Nau Ntơm 24 - Nau Brah Ndu Ngơi 2023

Y-Abraham đă oh mon kơl kan hăn ôp ur ma Y-Isăk

¹ Y-Abraham lĕ ranh jêh, năm lĕ âk; jêh ri Brah Yêhôva ăn jêh nau ueh uĭn ma Y-Abraham tâm ăp ntil ndơ.

² Y-Abraham lah ma oh mon păng, hŏ gŭ jŏ năm âk lơn tâm ngih păng, jêng nơm mât uănh lĕ rngôch drăp ndơ păng: “Dơm hom ti may tâm dâng kuang gâp.

³ Gâp ŭch may sŏk amoh Brah Yêhôva, jêng Brah Ndu ma trôk jêh ri ma neh ntu, ăn may ton pô aơ may mâu mra sŏk ôh ur ma kon bu klâu gâp bơh phung kon bu ur phung Kanaan, ntŭk gâp gŭ aƀaơ aơ,

⁴ ƀiălah ăn may mra hăn tât ta ƀon tơm gâp, tât ta phung mpôl băl gâp, jêh ri nđăp ur ma kon bu klâu gâp jêng Y-Isăk.”

⁵ Oh mon ơh: “Klăp lah bu ur nây mâu mra ŭch tĭng gâp sĭt ta n'gor aơ ôh; pôri dơi lĕ gâp njŭn leo kon bu klâu may sĭt ta n'gor may tă bơh nĕ may du luh?”

⁶ Y-Abraham lah: “Mâu, lơi hôm ôh njŭn leo kon gâp sĭt ta n'gor nây!

⁷ Brah Yêhôva jêng Brah Ndu klơ trôk, Nơm hŏ djôt leo gâp luh bơh ngih mbơ̆ gâp jêh ri ƀon tơm gâp, hŏ ngơi jêh ri ton ma gâp pô aơ: ‘Gâp mra ăn n'gor aơ ma noi deh may!’ Păng nơm mra njuăl phung tông mpăr hăn tanăp may, jêh ri may mra joi ur ma kon bu klâu gâp bơh ntŭk nây.

⁸ Tơlah bu ur nây mâu ŭch tĭng may, may mra rklaih bơh nau ton đah gâp. Ƀiălah lơi njŭn leo ôh kon bu klâu gâp ta nây.”

⁹ Pôri, oh mon dơm ti păng tâm dâng kuang Y-Abraham, kôranh păng, jêh ri ton mra ƀư tĭng nâm nau păng hŏ ntăm.

Nơm oh mon Y-Abraham mâp H'Rêbêka

¹⁰ Nơm oh mon nây săch jât mlâm seh samô tâm phung seh kôranh păng jêh ri hăn trong, djôt leo ndrel lĕ ndơ khlay bơh ti kôranh păng ăn. Păng hăn tât ta n'gor Mêsôpôtami, lăp ta ƀon Y-Nahôr.

¹¹ Păng ăn seh samô drôm gŭ rlu padih ƀon, ta meng du ntu dak, dôl kêng mhaơ jêng nôk phung bu ur vay hăn luh bâk dak.

¹² Păng mbơh sơm: “Ơ Brah Yêhôva, Brah Ndu Y-Abraham kôranh gâp! Dăn ăn ma gâp tâm mâp nar aơ dơi jêng jêh ri dăn mpơl hom nau ueh ma kôranh gâp jêng Y-Abraham!

¹³ Aơ, gâp dâk ta meng ntu dak, jêh ri phung bu ur bơh phung ƀon lan tâm ƀon nây mra văch ta aơ bâk dak.

¹⁴ Mbu moh bu ur druh nôk gâp ngơi taơ: ‘Dăn bu ur nĕ rklêng yăng dak ăn gâp nhêt du mbâr,’ păng ơh: ‘May nhêt hom, gâp mra ăn seh samô may nhêt đŏng,’ nây ro jêng bu ur nơm Kôranh Brah mƀŏng jêh ma Y-Isăk, oh mon May. Tă bơh nau aơ gâp mra gĭt pô aơ Kôranh Brah hŏ mpơl jêh nau ueh ma kôranh gâp.”

