Nau Ntơm 45 - Nau Brah Ndu Ngơi 2023

Y-Yôsep ăn nâu oh gĭt năl păng

¹ Rnôk nây, Y-Yôsep mâu hôm dơi ăt ôh nuih n'hâm păng tanăp măt lĕ phung kơl kan gŭ jŭm păng, jêh ri păng nter: “Ăn lĕ bunuyh du luh bơh aơ!” Yor ri, mâu hôm geh ôh du huê bunuyh gŭ ndrel ma păng, dôl Y-Yôsep ăn phung oh nâu păng gĭt năl păng.

² Păng nhĭm huy kŏ tât phung Êjipt jêh ri phung ta ngih Pharaôn tăng lĕ.

³ Y-Yôsep lah ma phung oh nâu păng: “Gâp jêng Y-Yôsep! Mbơ̆ gâp hôm e rêh lĕ?” Ƀiălah tanăp măt Y-Yôsep, phung oh nâu păng klach ngăn, mâu dơi ôh luh ngơi ma păng.

⁴ Y-Yôsep lah: “Dăn ma khân may văch dăch ta gâp.” Khân păng hăn dăch. Păng lah: “Gâp jêng Y-Yôsep, nơm khân may tăch jêh tâm n'gor Êjipt.

⁵ Ƀiălah aƀaơ aơ, khân may lơi rngot rvê jêh ri mâu lĕ dơi nduyh ma khân may nơm, yorlah khân may tăch jêh gâp ta aơ. Yorlah Brah Ndu prơh jêh gâp hăn tât ta aơ lor ma khân may gay tâm rklaih nau rêh.

⁶ Nau sa sât ji ngot tâm n'gor lĕ geh bar năm jêh, jêh ri hôm e prăm năm mâu mra jik tuch, mâu lah kăch roih đŏng ôh.

⁷ Brah Ndu njuăl gâp văch ta aơ lor ma khân may gay prăp ma khân may du noi deh tâm neh ntu, jêh ri gay rklaih nau rêh khân may ma du nau rklaih toyh.

⁸ Pôri mâu geh ôh khân may ƀiălah Brah Ndu nơm njuăl gâp văch ta aơ. Păng ăn gâp jêng mbơ̆ Pharaôn, jêng kôranh ma lĕ ngih hađăch, jêh ri chiă uănh lĕ n'gor Êjipt.

⁹ Khân may gơnh oi plơ̆ sĭt mâp mbơ̆ gâp jêh ri lah: ‘Y-Yôsep, kon may, lah pô aơ: Brah Ndu hŏ njêng gâp jêng kôranh ma lĕ n'gor Êjipt. Dăn may hăn trŭnh ta gâp, lơi hôm gŭ kâp ôh.

¹⁰ May mra gŭ tâm n'gor Gôsen jêh ri gŭ dăch gâp. May mra gŭ ndrel phung kon, phung kon sau, phung biăp, phung ndrôk, jêh ri lĕ rngôch ndơ may geh.

¹¹ Ta nây gâp mra siăm may, yorlah hôm prăm năm sa sât ji ngot. Yor nây, may ngih may, jêh ri lĕ rngôch mpa rong may mâu mra geh ôh nau ji ngot ji hir.’

¹² Phung nâu jêh ri oh Y-Benjamin hŏ saơ jêh ma bâr Y-Yôsep nơm ngơi ma phung oh nâu nây.

¹³ Khân may nkoch hom bri ma mbơ̆ gâp iăt lĕ nau chrêk ma lơp gâp ta Êjipt tâm ban đŏng lĕ nau khân may saơ jêh, jêh nây gơnh oi leo mbơ̆ gâp jŭr ta aơ.”

¹⁴ Lah lôch jêh, Y-Yôsep ut Y-Benjamin, oh păng, jêh ri nhĭm. Y-Benjamin ut ta trô ko nâu păng đŏng jêh ri nhĭm.

¹⁵ Jêh nây, Y-Yôsep chŭm lĕ rngôch phung oh nâu păng jêh ri nhĭm. Jêh nây, phung oh nâu păng ngơi ndrel đah păng.

Pharaôn ndrăp ran chuă vơt rnăk vâl Y-Yôsep

¹⁶ Lah nau nây tăng tât tôr tâm ngih Pharaôn: “Phung oh nâu Y-Yôsep hŏ tât jêh,” Pharaôn jêh ri phung oh mon păng răm rhơn da dê.

¹⁷ Pharaôn lah ma Y-Yôsep: “Lah ma phung oh nâu may ƀư nau aơ: ‘Dăp hom ndơ klơ seh bri jêh ri plơ̆ sĭt ta n'gor Kanaan

¹⁸ njŭn leo mbơ̆ jêh ri rnăk vâl khân may hăn trŭnh gay gŭ ndrel gâp. Gâp mra ăn ma khân may ndơ dŭt ueh tâm n'gor Êjipt, jêh ri khân may mra dơn sa play ueh lơn tâm n'gor.’

¹⁹ Bi may lah tay ma khân păng pô aơ: ‘Ăn djôt leo ndeh seh tă bơh n'gor Êjipt gay rdeng kon jê̆, ur khân may jêh ri njŭn leo mbơ̆ khân may hăn trŭnh ta aơ.

²⁰ Lơi hôm nhhuach ôh ma drăp ndơ khân may, yorlah lĕ rngôch ndơ dŭt ueh tâm n'gor Êjipt mra jêng ndơ khân may.’”

²¹ Phung kon bu klâu Israel hŏ ƀư di pônây. Y-Yôsep ƀư tĭng nâm nau trŭnh ăn ma Pharaôn ntăm ma phung oh nâu păng ndeh seh nđâp ma ndơ sông sa tâm nôk khân păng hăn trong.

²² Y-Yôsep ăn ma ăp nơm kho ao, bi Y-Benjamin păng ăn pe rhiăng rnglay prăk jêh ri prăm gu kho ao.

²³ Păng njuăl ma mbơ̆ păng jât mlâm seh bri rdeng bêng lĕ ndơ khlay lơn tâm n'gor Êjipt, jât mlâm seh bri me rdeng ba ƀlê, jêh ri ndơ sông sa gay mbơ̆ păng sa tâm nôk hăn rŏ trong.

²⁴ Jêh nây Y-Yôsep njŭn phung oh nâu păng hăn trong. Păng ntĭnh ma khân păng: “Lơi tâm djrel ôh ndrăng khân may rŏ trong.”

Y-Yakôb ndrăp trŭnh tâm Êjipt

²⁵ Khân păng luh bơh Êjipt hăn tât ta ngih Y-Yakôb, mbơ̆ khân păng, ta Kanaan.

²⁶ Khân păng mbơh ma mbơ̆: “Y-Yôsep hôm e rêh jêh ri păng chiă uănh lĕ n'gor Êjipt!” Ƀiălah nuih n'hâm Y-Yakôb mâu mĭng ro, yorlah păng mâu iăt ôh nau khân păng lah.

²⁷ Ƀiălah nôk khân păng nkoch bri ma păng lĕ nau Y-Yôsep ngơi ma khân păng, jêh ri nôk saơ ndeh seh Y-Yôsep njuăl gay rdeng păng, huêng Y-Yakôb mbơ̆ khân păng, plơ̆ kah rvê.

²⁸ Israel lah: “Kơt nĕ găp jêh! Y-Yôsep, kon bu klâu gâp, hôm rêh. Gâp mra hăn tâm mâp ma păng êlor ma gâp khĭt.”