Nau Ntơm 26 - Nau Brah Ndu Ngơi 2023

Y-Isăk ta Gêra

¹ Nau hŏ tât jêh ji ngot tâm rnôk rô̆ Y-Abraham, aƀaơ tâm n'gor nây geh tay nau ji ngot đŏng. Yor ri, Y-Isăk hăn ta Gêrar, mâp Y-Abimêlek, hađăch phung Philistin.

² Brah Yêhôva tâm mpơl ma păng jêh ri lah: “Lơi hăn ôh ta n'gor Êjipt, ăn gŭ hom tâm n'gor Gâp mra ntĭm ma may.

³ Ăn may gŭ njưh tâm n'gor aơ, Gâp mra gŭ ndrel ma kon jêh ri ăn nau ueh uĭn ma kon; yorlah Gâp mra ăn ma may jêh ri ma noi deh kon lĕ nkual bri aơ jêh ri Gâp mra ƀư n'hêl nanê̆ nau Gâp ton jêh ma Y-Abraham, mbơ̆ may.

⁴ Gâp mra ăn noi deh kon bĭk rơ̆ nâm bu mănh tâm trôk jêh ri ăn ma lĕ noi deh may nkual bri aơ. Lĕ rngôch phung ƀon lan tâm neh ntu mra geh nau ueh uĭn yor tă bơh noi deh may;

⁵ yor Y-Abraham hŏ tông jêh bâr Gâp, djôt prăp lĕ nau Gâp ntĭm nti, nđâp ma lĕ nau vay ntăm, nau vay dăp jêh ri nau vay bơh Gâp.”

H'Rêbêka jêh ri hađăch Abimêlek

⁶ Pôri Y-Isăk gŭ ta Gêrar.

⁷ Yorlah H'Rêbêka ueh ngăn yor ri phung bunuyh gŭ tâm ƀon nây ôp Y-Isăk ma nau ur păng jêh ri Y-Isăk lah: “Păng jêng oh bu ur gâp.” Păng mâu ôh nănh lah: “Bu ur nây jêng ur gâp” yor klach phung bu klâu tâm n'gor, klăp lah bu nkhĭt gâp yor ur.

⁸ Y-Isăk hŏ gŭ ta nây jŏ jêh, jêh ri geh du nar, Y-Abimêlek, hađăch phung Philistin, gŭ uănh ta mpông bloh jêh ri saơ Y-Isăk ut H'Rêbêka ur păng.

⁹ Y-Abimêlek kuăl Y-Isăk hăn tât jêh ri lah: “Nanê̆ păng jêng ur may! Mâm ƀư may lah: ‘Păng jêng oh bu ur gâp’?” Y-Isăk lah ma hađăch: “Yorlah gâp mĭn êng, lah gâp mâu lah kơt nây gâp mra khĭt yor ur gâp.”

¹⁰ Y-Abimêlek ôp: “Moh nau may ƀư ma hên pônây? Tơlah geh du huê bunuyh ƀon lan hên lĕ lăn bê̆ch ndrel ma ur may, may hŏ ƀư ma hên tŭp tâm nau tih jêh!”

¹¹ Yor ri, Y-Abimêlek ntăm ma lĕ rngôch bunuyh tâm ƀon lan pô aơ: “Mbu nơm pah bunuyh aơ mâu lah ur păng, bu mra nkhĭt ro.”

Y-Isăk geh jêng

¹² Y-Isăk tuch tăm ntil găr tâm n'gor nây jêh ri năm nây păng geh hao âk lơn du rhiăng tơ̆, yor Brah Yêhôva ăn nau ueh uĭn ma păng.

¹³ Păng jêng ndrŏng, drăp ndơ păng ntop mro tâm ăp nar kŏ tât păng jêng bunuyh dŭt ndrŏng ngăn ngên.

¹⁴ Păng geh âk phung biăp, ndrôk jêh ri oh mon âk ngăn yor ri phung Philistin mâu nach ma păng.

¹⁵ Lĕ rngôch ntu dak phung oh mon Y-Abraham, mbơ̆ păng, hŏ kuyh, aƀaơ aơ phung Philistin sŏk neh brôi lơi lĕ rngôch.

¹⁶ Y-Abimêlek lah ma Y-Isăk: “Du ngai hom may bơh hên, yorlah may lĕ jêng dŭt dăng ktang ngăn lah rđĭl đah hên.”

¹⁷ Pôri, Y-Isăk chalơi ntŭk nây, hăn ndâk ngih bok tâm rlŭng Gêrar jêh ri gŭ ta nây.

