Nau Ntơm 44 - Nau Brah Ndu Ngơi 2023

Kachok prăk tâm ƀau ba Y-Benjamin

¹ Y-Yôsep ntăm ma phung mât ngih: “Troch bêng ndơ sông sa tâm ƀau phung bunuyh aơ. Khân păng dơi rdeng ndah âk nkhŭt ăn ma khân păng dah âk, bi prăk ma mbu nơm ăn tâm bunuyh nây.

² Ăn may dơm đŏng kachok prăk gâp tâm bâr ƀau nơm oh mpŏt, nsum ma prăk păng rvăt ba.” Bunuyh mât ngih ƀư tĭng nâm nau Y-Yôsep ntĭnh.

³ Tât ƀhit ang ôi taơ, bu ăn phung oh nâu Y-Yôsep ndrel ma seh bri khân păng dâk hăn.

⁴ Khân păng du luh jêh tă bơh ƀon, ê hŏ ngai ôh, Y-Yôsep lah ma bunuyh mât ngih păng: “Dâk gơnh hom may tĭng phung nây; lah may ban jêh khân păng, ăn may lah: ‘Mâm ƀư khân may mplơ̆ nau mhĭk ma đah nau ueh?

⁵ Mâu di hĕ aơ jêng kachok kôranh gâp dŏng nhêt ndrănh jêh ri n'hŭm pol? Khân may hŏ ƀư du nau mhĭk ngăn jêh.’”

⁶ Bunuyh mât ngih ban phung nây jêh ri lah tay nau nây.

⁷ Khân păng lah: “Mâm ƀư kôranh ngơi kơt nây ôh? Phung oh mon may mâu mâp ƀư nau pônây ôh!

⁸ May uănh, tă bơh Kanaan, prăk hên saơ jêh ta bâr ƀau hên djôt mplơ̆ tay ma may, pôri rlong ôp mâm ƀư hên dơi ntŭng prăk mâu lah mah tâm ngih kôranh may?

⁹ Tơlah ndơ nây dơi joi saơ ta mbu moh nơm, jêh ri nơm nây ăn khĭt, bi hên mra ƀư dĭk ma may.”

¹⁰ Bunuyh mât ngih lah: “Ơ, ƀư nâm nau khân may ngơi. Tơlah joi saơ kachok ta mbu moh nơm, nơm nây mra ƀư dĭk ma gâp, bi phung êng mâu geh nau tih ôh.”

¹¹ Lĕ rngôch khân păng ndil ndal ƀau ba khân păng ta neh jêh ri pơk.

¹² Bunuyh mât ngih sek ăp nơm, ntơm bơh nâu dak bôk tât ta oh mpŏt. Păng saơ kachok tâm ƀau Y-Benjamin.

¹³ Khân păng nkhêk ao khân păng, ăp nơm dơm ƀau klơ ndŭr kơi seh bri, jêh ri plơ̆ sĭt ta ƀon.

Y-Yôsep ŭch kân Y-Benjamin gŭ ta Êjipt

¹⁴ Nôk Y-Yuđa jêh ri phung oh nâu păng tât ta ngih Y-Yôsep, Y-Yôsep hôm e gŭ ta nây. Khân păng chon mon ta neh tanăp măt păng.

¹⁵ Y-Yôsep ôp: “Moh nau khân may hŏ ƀư jêh? Khân may mâu gĭt ƀơh gâp geh nau dơi bơh nau pol?”

¹⁶ Y-Yuđa ơh: “Moh hên hôm blau ngơi ma kôranh gâp? Moh nau hên blau mbơh aơ? Mâm nau hên dơi koh dŏng hên nơm? Brah Ndu hŏ saơ jêh nau tih phung oh mon may. Aƀaơ, lĕ phung hên nđâp ma nơm dôl djôt kachok aơ tâm ti păng jêng dĭk ma may da dê.”

¹⁷ Ƀiălah Y-Yôsep lah: “Gâp mâu ŭch đŏng ƀư pônây! Nơm djôt kachok nây hôm tâm ti păng mra ƀư dĭk ma gâp; bi khân may plơ̆ sĭt đăp mpăn ma mbơ̆ khân may.”