¹⁵ Oh mon nây ê lôch ôh nau mbơh sơm, aơ, H'Rêbêka tuy yăng dak ta săng nglik jêh ri hăn. Păng jêng kon bu ur Y-Bêthuel. Y-Bêthuel jêng kon bu klâu H'Milka, ur Y-Nahôr; Y-Nahôr jêng oh Y-Abraham.

¹⁶ Bu ur druh nây ueh ngăn, hôm tang tat, mâu lĕ hŏ geh bu lup văng păng. Păng jŭr hăn trŭnh ta ntu dak, bâk dak bêng yăng păng jêh ri hăn hao tay.

¹⁷ Oh mon nây nchuăt tât tanăp măt păng jêh ri lah: “Dăn ay ăn gâp nhêt du mbâr dak tâm yăng ay.”

¹⁸ Bu ur lah: “Hơi kôranh, may nhêt dak hom,” jêh nây păng ndil ndal rklêng ro yăng nây jêh ri ăn păng nhêt.

¹⁹ Jêh ăn păng nhêt, bu ur nây ngơi tay: “Gâp mra bâk đŏng dak ăn phung seh samô nhêt, khân păng mra nhêt kŏ tât mpay.”

²⁰ Bu ur nây ndil ndal nkhŭt ro dak tă bơh yăng păng ta bong dơ dak jêh ri nchuăt trŭnh ta ntu dak gay bâk tay dak ăn ma lĕ rngôch seh samô nhêt.

²¹ Oh mon nây gŭ klăk uănh ma bu ur druh nây gay uănh mâm Brah Yêhôva ƀư nau hăn aơ dơi jêng mâu lah mâu.

²² Lah seh samô nhêt dak lôch jêh, nơm oh mon nây sŏk du mblo tôr mah klăp lah bar rse, jêh ri du kôp kông mah klăp lah pe jât rse

²³ jêh ri ôp bu ur druh nây: “Ăn gâp gĭt ay jêng mbu moh kon? Geh lĕ ntŭk tâm ngih mbơ̆ ay gay ăn hên rlu bê̆ch măng?”

²⁴ Bu ur lah: “Gâp jêng kon bu ur Y-Bêthuel, sau H'Milka đah Y-Nahôr.”

²⁵ Jêh nây bu ur ngơi tay: “Ngih hên geh âk rhe jêh ri gơ̆, nđâp ma ntŭk bê̆ch măng đŏng.”

²⁶ Nơm oh mon nây kŭnh bôk păng jêh ri chon mon tanăp măt Brah Yêhôva,

²⁷ jêh ri lah: “Lah ueh ma Brah Yêhôva, jêng Brah Ndu Y-Abraham jêng kôranh gâp! May geh nau ueh mro jêh ri răp jăp đah kôranh gâp! Bi ma gâp, Brah Yêhôva hŏ njŭn leo trong gâp tât ta ngih oh nâu kôranh gâp.”

²⁸ Bu ur druh nchuăt sĭt, nkoch lĕ nau hŏ tât jêh ăn ma lĕ ngih mê̆ păng gĭt.

Y-Laban jêh ri Y-Bêthuel ran vơt oh mon nây

²⁹ H'Rêbêka geh du huê nâu tâm amoh Y-Laban. Y-Laban nchuăt hăn ta ntŭk bunuyh oh mon, ta meng ntu dak.

³⁰ N'ho mhe saơ mblo tôr mah jêh ri du kôp kông ta ti oh bu ur, jêh ri tăng nau H'Rêbêka nkoch tay moh nau bunuyh nây ngơi, Y-Laban hăn tât ntŭk bunuyh nây jêh ri saơ păng hôm gŭ dăch kêng seh samô, êp ntu dak.

³¹ Păng lah: “Lăp hom tâm ngih nơm Brah Yêhôva ăn nau ueh uĭn! Mâm ƀư may gŭ padih aơ? Gâp hŏ ndrăp jêh ntŭk rlu ma may jêh ri nđâp ma lĕ phung seh samô.”

³² Bunuyh oh mon nây lăp tâm ngih. Y-Laban doh vơng ma seh samô, sŏk gơ̆ jêh ri rhe ăn ma lĕ phung seh samô jêh nây sŏk dak ăn ma bunuyh oh mon nây jêh ri phung bunuyh ndrel ma păng rao jâng.

³³ Ndơ sông sa hŏ ndrăp jêh, ƀiălah bunuyh oh mon nây lah: “Gâp mâu mra sa ôh kŏ tât nôk gâp dơi ngơi moh nau gâp ŭch lah.” Y-Laban lah: “Ngơi hom.”

