Nau Ntơm 4 - Nau Brah Ndu Ngơi 2023

Y-Kain jêh ri Y-Abel

¹ Y-Ađam gŭ đah H'Êva, ur păng. H'Êva ntreo jêh ri deh Y-Kain. Păng lah: “Yor Brah Yêhôva kơl, gâp hŏ deh jêh du huê bunuyh.”

² Păng deh tay Y-Abel, oh Y-Kain. Y-Abel rmăk biăp, bi Y-Kain ƀư mir.

³ Jŏ djê̆ ma nây, Y-Kain sŏk play bơh neh ƀư ndơ nhhơr ma Brah Yêhôva.

⁴ Bi Y-Abel nhhơr biăp deh dak bôk tâm mpôl păng jêng ndơ dŭt kah. Brah Yêhôva dơn Y-Abel jêh ri ndơ păng nhhơr,

⁵ ƀiălah Brah Ndu mâu dơn Y-Kain jêh ri ndơ păng nhhơr. Yor ri, Y-Kain nuih ngăn jêh ri muh măt păng jâk.

⁶ Brah Yêhôva ôp Y-Kain: “Mâm ƀư may nuih? Mâm ƀư muh măt may jâk?

⁷ Tơlah may ƀư nau ueh mâu hĕ Gâp dơn ndơ may? Tơlah may mâu ƀư ôh nau ueh nau tih gŭ kâp may tanăp bôk mpông, păng ŭch may ngăn; ƀiălah ăn may mât uănh păng.”

⁸ Y-Kain tâm ngơi đah Y-Abel, oh păng. Nôk bar hê dôl gŭ tâm mir pôri Y-Kain rduh lơh Y-Abel jêh ri nkhĭt lơi păng.

⁹ Brah Yêhôva ôp Y-Kain: “Ntŭk gŭ oh may, Y-Abel?” Y-Kain ơh: “Gâp mâu gĭt ôh. Gâp hĕ jêng bunuyh mât oh gâp?”

¹⁰ Brah Yêhôva ôp: “Moh nau may ƀư pônây? Nteh mham oh may tă bơh neh hŏ nter tât ma Gâp.

¹¹ Aƀaơ aơ, may geh nau rtăp rak luh bơh neh aơ, jêng neh hŏ hă mbung rhôp mham oh may hŭk bơh ti may.

¹² Tơlah may pah kan mir, neh mâu mra geh play âk ma may. May mra du krap jêh ri nsong mblêng ta klơ neh ntu.”

¹³ Y-Kain ơh ma Brah Yêhôva: “Nau rmal aơ lĕ rlau ir ma gâp.

¹⁴ Aƀaơ, nar aơ May mprơh gâp du luh bơh neh aơ, gâp mra pôn ndâp măt bơh May jêh ri du krap; nsong mblêng ta klơ neh; jêh nây, mbu moh mâp gâp, khân păng mra nkhĭt gâp.”

¹⁵ Brah Yêhôva lah: “Mâu ôh! Ƀiălah tơlah mbu nkhĭt Y-Kain, nơm nây bu mra plơng bôk bar tơ̆ pơh.” Brah Yêhôva nchih ăn nau mbên ta săk Y-Kain gay ma mbu mâp Y-Kain mâu dơi nkhĭt păng ôh.

¹⁶ Y-Kain du luh bơh nau mpơl muh măt Brah Yêhôva jêh ri gŭ tâm n'gor Nôt, mpeh ma luh nar Êđen.

Noi deh Y-Kain

¹⁷ Y-Kain gŭ đah ur păng, ur păng ntreo jêh ri deh Y-Ênŏk. Y-Kain mon du rplay ƀon toyh jêh ri amoh ƀon nây jêng Ênŏk, tĭng amoh kon bu klâu păng.

¹⁸ Y-Ênŏk jêng mbơ̆ Y-Irat; Y-Irat jêng mbơ̆ Y-Mêhujaêl; Y-Mêhujaêl jêng mbơ̆ Y-Mêtusaêl; Y-Mêtusaêl jêng mbơ̆ Y-Lamek.

¹⁹ Y-Lamek nđăp ur bar; du huê amoh H'Ada, du huê đŏng amoh H'Sila.

²⁰ H'Ada deh Y-Jabal; Y-Jabal jêng chô yau ma phung gŭ rêh tâm ngih bok jêh ri mât rong mpô mpa.

²¹ Oh Y-Jubal jêng Y-Jubal, chô yau ma lĕ phung pâl kreh gong rêng jêh ri uh n'hôm.

²² Bi H'Sila deh Y-Tubal-Kain, jêng bunuyh blau chiăr ăp ntil ma lĕ ndơ hơr ma kông jêh ri loih. Oh bu ur Y-Tubal-Kain jêng H'Naama.

²³ Y-Lamek lah ma bar hê ur păng: “Hơi H'Ada jêh ri H'Sila! Iăt hom bâr gâp; Aơ, lĕ bar hê ur Y-Lamek, rkêng hom tôr iăt nau gâp lah: Gâp hŏ nkhĭt du huê bunuyh yor păng ƀư ma gâp tât sôt, Jêh ri du huê nơm mom yor păng dong gâp môr bŭr.

²⁴ Tơlah Y-Kain dơi plơng har pơh tơ̆, Ri mơ Y-Lamek mra dơi plơng pơh jât mpơh tơ̆.”

Deh Y-Set

²⁵ Y-Ađam gŭ tay đah ur păng, ur păng deh du huê kon bu klâu, kuăl amoh jêng Y-Set, yor păng lah: “Brah Ndu hŏ ăn đŏng ma gâp du huê kon bu klâu êng ntrok Y-Abel nơm Y-Kain hŏ nkhĭt lơi jêh.”

²⁶ Y-Set bă tay du huê kon bu klâu, amoh Y-Ênôs. Bơh nây, bu ntơm kuăl mbơh sơm amoh Brah Yêhôva.