Nau Ntơm 46 - Nau Brah Ndu Ngơi 2023

Brah Ndu tâm mpơl ma Y-Yakôb

¹ Y-Israel hăn trong, djôt leo lĕ rngôch drăp ndơ. Dôl tât ta Bêr-Sêba, păng nhhơr mpa ƀư brah ma Brah Ndu mbơ̆ păng, Y-Isăk.

² Tâm du măng, Brah Ndu ngơi ma Y-Israel bơh nau tâm saơ. Păng kuăl: “Y-Yakôb, Y-Yakôb!” Y-Israel ơh: “Gâp ta aơ.”

³ Brah Ndu lah: “Gâp jêng Brah Ndu, Brah Ndu mbơ̆ may. Lơi klach ôh dôl hăn trŭnh ta Êjipt, yorlah ta nây Gâp mra ƀư ma may jêng du mpôl băl toyh.

⁴ Gâp mra hăn trŭnh ndrel ma may ta Êjipt, jêh ri Gâp mra leo may plơ̆ sĭt. Ti Y-Yôsep mra n'grêp măt may.”

Y-Yakôb hăn trŭnh ta Êjipt

⁵ Y-Yakôb hăn luh bơh Bêr-Sêba. Phung kon bu klâu Y-Israel jêng Y-Yakôb, leo mbơ̆ khân păng, phung kon se jêh ri phung ur khân păng ncho ndeh seh Pharaôn njuăl jêh gay ma rdeng khân păng.

⁶ Khân păng djôt leo mpô mpa rong jêh ri drăp ndơ khân păng hŏ njêng jêh tâm n'gor Kanaan hăn trŭnh ta Êjipt.

⁷ Pôri, Y-Yakôb jêh ri lĕ noi deh păng glom phung kon bu klâu, phung sau bu klâu, phung kon bu ur, phung sau bu ur, hăn trŭnh ndrel ta Êjipt.

Rnăk vâl Y-Yakôb

⁸ Aơ jêng amoh phung kon Y-Israel, jêng Y-Yakôb jêh ri noi deh păng, lĕ tât ta Êjipt: Y-Ruben jêng kon bu klâu bôk rah Y-Yakôb.

⁹ Phung kon bu klâu Y-Ruben jêng Y-Hanŏk, Y-Palu, Y-Hêsron, jêh ri Y-Karmi.

¹⁰ Phung kon bu klâu Y-Simêôn jêng Y-Jêmuêl, Y-Jamin, Y-Ôhat, Y-Jakin, Y-Sôhar, jêh ri Y-Sôl, kon bu klâu bu ur Kanaan.

¹¹ Phung kon bu klâu Y-Lêvi: Y-Gersôn, Y-Kôhat jêh ri Y-Mêrari.

¹² Phung kon bu klâu Y-Yuđa jêng Y-Er, Y-Ônan, Y-Sêla, Y-Pêres jêh ri Y-Sêra. Ƀiălah Y-Er jêh ri Y-Ônan khĭt jêh ta Kanaan. Phung kon bu klâu Y-Pêres jêng: Y-Hêsron jêh ri Y-Hamul.

¹³ Phung kon bu klâu Y-Isakar jêng: Y-Tôla, Y-Puva, Y-Yôp jêh ri Y-Simrôn,

¹⁴ Phung kon bu klâu Y-Sabulôn jêng: Y-Sêret, Y-Êlon jêh ri Y-Jalêel.

¹⁵ Nây jêng phung kon bu klâu H'Lêa deh ăn ma Y-Yakôb ta Padan-Aram, nđâp ma H'Dina kon bu ur păng. Ntop lĕ phung sau păng jêng pe jât mpe nuyh.

¹⁶ Phung kon bu klâu Y-Gat jêng: Y-Sipiôn, Y-Hagi, Y-Suni, Y-Êsbôn, Y-Êri, Y-Arôdi jêh ri Y-Arêli.

¹⁷ Phung kon bu klâu Y-Aser jêng: Y-Imna, Y-Isva, Y-Isvi, jêh ri Y-Bêria. Oh bu ur khân păng jêng H'Sêra. Phung kon bu klâu Y-Bêria jêng: Y-Hêber jêh ri Y-Malkiêl.