Y-Yuđa dăn Y-Yôsep ăn Y-Benjamin plơ̆ sĭt ma mbơ̆ păng

¹⁸ Y-Yuđa văch dăch ta Y-Yôsep jêh ri lah: “Hơi kôranh gâp, gâp dăn yô̆ an nau tih jêh ri ăn oh mon may dơi ngơi du tong bar tong. Dăn may lơi dĭng nuih ôh ma oh mon may, yorlah may jêng tâm ban ma Pharaôn.

¹⁹ May ôp jêh phung oh mon may pô aơ: ‘Khân may hôm geh lĕ mbơ̆ mâu lah oh nâu?’

²⁰ Hên hŏ lah jêh ma kôranh: ‘Hên geh du huê mbơ̆ ranh jêh, jêh ri du huê oh mpŏt bu deh păng dôl mbơ̆ lĕ âk năm. Nâu păng khĭt jêh, yor ri tâm phung kon du me bă păng knŏng hôm du huê păng dơm jêh ri mbơ̆ rŏng ma păng hâu ngăn.’

²¹ May lah jêh ma phung oh mon may: ‘Njŭn leo păng trŭnh mâp gâp gay ma gâp dơi saơ păng ngăn.’

²² Hên hŏ lah jêh ma may: ‘Kon se nây mâu dơi lơi ôh mbơ̆ păng, yorlah tơlah păng lơi mbơ̆ păng, mbơ̆ păng mra khĭt.’

²³ Ƀiălah may lah tay: ‘Tơlah oh mpŏt mâu văch ndrel ma khân may tât ta aơ, khân may mâu mra saơ muh măt gâp đŏng ôh.’

²⁴ Dôl hên plơ̆ sĭt jêh ma oh mon may jêng mbơ̆ gâp, hên nkoch bri ma păng moh nau may ngơi.

²⁵ Jêh nây, mbơ̆ lah tay: ‘Hăn trŭnh hom rvăt djê̆ ndơ sông sa djôt sĭt.’

²⁶ Hên ơh: ‘Hên mâu dơi hăn trŭnh ta aơ ôh. Tơlah oh mpŏt hăn ndrel ma hên ri mơ hên hăn trŭnh, yorlah hên mâu mâp ôh muh măt nơm nây, tơlah oh mpŏt mâu hăn ndrel ma hên.’

²⁷ Oh mon may jêng mbơ̆ gâp, lah ma hên: ‘Khân may gĭt ur gâp deh ăn ma gâp bar hê kon bu klâu;

²⁸ du huê hŏ hăn roh hêng, jêh ri gâp hŏ lah đŏng, nanê̆ mpa bri janh hŏ sa hêk jêh păng, yorlah tât nar aơ gâp mâu hôm ôh saơ păng.

²⁹ Tơlah khân may leo nơm aơ hăn ngai đŏng bơh gâp, jêh ri mâp nau mhĭk tât ma păng, pôri khân may ƀư djơh ma nơm ndra bôk aơ geh nau rngot ngăn jêh ri hăn jŭr tâm ƀon phung khĭt.’

³⁰ Nau rêh mbơ̆ gâp jêng nguay đah nau rêh oh gâp. Pôri, tơlah gâp sĭt ma oh mon may jêng mbơ̆ gâp jêh ri mâu geh ndăm jê̆ nây hăn ndrel

³¹ pôri mbơ̆ gâp mra khĭt lah păng mâu saơ ndăm jê̆ aơ. Tơlah pônây, phung oh mon may mra ƀư ma mbơ̆ ndra bôk hên, jêng oh mon may đŏng, geh nau rngot hăn jŭr tâm ƀon phung khĭt.

³² Oh mon aơ ro hŏ dâk sâm ton an ma kon se nây, jêh ri lah: ‘Tơlah gâp mâu djôt leo oh plơ̆ sĭt ma may, gâp mra anh nau tih tanăp may du njăr rêh.’

³³ Pôri aƀaơ, dăn ma may ăn oh mon may dơi ƀư dĭk may ntrok ăn ndăm jê̆, jêh ri ăn ndăm jê̆ hăn sĭt ndrel phung nâu păng.

³⁴ Ngăn, mâm ƀư gâp dơi sĭt ma mbơ̆ gâp lah ndăm jê̆ nây mâu sĭt ôh ndrel ma gâp? Mâu, gâp mâu ŭch saơ ôh nau mhĭk tât ma mbơ̆ gâp!”