Nau Ntơm 47 - Nau Brah Ndu Ngơi 2023

Rnăk vâl Y-Yakôb dăn mâp đah Pharaôn. – Gŭ ƀon ta Gôsen

¹ Y-Yôsep hăn mbơh ma Pharaôn, lah: “Mbơ̆ gâp jêh ri phung oh nâu lĕ tât tă bơh n'gor Kanaan, nđâp ma biăp, ndrôk, jêh ri lĕ rngôch ndơ khân păng geh. Aƀaơ ri khân păng dôl gŭ ta Gôsen.”

² Păng săch prăm nuyh tâm phung nâu oh păng jêh ri njŭn tât tâm mâp đah Pharaôn.

³ Pharaôn ôp: “Moh kan khân may ƀư?” Khân păng ơh: “Phung oh mon hađăch jêng phung chiăp biăp tâm ban chô yau hên hŏ ƀư jêh.”

⁴ Jêh nây ngơi tay: “Hên tât gay gŭ njưh tâm n'gor aơ, yorlah ta Kanaan mâu hôm geh ôh mir gơ̆ ma mpô mpa jêh ri nau sa sât ji ngot jêng lơ hô lơn. Pôri, dăn ma hađăch ăn phung oh mon may gŭ tâm n'gor Gôsen.”

⁵ Pharaôn lah ma Y-Yôsep: “Mbơ̆ may jêh ri phung oh nâu may tât jêh ma may.

⁶ N'gor Êjipt dôl gŭ panăp măt may, ăn mbơ̆ may jêh ri phung oh nâu may gŭ tâm ntŭk dŭt ueh tâm n'gor aơ. Ăn khân păng gŭ tâm n'gor Gôsen. Tơlah may gĭt tâm phung khân păng geh bunuyh gĭt blau jao ma păng chiăp rong lĕ phung mpô mpa gâp.”

⁷ Jêh nây, Y-Yôsep njŭn Y-Yakôb mbơ̆ păng tât tâm mâp đah Pharaôn. Y-Yakôb ăn nau ueh uĭn ma Pharaôn.

⁸ Pharaôn ôp ma Y-Yakôb: “Ndah hŏ năm deh may?”

⁹ Y-Yakôb plơ̆ lah ma Pharaôn: “Dĭng lĕ năm nau rêh gâp ta neh ntu geh du rhiăng pe jât năm. Lĕ năm gâp dơi rêh jê̆ lê̆ jêh ri hŏt rgănh, jêh ri mâu ban ôh nau rêh bơh chô yau gâp ta neh ntu.”

¹⁰ Y-Yakôb ăn nau ueh uĭn ma Pharaôn jêh nây hăn du luh tă bơh păng.

¹¹ Tĭng nâm Pharaôn ntăm jêh, Y-Yôsep ăn ntŭk gŭ ma mbơ̆ păng jêh ri phung oh nâu păng, ăn neh ma khân păng ƀư drăp ndơn tâm n'gor Êjipt, tâm nkual Ramsê.

¹² Y-Yôsep ăn ndơ sông sa ma mbơ̆ păng, phung oh nâu jêh ri lĕ rngôch bunuyh tâm ngih mbơ̆ păng, tĭng nâm rnoh kon sau khân păng.

Trong dăp chiă uănh bơh Y-Yôsep

¹³ Mâu geh ôh ndơ sông sa tâm lam n'gor, yorlah nau sa sât ji ngot rêh ni ngăn. Lĕ n'gor Êjipt jêh ri Kanaan ntơm lĕ huăr rvet da dê yor nau sa sât ji ngot.

¹⁴ Y-Yôsep bun jêh lĕ prăk geh tâm n'gor Êjipt jêh ri n'gor Kanaan, jêng prăk bu rvăt ba, jêh nây Y-Yôsep njŭn prăk nây nglăp tâm jay prăp ndơ Pharaôn.

¹⁵ Lah dâk lĕ jêh prăk tâm n'gor Êjipt jêh ri n'gor Kanaan, lĕ rngôch phung Êjipt hăn tât ma Y-Yôsep jêh ri dăn: “Ăn ndơ sông sa ma hên. Moh khlay hên khĭt tanăp măt may, yorlah hên hŏ lĕ jêh prăk?”

¹⁶ Y-Yôsep ơh: “Tơlah khân may mâu geh ôh prăk, djôt leo mpô mpa khân may tât ta aơ, gâp mra rgâl ndơ sông sa ma khân may jêh ri sŏk mpô mpa.”

