Nau Ntơm 21 - Nau Brah Ndu Ngơi 2023

Nau deh ma Y-Isăk

¹ Brah Yêhôva khâl H'Sara nâm bu nau Păng hŏ lah, jêh ri ƀư ma H'Sara nâm bu nau Păng hŏ ton jêh.

² H'Sara ntreo, deh ăn ma Y-Abraham du huê kon bu klâu nôk păng lĕ ranh ngăn, di tĭng khay năm Brah Ndu hŏ ton ma păng.

³ Y-Abraham ntơ kon bu klâu H'Sara deh ăn ma păng jêng Y-Isăk.

⁴ Lah Y-Isăk geh pham nar jêh, Y-Abraham koh ntâu ma kon bu klâu păng, tĭng nâm nau Brah Ndu hŏ ntĭnh ntăm jêh ma păng.

⁵ Y-Isăk deh nôk Y-Abraham lĕ geh du rhiăng năm jêh.

⁶ H'Sara lah: “Brah Ndu ăn nau gơm ma gâp, mbu moh tăng mra răm rhơn ma gâp.”

⁷ Păng lah tay: “Mbu nănh lah ma Y-Abraham pô aơ H'Sara mra ăn kon pu toh? Lŏng aƀaơ ri gâp hŏ deh du huê kon bu klâu ma Y-Abraham dôl păng lĕ ranh jêh.”

Mprơh H'Agar jêh ri Y-Ismaêl bu mprơh bơh ngih

⁸ Tât Y-Isăk văch ma toyh jêh ri chalơi pu toh. Tâm nar kon se jê̆ chalơi pu toh, Y-Abraham nkra nau nhêt sa toyh.

⁹ H'Sara saơ kon bu klâu H'Agar, bu ur Êjipt, hŏ deh ăn ma Y-Abraham gơm mưch ma Y-Isăk,

¹⁰ pôri H'Sara lah ma Y-Abraham: “May mprơh hom bu ur kơl kan aơ jêh ri kon bu klâu păng yorlah kon bu klâu bu ur kơl kan aơ mâu mra ndơn drăp ôh ndrel ma Y-Isăk, kon bu klâu gâp.”

¹¹ Nau ngơi nây ƀư ăn Y-Abraham rngot hâu ngăn yor nây jêng kon bu klâu păng.

¹² Ƀiălah Brah Ndu lah ma Y-Abraham: “May lơi ir rngot ôh yor ma kon bu klâu jêh ri bu ur kơl kan may. Moh nau H'Sara de lah, may iăt nau păng, yorlah bơh Y-Isăk, mra geh du noi deh dơi rnha tĭng amoh may.

¹³ Gâp mra njêng đŏng ma kon bu klâu bơh bu ur kơl kan aơ dơi jêng du phung ƀon lan, yorlah păng jêng kon may đŏng.”

¹⁴ Ang ôi taơ, Y-Abraham dâk ơm ôi, sŏk piăng let jêh ri du nông dak ăn ma H'Agar. Păng dơm lĕ ntil ndơ nây ta klơ săng nglik H'Agar, ăn kon bu klâu ma păng jêh nây đă păng hăn. H'Agar hăn du, nsong blêng tâm bri rdah Bêr-Sêba.

¹⁵ Lah dak tâm nông păng hŏ lĕ jêh, păng chalơi êng kon jê̆ păng ta nâm ƀŭr si

¹⁶ jêh nây păng nơm hăn jêh ri gŭ mpeh tra năp, ƀah ma kon se nây klăp truyh pănh ma hăr, yorlah păng lah: “Lơi ôh ăn gâp saơ khĭt kon gâp!” Dôl păng gŭ tâm tham tra năp nĕ, păng nhĭm nter.

¹⁷ Brah Ndu tăng bâr kon se nhĭm, tông mpăr Brah Ndu bơh klơ trôk kuăl H'Agar jêh ri lah: “H'Agar, moh geh nau ma ay? Lơi klach ôh! Yorlah Brah Ndu lĕ tăng jêh bâr kon se jê̆ nhĭm ta ntŭk păng gŭ nây.

¹⁸ Ay dâk hom, têk kon jê̆ ay jêh ri ut ra-u păng tâm ti, yorlah gâp mra ăn păng jêng du phung mpôl băl toyh.”

¹⁹ Brah Ndu pơk ăn măt H'Agar lin jêh ri păng saơ du ntu dak. Păng bâk dak bêng nông ntâu jêh djôt ăn kon jê̆ nhêt.

²⁰ Brah Ndu gŭ ndrel ma kon se jê̆. Păng let ma toyh rêh tâm bri rdah jêh ri dơi jêng du huê bunuyh blau pănh na.

²¹ Y-Ismaêl rêh tâm bri rdah Paran. Mê̆ păng nđăp păng đah ur bu ur n'gor Êjipt.

Y-Abraham tâm rnglăp đah Y-Abimêlek ta Bêr-Sêba

²² Rnôk nây, hađăch Abimêlek jêh ri Y-Pikôl jêng kôranh tahan, lah ma Y-Abraham: “Brah Ndu kơl may tâm lĕ kan may ƀư.

²³ Yor nây aƀaơ aơ, tanăp măt Brah Ndu ăn may ton ma gâp pô aơ may mâu ôh mra ndơm gâp, kon sau mâu lah noi deh gâp, ƀiălah may mra ƀư ueh ma gâp jêh ri ma n'gor may gŭ njưh ăt ƀư ueh ngăn ngên, tâm ban ma gâp hŏ ƀư ueh ma may.”

²⁴ Y-Abraham ơh: “Gâp dăn ton.”

²⁵ Jêh nây, Y-Abraham geh nau njang mbung đah hađăch Abimêlek ma ntu dak geh phung oh mon Y-Abimêlek pit rvan.

²⁶ Y-Abimêlek lah: “Gâp mâu gĭt ôh mbu ƀư nau nây. May mâu đŏng mbơh ma gâp gĭt, kŏ tât nar aơ mhe gâp gĭt.”

²⁷ Y-Abraham sŏk biăp jêh ri ndrôk, ăn dơm ma hađăch Abimêlek jêh nây bar hê ƀư tâm rnglăp ndrel.

²⁸ Y-Abraham săch ăn êng pơh mlâm kon biăp me tâm mpôl.

²⁹ Y-Abimêlek ôp Y-Abraham: “May săch ăn êng pơh mlâm kon biăp me nây moh ƀư mêh?”

³⁰ Y-Abraham ơh: “hađăch dơn bơh ti gâp pơh mlâm kon biăp me aơ tâm ban du nau mbơh pô aơ gâp lĕ kuyh jêh ntu dak aơ.”

³¹ Yor nây, bu kuăl ntŭk aơ jêng Bêr-Sêba; yor ta ntŭk nây khân păng bar hê lĕ tâm ton ndrel jêh.

³² Lôch jêh nau khân păng bar hê ƀư nau tâm rnglăp ndrel ta Bêr-Sêba, hađăch Abimêlek jêh ri kôranh tahan Y-Pikôl hăn sĭt ta n'gor Philistin.

³³ Y-Abraham tăm du tơm mĭl ta Bêr-Sêba, jêh ri ta nây păng kuăl mbơh sơm ma amoh Brah Yêhôva, jêng Brah Ndu gŭ rêh n'ho ro.

³⁴ Y-Abraham gŭ jŏ nar tâm n'gor phung Philistin.