³⁴ Păng lah: “Gâp jêng oh mon Y-Abraham.

³⁵ Brah Yêhôva hŏ ăn nau ueh uĭn âk ma kôranh gâp jêh ri ăn ma kôranh gâp jêng ndrŏng. Păng ăn ma kôranh gâp biăp ndrôk, prăk mah, phung oh mon bu klâu bu ur, seh samô jêh ri seh bri.

³⁶ H'Sara, ur kôranh gâp, nôk păng lĕ ranh jêh păng deh du huê kon bu klâu ma kôranh gâp jêh ri păng hŏ jao lĕ rngôch drăp ndơ păng ma kon bu klâu nây.

³⁷ Kôranh gâp lĕ đă gâp ton jêh: ‘May mâu mra nđăp ôh ur ma kon bu klâu gâp tâm phung kon bu ur Kanaan, tâm ntŭk gâp hôm gŭ,

³⁸ ƀiălah ăn may hăn ta ngih mbơ̆ gâp, tâm phung mpôl băl gâp, jêh ri nđăp du huê ur ăn ma kon bu klâu gâp.’

³⁹ Gâp hŏ lah ma kôranh gâp: ‘Klăp lah bu ur nây mâu mra ŭch tĭng ôh gâp.’

⁴⁰ Ƀiălah kôranh lah: ‘Brah Yêhôva jêng Nơm gâp pah kan mra njuăl tông mpăr tĭng may jêh ri kơl nau may hăn aơ dơi jêng. May mra nđăp ma kon bu klâu gâp du huê ur tâm ndŭl mpôl gâp, tă bơh ngih mbơ̆ gâp.

⁴¹ May mâu mra khan ôh nau ton đah gâp, lah may tât ta phung mpôl băl gâp; nđâp lah khân păng mâu ăn bunuyh ma may, may mâu mra khan ôh nau ton đah gâp.’

⁴² Nar aơ, lah tât jêh ntu dak, gâp geh mbơh sơm pô aơ: ‘Ơ Brah Yêhôva, Brah Ndu Y-Abraham, kôranh gâp! Dăn May kơl nau gâp hăn aơ dơi jêng.

⁴³ Aƀaơ aơ gâp gŭ râng dăch ntu dak aơ, tơlah geh bu ur druh văch luh bâk dak jêh ri gâp lah ma bu ur nây pô aơ: “Gâp dăn ma ay, ăn gâp nhêt djê̆ dak ta yăng ay.”

⁴⁴ Jêh ri păng ơh: “Nhêt dak hom, gâp mra bâk dak ăn ma lĕ phung seh samô may nhêt đŏng,” bu ur druh nây ro jêng nơm Brah Yêhôva mƀŏng jêh ma kon bu klâu kôranh gâp!’

⁴⁵ Ê hŏ lôch ôh nau gâp mbơh sơm êng, di nôk aơ đŏng H'Rêbêka văch tuy yăng păng ta săng nglik, hăn jŭr ta ntu dak gay bâk dak. Gâp lah ma păng: ‘Ăn gâp nhêt mbâr dak.’

⁴⁶ Păng gơnh rklĭng ro yăng bơh săng nglik jêh ri lah: ‘Nhêt hom, gâp mra ăn seh samô may nhêt đŏng.’ Pôri gâp nhêt jêh ri păng ăn nđâp ma lĕ phung seh samô nhêt đŏng.

⁴⁷ Gâp ôp: ‘Ay mbu moh kon?’ Păng lah: ‘Gâp jêng kon bu ur Y-Bêthuel, sau Y-Nahôr jêh ri H'Milka.’ Gâp nkăp mblo tôr ta trôm muh păng jêh ri dok du kôp kông ta ti păng.

⁴⁸ Gâp kŭnh bôk jêh ri chon mon tanăp măt Brah Yêhôva, tâm rnê ma Yêhôva Brah Ndu Y-Abraham kôranh gâp, Nơm hŏ njŭn leo jêh gâp tâm trong di gay săch mon bu ur, oh kôranh gâp jêng ur ma kon bu klâu păng.

