Nau Ntơm 40 - Nau Brah Ndu Ngơi 2023

Y-Yôsep rblang nau mbơi ma bar hê kôranh tâm ngih Pharaôn

¹ Jŏ djê̆ ma nây, kôranh djôt kachok jêh ri kôranh ƀư piăng let ma hađăch Êjipt, khân păng ƀư tih tâm rdâng đah hađăch.

² Pharaôn ji nuih ngăn ma bar hê kôranh nây jêng kôranh djôt kachok jêh ri kôranh ƀư piăng let,

³ jêh ri krŭng khân păng, tâm ngih kôranh mât gai tahan gak, jêng ntŭk krŭng Y-Yôsep.

⁴ Kôranh mât gai tahan gak jao ma Y-Yôsep pah kan ma bar hê kôranh nây. Khân păng gŭ jŏ djê̆ tâm ndrung.

⁵ Tâm du măng, dôl hôm gŭ krŭng tâm ndrung, lĕ kôranh djôt kachok jêh ri kôranh ƀư piăng let ma hađăch Êjipt geh nau mbơi da dê, ƀiălah lĕ nau mbơi khân păng geh nau rblang êng êng.

⁶ Ang ôi taơ, Y-Yôsep tât pah kan ma khân păng jêh ri saơ khân păng geh nau rngot.

⁷ Păng ôp: “Mâm ƀư muh măt khân may rngot nar aơ?”

⁸ Phung nây lah: “Hên geh jêh nau mbơi ƀiălah mâu geh ôh bunuyh dơi rblang nau nây.” Y-Yôsep lah: “Mâu di hĕ Brah Ndu dơi rblang nau mbơi? Gâp dăn ma khân may nkoch tay nau mbơi nây ma gâp.”

⁹ Kôranh djôt kachok nkoch tay nau mbơi păng ma Y-Yôsep; păng lah: “Tâm nau mbơi, gâp saơ geh du tơm krăk ƀâu tanăp măt gâp.

¹⁰ Tơm krăk ƀâu nây geh pe n'gĭng. Lah n'gĭng ntơm chăt nse, kao dang, jêh ri dơi jêng âk rkŭm play krăk ƀâu dŭm.

¹¹ Tâm ti gâp hôm djôt kachok Pharaôn. Gâp pĕ play krăk ƀâu, păt dak, nkhŭt tâm kachok jêh nây nhhơr ta ti Pharaôn.”

¹² Y-Yôsep lah: “Aơ jêng nau rblang ma nau mbơi nây: Pe n'gĭng krăk ƀâu jêng pe nar.

¹³ Hôm pe nar Pharaôn mra yô̆ an may jêh ri ăn tay nau pah kan ma may; may mra nhhơr ndrănh ta ti Pharaôn nâm bu may ƀư lor dôl may hôm jêng kôranh djôt kachok.

¹⁴ Ƀiălah nôk lĕ kan may hŏ geh nau ueh jêh, dăn ma may kah gĭt ma gâp, sâm ngơi an ma gâp đah Pharaôn, jêh ri djôt leo gâp luh bơh ntŭk aơ.

¹⁵ Yorlah di ngăn, bu nhŭp ntŭng jêh ri leo gâp luh bơh n'gor phung Hêbrơ, jêh ri ta aơ gâp mâu ƀư tih du ntil ndơ ôh nkhơng ma bu krŭng gâp tâm ndrung ngo aơ.”

¹⁶ Kôranh ƀư piăng let saơ nau rblang Y-Yôsep jêng ueh, păng lah: “Gâp geh đŏng nau mbơi: gâp saơ ta klơ bôk gâp nơm ndô pe mlâm bĭ piăng let.

¹⁷ Tâm bĭ piăng let prêh lơn geh ăp lĕ ndơ piăng let tă bơh ti nơm êng ăn ma Pharaôn, ƀiălah sĭm trŭnh sa lĕ piăng let tâm bĭ ta klơ bôk gâp.”

¹⁸ Y-Yôsep lah: “Aơ jêng nau rblang ma nau mbơi nây: pe mlâm bĭ jêng pe nar.

¹⁹ Hôm pe nar, Pharaôn mra koh trô ko may jêh ri yông may ta tơm si. Sĭm och mra sa puăch may.”

²⁰ Tât nar tal pe, jêng kah gĭt nar deh Pharaôn, hađăch ƀư nau sông sa ma lĕ rngôch phung oh mon păng, jêh ri ăn ma kôranh djôt kachok jêh ri kôranh ƀư piăng let luh bơh ndrung.

²¹ Hađăch ăn tay nau pah kan ma kôranh djôt kachok jêh ri păng dơi nhhơr kachok ta ti Pharaôn.

²² Ƀiălah hađăch đă yông trô ko kôranh ƀư piăng let, nâm nau Y-Yôsep hŏ rblang jêh.

²³ Kôranh djôt kachok ndrănh mâu hôm kah gĭt ôh ma Y-Yôsep, păng lĕ chuêl hêng Y-Yôsep.