yôsep: “Brah Ndu Geh Lĕ Nau Brah tâm mpơl jêh ri ăn nau ueh uĭn ma gâp ta Lus, tâm n'gor Kanaan.

⁴ Păng lah: ‘Aơ, Gâp mra ăn may bĭk rơ̆ dŭt âk. Gâp mra ăn may jêng du phung mpôl băl glom âk phung ƀon lan jêh ri ăn ma noi deh may n'gor aơ jêng drăp ndơn n'ho ro.’

⁵ Aƀaơ aơ, bar hê kon bu klâu bu hŏ deh ăn ma may tâm Êjipt êlor gâp hăn tât ma may, jêng Y-Êphraim jêh ri Y-Manasê, mra jêng kon gâp tâm ban ma Y-Ruben jêh ri Y-Simêôn.

⁶ Bi phung kon may deh pakơi mra jêng kon may. Khân păng mra dơn drăp ndơn tâm amoh bar hê nâu khân păng.

⁷ Yorlah nôk tă bơh Padan plơ̆ sĭt tâm n'gor Kanaan gâp geh nau rngot dôl saơ H'Rachel khĭt rŏ trong. Gâp tâp mê̆ may rŏ trong hăn tât ta Êphrata (jêng Ƀêtlêhem).”

⁸ Nôk saơ phung kon bu klâu Y-Yôsep, Y-Israel ôp: “Mbu moh phung aơ?”

⁹ Y-Yôsep ơh: “Aơ jêng phung kon bu klâu Brah Ndu ăn jêh ma gâp ta n'gor aơ.” Y-Israel lah: “Ăn khân păng văch ta aơ gay gâp ăn nau ueh uĭn ma khân păng.”

¹⁰ Yorlah ranh jêh, măt Y-Israel ngo jêh, mâu hôm dơi saơ ôh. Y-Yôsep ăn kon păng hăn dăch Y-Israel. Păng ut jêh ri chŭm.

¹¹ Y-Israel lah ma Y-Yôsep: “Gâp mĭn mâu hôm dơi saơ ôh muh măt may, ƀiălah aƀaơ Brah Ndu ăn gâp dơi saơ lĕ noi deh may đŏng.”

¹² Y-Yôsep sŏk pư bar hê kon bu klâu păng luh bơh kômâk mbơ̆ păng, jêh nây păn muh măt ta neh.

¹³ Y-Yôsep leo bar hê kon se hăn dăch mbơ̆ păng. Ti ma păng têk Y-Êphraim mpeh pa chiau mbơ̆ păng, kay ti chiau păng têk Y-Manasê mpeh pa ma mbơ̆ păng.

¹⁴ Ƀiălah Y-Israel yơr ti pa ma jêh ri dơm ta bôk Y-Êphraim, jêng nơm jê̆, kay ti pa chiau dơm ta bôk Y-Manasê. Păng mplăch ti nđâp lah Y-Manasê jêng kon bôk rah.

¹⁵ Jêh nây păng ăn nau ueh uĭn ma Y-Yôsep: “Ơ Brah Ndu Chô yau gâp jêng Y-Abraham jêh ri Y-Isăk hŏ yơk mbah, Jêng Brah Ndu nơm mât mơh gâp Bơh nôk gâp mhe pơ deh kŏ tât nar aơ,

¹⁶ Jêng Tông Mpăr hŏ rklaih jêh gâp bơh lĕ nau mhĭk, Dăn Kôranh Brah ăn nau ueh uĭn ma bar hê kon se aơ, Ăn khân păng sŏk amoh gâp Jêh ri chô yau gâp jêng Y-Abraham jêh ri Y-Isăk. Ăn ma khân păng jêng bĭk rơ̆ âk râk klơ neh ntu!”

¹⁷ Lah Y-Yôsep saơ mbơ̆ păng dơm ti pa ma ta bôk Y-Êphraim, păng mâu maak ôh, rĭ dĭng păng kuăn ti mbơ̆ păng mplăch tă bơh bôk Y-Êphraim ăn ta bôk Y-Manasê.

¹⁸ Y-Yôsep lah: “Hơi mbơ̆, mâu di ôh kơt nây. Nơm aơ jêng kon bôk rah, dăn mbơ̆ dơm ti ma ta bôk păng.”

¹⁹ Ƀiălah mbơ̆ păng dun jêh ri lah: “Hơi kon, mbơ̆ gĭt rah vah ngăn. Y-Manasê mra dơi jêng du phung ƀon lan jêh ri păng mra jêng toyh đŏng. Ƀiălah oh păng mra jêng toyh lơn ma păng jêh ri noi deh oh păng mra dơi jêng âk mpôl băl bunuyh.”

²⁰ Nar nây, păng ăn nau ueh uĭn ma bar hê kon se: “Phung Israel mra sŏk amoh bar hê kon se jê̆ gay ăn nau ueh uĭn ndrăng khân păng pô aơ: ‘Dăn Brah Ndu ƀư ma may tâm ban ma Y-Êphraim jêh ri Y-Manasê!’” Pôri, Y-Yakôb dơm Y-Êphraim jêng lor lơn ma Y-Manasê.

²¹ Y-Israel lah tay ma Y-Yôsep: “Aơ, gâp dăch khĭt, ƀiălah Brah Ndu mra kâp kơl jêh ri njŭn leo đŏng khân may sĭt ta n'gor phung che khân may.

²² Êng may, gâp mra ăn ma may du kô̆ âk lơn ma phung oh nâu may, nây jêng n'gor yôk Sichem gâp sŏk tă bơh ti phung Amôrit ma đao jêh ri na gâp.”