Nau Ntơm 3 - Nau Brah Ndu Ngơi 2023

Bunuyh tŭp nau ndơm jêh ri nau tih.

¹ Tâm lĕ rngôch mpô mpa bri Yêhôva Brah Ndu njêng jêh, bêh jêng mpa ƀlăch ƀlêr lơn. Bêh lah ma bu ur: “Ngăn Brah Ndu hŏ ntĭnh jêh ma khân may mâu dơi sa play tơm si tâm n'gar trao bơh?”

² Bu ur lah ma bêh: “Hên dơi sa bơh lĕ play tơm si tâm n'gar trao,

³ ƀiălah play tơm si tăm ta nklang n'gar trao, Brah Ndu hŏ lah: ‘Khân may mâu dơi sa ôh, mâu đŏng dơi pah play tơm si nây, klach lah khân may mra khĭt’”.

⁴ Bêh lah ma bu ur: “Nanê̆ ngăn khân may mâu mra khĭt ôh!

⁵ Yorlah Brah Ndu gĭt lah khân may sa play nây pôri măt mra lin, jêh ri khân may mra jêng nâm bu Brah Ndu, gĭt nau ueh jêh ri nau mhĭk.”

⁶ Dôl bu ur saơ play ta tơm si nây sa kah, ueh măt uănh jêh ri khlay yor ƀư ma păng nau blau mĭn, păng pĕ play nây jêh ri sa, jêh nây ăn ma sai păng dôl dâk êp ta meng; sai păng sa đŏng.

⁷ Rnôk nây măt lĕ bar hê lin da dê jêh ri gĭt năl khân păng nơm gŭ rhôk. Khân păng jĭm n'ha tơm rvi ƀư troi nkŭm săk.

⁸ Dôl tăng nteh Yêhôva Brah Ndu hăn tâm n'gar trao nôk nđik kêng mhaơ, Y-Ađam jêh ri ur păng du krap ta nklang rlô si tâm n'gar trao gay ndâp măt Yêhôva Brah Ndu.

⁹ Yêhôva Brah Ndu kuăl Y-Ađam jêh ri ôp: “Ntŭk may gŭ?”

¹⁰ Y-Ađam ơh: “Tăng nteh May tâm n'gar trao, gâp klach yor ri du krap, yor gâp gŭ rhôk.”

¹¹ Brah Ndu ôp: “Mbu nơm ntĭm ma may gĭt may rhôk? Di lĕ may hŏ sa jêh play ta tơm si, Gâp lĕ buay mâu ăn sa ôh?”

¹² Y-Ađam ơh: “Bu ur May ăn gŭ êp gâp hŏ ăn gâp play tơm si nây jêh ri gâp hŏ sa jêh.”

¹³ Yêhôva Brah Ndu ôp bu ur: “Moh nau ay ƀư pônây?” Bu ur ơh: “Bêh hŏ ndơm gâp jêh ri gâp sa jêh.”

Brah Ndu mbơh nau phat dôih

¹⁴ Yêhôva Brah Ndu nduyh bêh: “Yor may ƀư jêh nau nây Yor ri tâm lĕ rngôch mpô mpa rong jêh ri mpô mpa bri, Knŏng may dơm geh nau rtăp rak; May mra vơr ma ndŭl Jêh ri sa ndruyh neh lĕ du njăr rêh.

¹⁵ Gâp mra ƀư ma may jêh ri bu ur, Noi deh may jêh ri noi deh bu ur tâm rlăng. Păng mra jot nkrâm sôt bôk may, Bi may mra kăp ndơl jâng păng.”

¹⁶ Brah Ndu lah ma bu ur: “Gâp mra ntop n'hao âk nau rgănh dôl ay ntreo, Jêh ri ntop âk nau ji ăp tơ̆ dôl ay deh kon. Ƀiălah, ay hôm ŭch rêh êp sai ay, Jêh ri sai ay mra chiă uănh ay.”

¹⁷ Brah Ndu lah ma Y-Ađam: “Yor may hŏ iăt tĭng nau ur may, Sa play tơm si Gâp lĕ buay jêh mâu dơi sa, Yor ri neh mra geh nau rtăp rak yor may; May hŏt rgănh du njăr rêh ri mơ geh ndơ sa luh bơh neh.

¹⁸ Neh mra hon tơm lok jêh ri rtao lok, Jêh ri may mra sa n'ha trau tâm mir lŏ.

¹⁹ May pah kan tât luh dak rhal ta ndăr kleng Ri mơ geh ndơ sông sa Kŏ tât nar may plơ̆ sĭt ta neh, Jêng ntŭk may luh bơh ta nây. Yorlah May jêng ndruyh neh, May mra plơ̆ sĭt tay ma ndruyh neh.”

²⁰ Y-Ađam kuăl ur păng jêng H'Êva yorlah păng jêng me ma lĕ rngôch bunuyh.

²¹ Yêhôva Brah Ndu sŏk ntâu mpô mpa jĭm n'grêp jêng ao jong ăn ma ur sai Y-Ađam jêh nây nsoh an ma khân păng.

²² Yêhôva Brah Ndu mĭn: “Aơ, kon bunuyh hŏ jêng tâm ban ma He, gĭt tâm nkhah nau ueh jêh ri nau mhĭk. Pôri aƀaơ aơ uănh njrăng hom, klach lah kon bunuyh yơr ti pĕ play tơm si nau rêh gay sa jêh ri dơi geh nau rêh n'ho ro.”

²³ Yor nây, Yêhôva Brah Ndu lah ma kon bunuyh đă du luh bơh n'gar trao Êđen gay chuar rli neh, jêng ntŭk kon bunuyh luh bơh ta nây.

²⁴ Brah Ndu mprơh bunuyh du luh bơh n'gar trao. Ta ntŭk mpeh luh nar n'gar trao Êđen, Păng dơm phung chêrubim n'hanh ma đao nchrat ral ngăn, ndăch ăp mpeh, gay kâp njrăng trong hăn tât tơm si nau rêh.