¹⁸ Nây jêng phung kon bu klâu H'Silpa, nơm Y-Laban ăn hăn tĭng kơl kan ma H'Lêa, kon bu ur păng. H'Silpa deh phung nây ma Y-Yakôb. Lĕ rngôch jât mprao nuyh.

¹⁹ Phung kon bu klâu H'Rachel, ur Y-Yakôb jêng: Y-Yôsep jêh ri Y-Benjamin.

²⁰ Ta bri Êjipt, Y-Yôsep geh jêh phung kon bu klâu jêng Y-Manasê jêh ri Y-Êphraim. Nây jêng phung kon bu klâu H'Asênat, kon bu ur Y-Pôtipêra, kôranh ƀư brah ƀon Ôn, deh ăn ma Y-Yôsep.

²¹ Phung kon bu klâu Y-Benjamin jêng: Y-Bêla, Y-Bêker, Y-Asbel, Y-Gêra, Y-Naaman, Y-Êhi, Y-Rôs, Y-Nupim, Y-Hupim, jêh ri Y-Ardơ.

²² Nây jêng phung kon bu klâu H'Rachel deh ăn ma Y-Yakôb. Ntop phung sau, lĕ rngôch jêng jât mpuăn nuyh.

²³ Kon bu klâu Y-Dan jêng: Y-Husim,

²⁴ Phung kon bu klâu Y-Naptali jêng: Y-Jasêel, Y-Guni, Y-Jêser, jêh ri Y-Silem.

²⁵ Nây jêng phung kon bu klâu bơh H'Bilha, nơm Y-Laban hŏ ăn hăn tĭng kơl kan ma H'Rachel, kon bu ur păng, phung nây H'Bilha deh ăn ma Y-Yakôb. Kơp ntop phung sau, lĕ rngôch jêng pơh nuyh.

²⁶ Lĕ rngôch phung bunuyh nđâp Y-Yakôb hăn trŭnh ta Êjipt, jêng noi mpôl păng, mâu geh ôh kơp phung ƀăn Y-Yakôb, jêng prao jât mprao nuyh.

²⁷ Phung kon bu klâu Y-Yôsep hŏ deh jêh ta Êjipt jêng bar hê. Pôri, lĕ rngôch phung bunuyh ngih Y-Yakôb hăn tât ta Êjipt jêng pơh jât nuyh.

Y-Yôsep kâp chuă mbơ̆ păng

²⁸ Y-Yakôb njuăl Y-Yuđa hăn lor tât ta Y-Yôsep gay Y-Yôsep leo trong hăn ta Gôsen. Nôk khân păng tât ta nkual Gôsen,

²⁹ Y-Yôsep hŏ ndrăp lor ndeh seh jêh ri hăn ta Gôsen gay chuă Y-Israel, mbơ̆ păng. Saơ jêh mbơ̆ păng, păng ut ra-u ta trô ko n'ho nhĭm du ndruh jong.

³⁰ Y-Israel lah ma Y-Yôsep pô aơ: “Aƀaơ aơ lah gâp khĭt kađôi lĕ, yorlah gâp lĕ saơ jêh muh măt may jêh ri gĭt may hôm e rêh.”

³¹ Y-Yôsep lah ma phung nâu oh păng jêh ri ma phung ngih mbơ̆ păng: “Gâp mra mbơh ma Pharaôn gĭt: ‘Phung nâu oh jêh ri lĕ rnăk vâl mbơ̆ gâp bơh Kanaan tât jêh ma gâp.

³² Phung nây jêng phung rmăk biăp, khân păng rong mpô mpa. Khân păng djôt leo jêh phung biăp, ndrôk jêh ri lĕ rngôch drăp ndơ khân păng geh.’

³³ Pôri lah Pharaôn kuăl khân may jêh ri ôp: ‘Moh kan khân may ƀư?’

³⁴ ăn khân may lah: ‘Ntơm bơh dôl hôm ndăm tât aƀaơ aơ, phung oh mon hađăch knŏng phung rong mpô mpa tâm ban chô yau hên.’ Ngơi hom kơt nây gay ma khân may dơi gŭ ta n'gor Gôsen, yorlah phung ƀon lan Êjipt vay mưch rmot phung rmăk biăp.”