Nau Ntơm 20 - Nau Brah Ndu Ngơi 2023

Y-Abraham jêh ri hađăch Abimêlek

¹ Tă bơh nây, Y-Abraham hăn trŭnh n'gor Nêgep, păng gŭ vah vang Kadês jêh ri Sur. Dôl păng gŭ njưh ta Gêrar,

² Y-Abraham nkoch H'Sara đah bu, ur păng pô aơ: “Păng jêng oh bu ur gâp.” Yor nây, Y-Abimêlek hađăch ƀon Gêrar, mprơh bu hăn sŏk H'Sara.

³ Ƀiălah tâm nôk măng, Brah Ndu tâm mpơl ma Y-Abimêlek tâm nau mbơi jêh ri lah ma păng: “May mra khĭt yor bu ur may hŏ nhŭp. Păng lĕ geh sai jêh.”

⁴ Hađăch Abimêlek ê hŏ ôh hăn dăch H'Sara rĭ dĭng păng lah: “Ơ Kôranh Brah, May ƀư rai đŏng ƀơh du mpôl băl sŏng?

⁵ Mâu di hĕ Y-Abraham hŏ lah ma gâp: ‘Păng jêng oh bu ur gâp?’ Jêh ri păng nơm đŏng lah: ‘Păng jêng nâu gâp.’ Gâp ƀư jêh nau aơ đah nuih n'hâm sŏng jêh ri ti gâp mâu ôh geh tih.”

⁶ Brah Ndu lah ma hađăch tâm nau mbơi: “Gâp gĭt may ƀư nau nây ma nuih n'hâm sŏng. Yor nây, Gâp nơm yơh hŏ mâu ăn may ƀư tih đah Gâp, jêh ri mâu ăn ôh may pah păng.

⁷ Aƀaơ, mplơ̆ tay hom păng ma sai păng nơm, yorlah sai păng jêng du huê nơm mbơh lor, păng mra mbơh sơm an ma may jêh ri may mra dơi rêh. Ƀiălah tơlah may mâu mplơ̆ ôh păng sĭt, ăn may gĭt may mra khĭt ngăn ro, nđâp lĕ rngôch bunuyh tâm ngih may.”

⁸ Y-Abimêlek dâk ơm ôi, kuăl rgum lĕ rngôch phung oh mon păng, jêh ri nkoch mbơh ma khân păng lĕ nau nây. Lĕ rngôch bunuyh klach hâu ngăn.

⁹ Jêh nây, Y-Abimêlek kuăl Y-Abraham, jêh ri lah: “Moh nau may hŏ ƀư ma hên kơt nây? Moh nau mâu di gâp lĕ ƀư đah may dĭng may ƀư đah gâp jêh ri lĕ bri dak gâp dơn nau tih toyh kơt nây? May hŏ ƀư ma gâp lĕ nau bu mâu vay ôh ƀư.”

¹⁰ Y-Abimêlek ôp tay Y-Abraham: “Moh nau may mĭn kŏ tât may ƀư kơt nây mêh?”

¹¹ Y-Abraham ơh: “Gâp ƀư pônây, yor gâp mĭn tâm n'gor aơ mâu mâp geh ôh bunuyh klach yơk ma Brah Ndu. Klăp lah khân păng mra nkhĭt gâp yor ur gâp.

¹² Ngăn ya păng jêng oh bu ur gâp đŏng, oh du mbơ̆ êng êng mê̆; ƀiălah gâp lĕ nđăp jêh păng jêng ur gâp.

¹³ Dôl Brah Ndu ƀư ăn gâp nsong ngai du luh bơh ngih mbơ̆ gâp, gâp geh lah ma păng: ‘Aơ jêng nau ueh ay mpơl nau rŏng ma gâp: Tâm ăp ntŭk he hăn, ăn ay lah gâp jêng nâu ay.’”

¹⁴ Hađăch Abimêlek djôt leo biăp, ndrôk, phung oh mon bu klâu, bu ur ăn ma Y-Abraham, jêh ri mplơ̆ sĭt H'Sara ur păng ma păng nơm.

¹⁵ Y-Abimêlek lah: “Aơ, n'gor gâp prăp ăn ma may, moh ntŭk may ŭch, may gŭ ta nây.”

¹⁶ Jêh nây hađăch lah ma H'Sara: “Aơ, gâp ăn ma nâu ay du rbăn rnglay prăk; aơ jêng bok nkŭm măt lĕ rngôch bunuyh gŭ ndrel ay, jêh ri ay mra dơi kơp gŭ sŏng tanăp măt lĕ rngôch bunuyh.”

¹⁷ Jêh nau nây, Y-Abraham mbơh sơm dăn Brah Ndu jêh ri Brah Ndu ƀư bah Y-Abimêlek, ur păng, nđâp phung oh mon bu ur hađăch gay khân păng dơi geh kon.

¹⁸ Ƀiălah, yor nau H'Sara, ur Y-Abraham, rĭ dĭng Brah Yêhôva hŏ ƀư ma dĭng lĕ bu ur tâm ngih hađăch Abimêlek mâu geh deh kon.