⁴⁹ Aƀaơ aơ, tơlah khân may ŭch mpơl nau ueh jêh ri nau nanê̆ đah kôranh gâp, ăn khân may mbơh ma gâp gĭt. Tơlah mâu dơn ăt dăn mbơh ro, gay ma gâp gĭt ndrăp.”

⁵⁰ Y-Laban jêh ri Y-Bêthuel ơh: “Nau aơ luh bơh Brah Yêhôva, hên mâu dơi lah ôh ma may dơi mâu lah mâu.

⁵¹ Aơ, H'Rêbêka dôl gŭ tanăp măt may. May njŭn leo păng hăn, ăn păng jêng ur ma kon bu klâu kôranh may, tĭng nâm Brah Yêhôva lah jêh.”

⁵² Mhe tăng nau khân păng ngơi, oh mon Y-Abraham chon mon mbah ma Brah Yêhôva.

⁵³ Oh mon nây rhi lĕ ndơ nkrơ̆ ƀư ma prăk, mah jêh ri kho ao ăn ma H'Rêbêka; oh mon nây rhi đŏng lĕ ndơ khlay ăn ma nâu jêh ri ma me păng.

⁵⁴ Jêh nây oh mon jêh ri phung bunuyh hăn ndrel, sông sa nhêt jêh ri bê̆ch măng ta nây. Tât ang ôi taơ, dôl khân păng dâk bê̆ch, oh mon nây lah: “Ăn gâp plơ̆ sĭt ma kôranh gâp.”

⁵⁵ Ƀiălah nâu jêh ri mê̆ bu ur lah: “Ăn mon aơ gŭ ndrel hên ntop djê̆ nar đŏng, klăp lah tâm jât nar ri mơ păng mra hăn.”

⁵⁶ Oh mon nây lah: “Lơi ta nkân gâp ôh, yorlah Brah Yêhôva hŏ ăn nau gâp hăn aơ dơi jêng jêh. Ăn gâp hăn trong gay dơi sĭt ma kôranh gâp.”

⁵⁷ Khân păng lah: “Hên mra kuăl bu ur druh jêh ri ôp nau mĭn păng.”

⁵⁸ Khân păng kuăl H'Rêbêka jêh ri ôp: “Ay ŭch hăn lĕ ndrel ma bunuyh aơ bơh?” Păng lah: “Gâp ŭch hăn.”

⁵⁹ Pôri khân păng ăn oh mon bu ur khân păng H'Rêbêka jêh ri bunuyh sâm mpu păng hăn trong nđâp ma bunuyh oh mon Y-Abraham jêh ri phung bunuyh hăn ndrel.

⁶⁰ Khân păng ăn nau ueh uĭn ma H'Rêbêka pô aơ: “Hơi oh bu ur hên ơi! Ăn ay dơi jêng me Ma rmưn rsen bunuyh, Jêh ri noi deh ay dơi pit in Mpông ƀon phung tahan rlăng.”

⁶¹ H'Rêbêka nđâp ma lĕ oh mon bu ur kơl kan păng dâk, ncho seh samô jêh ri hăn tĭng bunuyh oh mon nây. Pôri, oh mon Y-Abraham leo H'Rêbêka hăn trong.

H'Rêbêka jêng ur Y-Isăk

⁶² Rnôk nây, Y-Isăk dôl gŭ ta Nêgep jêh ri tă bơh ntu dak Bêr-Lahai-Roi plơ̆ sĭt.

⁶³ Kêng mhaơ, Y-Isăk hăn luh ta mir gay gŭ mĭn. Păng n'gơr măt jêh ri saơ, geh phung seh samô văch dăch.

⁶⁴ H'Rêbêka n'gơr măt đŏng jêh ri saơ Y-Isăk. Păng jŭr ro tă klơ seh samô,

⁶⁵ jêh ri ôp bunuyh oh mon: “Mbu moh bu klâu hăn rgăn tâm mir gay ran chuă he?” Oh mon lah: “Nây jêng kôranh gâp.” H'Rêbêka sŏk bok nkŭm muh măt păng.

⁶⁶ Bunuyh oh mon nkoch tay ma Y-Isăk lĕ nau păng ƀư jêh.

⁶⁷ Y-Isăk leo H'Rêbêka tâm ngih bok H'Sara, me păng, sŏk H'Rêbêka jêng ur jêh ri rŏng ma păng. Pôri, Y-Isăk geh nau bonh leng jêh khĭt me păng.