Nau Ntơm 25 - Nau Brah Ndu Ngơi 2023

Y-Abraham nđăp H'Kêtura jêng ur

¹ Y-Abraham nđăp du huê ur êng amoh jêng H'Kêtura.

² Bu ur nây deh ăn ma păng: Y-Simran, Y-Jôksan, Y-Mêdan, Y-Madian, Y-Isbak jêh ri Y-Sua.

³ Y-Jôksan bă kon Y-Sêba jêh ri Y-Dêdan. Phung kon sau Y-Dêdan jêng ndŭl mpôl Y-Asurim, Y-Lêtusim jêh ri Y-Lêumin.

⁴ Phung kon bu klâu Y-Madian jêng Y-Êpha, Y-Êpher, Y-Hanŏk, Y-Abida jêh ri Y-Êlda. Lĕ rngôch phung aơ jêng noi deh H'Kêtura.

⁵ Y-Abraham ăn lĕ rngôch drăp ndơ păng geh ma Y-Isăk.

⁶ Ƀiălah nôk păng hôm e rêh, Y-Abraham ăn drăp ndơ ma kon ur yông păng jêh ri lah ma khân păng hăn gŭ tâm nkual neh mpeh luh nar, ngai bơh Y-Isăk jêng kon ur tơm.

Y-Abraham khĭt

⁷ Y-Abraham dơi rêh du rhiăng pơh jât mprăm năm.

⁸ Y-Abraham tăch n'hâm jêh ri păng khĭt ranh jong rêh, dơi maak tâm nau rêh, jêh ri păng sĭt ndrel ma chô yau păng.

⁹ Y-Isăk jêh ri Y-Ismaêl jêng bar hê kon bu klâu păng hŏ tâp an păng tâm trôm lŭ Makpêla, tâm mir Y-Ephrôn, kon bu klâu Y-Sôhar, bunuyh Y-Hitit, mpeh luh nar ta Mamrê.

¹⁰ Nây jêng mir Y-Abraham hŏ rvăt jêh bơh ndŭl mpôl Y-Het. Ta nây bu tâp Y-Abraham ndrel ma H'Sara ur păng.

¹¹ Jêh Y-Abraham khĭt, Brah Yêhôva ăn nau ueh uĭn ma Y-Isăk, kon bu klâu păng. Y-Isăk gŭ êp ntu dak Bêr-Lahai-Roi.

Noi deh Y-Ismaêl

¹² Aơ jêng noi deh Y-Ismaêl, kon bu klâu Y-Abraham đah H'Agar, bunuyh n'gor Êjipt jêng bu ur kơl kan H'Sara.

¹³ Aơ jêng amoh phung kon bu klâu Y-Ismaêl, dăp tĭng nar deh khân păng: Kon bu klâu bôk rah ma Y-Ismaêl jêng Y-Nêbajôt, jêh nây jêng Y-Kêdar, Y-Atbêel, Y-Mipsam.

¹⁴ Y-Misma, Y-Duma, Y-Masa,

¹⁵ Y-Hadat, Y-Têma, Y-Jêtur, Y-Napis, jêh ri Y-Kêdêma.

¹⁶ Nây jêng phung kon bu klâu Y-Ismaêl jêh ri amoh khân păng, moh tĭng nâm ƀon jêh ri ntŭk khân păng ndâk ngih bok. Nây jêng jât ma bar kôranh tâm phung ƀon lan khân păng.

¹⁷ Y-Ismaêl dơi rêh du rhiăng pe jât mpơh năm, jêh nây tăch n'hâm jêh ri păng khĭt, dơi plơ̆ sĭt ndrel ma chô yau păng.

¹⁸ Noi deh păng gŭ tâm n'gor Havila tât ta n'gor Sur, mpeh luh nar n'gor Êjipt, mpeh ma n'gor Asiri. Khân păng rêh tâm nau rlăng đah lĕ rngôch oh nâu khân păng.

Y-Êsau jêh ri Y-Yakôb

¹⁹ Aơ jêng noi deh Y-Isăk, kon bu klâu Y-Abraham. Y-Abraham deh Y-Isăk.

²⁰ Nôk păng geh puăn jât năm, Y-Isăk nđăp H'Rêbêka, kon bu ur Y-Bêthuel jêh ri jêng oh bu ur Y-Laban, jêng phung Aram da dê, tâm n'gor Padan Aram.

²¹ Y-Isăk mbơh sơm ma Brah Yêhôva yor ur păng jêng bu ur mâu bă kon. Brah Yêhôva dơn nau păng mbơh sơm, jêh ri H'Rêbêka bă ntreo.

²² Ƀiălah phung kon mpât tâm ndŭl păng rĭ dĭng păng lah: “Mâm ƀư nau aơ tât ma gâp?” Jêh nây păng ôp Brah Yêhôva.

²³ Brah Yêhôva lah: Bar bri dak dôl gŭ tâm ndŭl ay, Jêh ri bar ntil phung ƀon lan luh tă bơh ndŭl ay mra tâm pă; Phung ƀon lan aơ dăng lơn đah phung ƀon lan ri, Jêh ri nơm toyh mra pah kan ma nơm jê̆.

²⁴ Tơlah tât nar păng deh, geh kon bar ngăn.

²⁵ Nơm luh lor lơn jêng chăng, lam săk jăn nâm bu ao mbâl geh rsau rĭ dĭng rnha Y-Êsau.

²⁶ Bah kơi nây, oh păng luh, ti păng kuăn ta jâng jon Y-Êsau bu amoh păng Y-Yakôb. Nôk bar hê kon se nây deh, Y-Isăk hŏ geh jêh prao jât năm.

Y-Êsau tăch nau jêng kon bôk rah

²⁷ Lah bar hê kon se nây văch ma toyh, Y-Êsau jêng du huê bunuyh gru blau pănh, ŭch hăn nsong tâm mir lŏ, bi Y-Yakôb jêng bunuyh rdơ̆ rbăn, vay gŭ tâm ngih bok.

²⁸ Y-Isăk rŏng âk lơn ma Y-Êsau yorlah păng ŭch sa puăch bri, bi ma H'Rêbêka rŏng lơn ma Y-Yakôb.

²⁹ Du nar, Y-Yakôb dôl gŭ rŭk por, Y-Êsau sĭt tă bơh bri ji ngot ngăn.

³⁰ Y-Êsau lah ma Y-Yakôb: “Oh ăn nâu sa ro moh ndơ sa chăng chăng nĕ ơh, yorlah nâu ji ngot ngăn!” Yor nây, bu rnha Y-Êsau jêng Y-Êđôm.

³¹ Y-Yakôb lah: “Nâu tăch nau dơi jêng kon bu klâu bôk rah ma oh lor mơ.”

³² Y-Êsau lah: “Bơi ma khĭt jêh, moh nau nâu hôm dŏng nau dơi jêng kon bu klâu bôk rah?”

³³ Y-Yakôb lah: “Pôri ăn nâu ton lor yơh.” Y-Êsau ton ro jêh ri păng tăch ro nau dơi jêng kon bu klâu bôk rah ăn ma Y-Yakôb.

³⁴ Jêh nây Y-Yakôb ăn Y-Êsau sa piăng let jêh ri por tuh. Lôch sông sa nhêt, Y-Êsau dâk jêh ri hăn. Y-Êsau hŏ mưch jêh ma nau dơi jêng kon bu klâu bôk rah kơt nây yơh.