¹⁷ Phung ƀon lan njŭn mpô mpa ma Y-Yôsep. Y-Yôsep rgâl ndơ sông sa ma seh, ma biăp, ma ndrôk, jêh ri ma seh bri. Năm nây, păng ăn ndơ sông sa ma khân păng jêh ri rgâl ma lĕ rngôch phung mpô mpa khân păng.

¹⁸ Năm nây lĕ jêh, tât năm taơ khân păng hăn tay ma Y-Yôsep jêh ri lah: “Hên mâu hôm pôn ôh ma kôranh hên, prăk hên hŏ lĕ jêh, phung mpô mpa lĕ jao jêh ma kôranh. Aƀaơ aơ, tâm ban may saơ, hên mâu hôm ôh hôm, knŏng săk jăn jêh ri neh lŏ hên.

¹⁹ Moh khlay ăn hên khĭt jêh ri mâm neh lŏ hên jêng rngol dơm tra năp măt may? Dăn may sŏk ndơ sông sa gay rvăt hên jêh ri neh hên. Hên nđâp neh hên mra ƀư dĭk ma Pharaôn. Ăn ma hên găr ntil gay ma hên dơi rêh mâu ăn ôh khĭt, jêh ri neh mâu ôh chalơi dơm.”

²⁰ Y-Yôsep rvăt lĕ rngôch neh lŏ tâm n'gor Êjipt ma Pharaôn. Yorlah nau sa sât ji ngot rêh ni ngăn kŏ tât lĕ rngôch phung Êjipt tăch lŏ sre khân păng; pôri neh jêng drăp Pharaôn da dê.

²¹ Bi bunuyh ƀon lan, păng njêng khân păng jêng dĭk tă bơh bôl n'har bri đah aơ tât bôl n'ha bri đah ri tâm n'gor Êjipt.

²² Ƀiălah, Y-Yôsep mâu rvăt ôh neh phung kôranh ƀư brah, yorlah phung kôranh ƀư brah geh Pharaôn kơl an du kô̆ tâm ndơ sông sa. Khân păng dơi rêh yor geh ndơ sông sa tă bơh Pharaôn de kơl an rĭ dĭng khân păng mâu tăch ôh neh khân păng.

²³ Y-Yôsep lah ma phung ƀon lan: “Nar aơ gâp hŏ rvăt jêh khân may jêh ri neh khân may ăn ma Pharaôn. Aơ jêng găr ntil ma khân may tuch tâm neh nây.

²⁴ Tât yan kăch, khân may ăn du kô̆ tâm prăm ma Pharaôn, bi ma puăn kô̆ ri ma khân may nơm gay jêng găr ntil jêh ri ndơ sông sa ma khân may, ma phung tâm ngih jêh ri ma phung kon khân may.”

²⁵ Phung ƀon lan lah: “May rklaih an jêh nau rêh hên! Hên ŭch ƀư maak ma may, jêh ri mra ƀư dĭk ma Pharaôn.”

²⁶ Pôri Y-Yôsep njêng du nau vay dăp ma neh ntu ta n'gor Êjipt, n'ho hôm tât aƀaơ, ăn ma Pharaôn du kô̆ tâm prăm ndơ khân păng geh. Knŏng neh phung kôranh ƀư brah mâu ôh jêng drăp Pharaôn.

Nar nglĕ dŭt tâm nau rêh Y-Yakôb

²⁷ Pôri Y-Israel gŭ tâm nkual Gôsen, ta n'gor Êjipt. Phung kon sau păng hŏ ndâk njêng drăp ndơn ta nây jêh ri ăn bĭk rơ̆ âk ngăn.

²⁸ Y-Yakôb gŭ rêh ta n'gor Êjipt geh jât mpơh năm, dơi rêh du rhiăng puăn jât mpơh năm.

²⁹ Bơi dăch tât nar khĭt, Y-Israel kuăl Y-Yôsep, kon bu klâu păng jêh ri lah: “Lah may klâng gâp, ăn may dơm hom ti may tâm dâng kuang gâp, sŏk nau ueh jêh ri nau nanê̆ ngăn gay ton ma gâp lơi tâp ôh gâp tâm n'gor Êjipt.

³⁰ Ƀiălah nôk gâp hŏ plơ̆ sĭt ndrel ma phung chô yau gâp, may njŭn leo hom gâp luh bơh n'gor Êjipt, tâp gâp ta meng môch chô yau gâp.” Y-Yôsep ơh: “Gâp mra ƀư tĭng nâm nau may ntĭnh.”

³¹ Y-Yakôb lah: “May ton hom ma gâp.” Y-Yôsep ton ro ma păng. Y-Israel chon mon ro ta bôk sưng bê̆ch păng.