¹⁸ Y-Isăk kơi kuyh tay ăp ntu dak bu hŏ kuyh jêh tâm rnôk Y-Abraham, mbơ̆ păng. Jêh khĭt Y-Abraham, phung Philistin hŏ brôi lơi ntu dak nây. Păng rnha ntu dak nây tĭng nâm mbơ̆ păng lĕ rnha jêh.

¹⁹ Ƀiălah dôl phung oh mon Y-Isăk kuyh ntu dak tâm rlŭng jêh ri geh mâp du dak tu luh rdŭl,

²⁰ phung rmăk biăp ta Gêrar hăn tâm pit đah phung rmăk biăp Y-Isăk. Khân păng lah: “Dak tu aơ jêng hên de,” yor ri păng rnha ntu dak nây jêng Êsek, yorlah phung nây hŏ tâm pit đah păng.

²¹ Jêh nây, phung oh mon kuyh du ntu dak êng đŏng jêh ri bu ăt pit đŏng, pôri păng rnha ntu dak nây jêng Sitna.

²² Y-Isăk chalơi ntŭk nây hăn kuyh du ntu dak êng jêh ri ntu dak aơ mâu geh ôh tâm pit, păng rnha ntu dak nây jêng Rêhôbôt, jêh ri lah: “Aƀaơ Brah Yêhôva hŏ ăn ma phung hên du ntŭk gŭ huy ngăn, jêh ri hên mra geh jêng tâm n'gor aơ.”

Brah Ndu ton tay đah Y-Isăk

²³ Bơh ntŭk nây, Y-Isăk hăn hao ta Bêr-Sêba.

²⁴ Tâm măng nây, Brah Yêhôva tâm mpơl jêh ri lah đah păng: “Gâp jêng Brah Ndu Y-Abraham, mbơ̆ kon. Lơi klach ôh, yorlah Gâp gŭ ndrel ma kon. Gâp mra ăn nau ueh uĭn ma kon jêh ri ƀư ma noi deh kon bĭk rơ̆, yor Y-Abraham jêng oh mon Gâp!”

²⁵ Y-Isăk rdâk du nơng ƀư brah, kuăl mbơh sơm ma amoh Brah Yêhôva jêh ri rdâk ngih bok păng ta nây. Jêh ri phung oh mon Y-Isăk kuyh du ntu dak ta nây.

Y-Isăk tâm rnglăp đah Y-Abimêlek

²⁶ Hađăch Abimêlek văch bơh Gêrar hăn khâl Y-Isăk. Hăn ndrel ma Y-Ahusat nơm nchră jêh ri Y-Pikôl kôranh gai tahan.

²⁷ Y-Isăk ôp: “khân may tâm rmot ma gâp jêh ri khân may hŏ mprơh jêh gâp du ngai bơh khân may, mâm ƀư khân may hôm hăn văch gay joi gâp đŏng?”

²⁸ Khân păng lah: “Hên saơ rah vah jêh Brah Yêhôva hŏ kâp kơl may, pôri hên mĭn vah vang may đah hên ăn geh du nau ton gay ƀư tâm rnglăp ndrel ndrăng he.

²⁹ Ăn may ton mâu hôm ôh ƀư nau mhĭk ma hên, nâm bu phung hên mâu hŏ tâm rdâng đah may, ƀiălah hên lơ hô ƀư ueh jêh ri ăn may du luh hăn ma nau đăp mpăn. Aƀaơ may jêng nơm Brah Yêhôva ăn nau ueh uĭn.”

³⁰ Y-Isăk ndrăp nau nhêt sa jêh ri khân păng sông sa nhêt ndrel.

³¹ Kah ôi taơ khân păng dâk ơm, ƀư du nau ton ndrăng khân păng. Jêh nây Y-Isăk njŭn khân păng hăn trong jêh ri khân păng hăn ma nau đăp mpăn.

³² Tâm nar nây đŏng, phung oh mon Y-Isăk hăn mbơh ma păng ma ntu dak khân păng mhe kuyh. Khăn păng lah: “Hên joi dak saơ jêh.”

³³ Păng ntơ ntu dak nây jêng Siba. Yor ri ƀon nây amoh Bêr-Sêba n'ho ma tât nar aơ.

Y-Êsau nđăp ur

³⁴ Nôk Y-Êsau geh puăn jât năm, păng nđăp ur, du huê bunuyh amoh H'Yudit, kon bu ur Y-Bêri, phung Hitit, jêh ri du huê bunuyh amoh H'Basmat, kon bu ur Y-Êlon, ăt phung Hitit.

³⁵ Bar hê ƀăn aơ ƀư rngot ma nau rêh Y-Isăk jêh ri H'Rêbêka.