Nau Ntơm 2 - Nau Brah Ndu Ngơi 2023

Njêng jêh ri ƀư kloh ueh nar tal pơh.

¹ Pônây yơh, trôk neh jêh ri lĕ ntil mpô mpa hŏ njêng lôch jêh.

² Nar tal pơh, Brah Ndu ƀư lôch lĕ nau kan Păng hŏ ƀư jêh. Yor ri, tâm nar tal pơh Păng rlu. Păng hŏ ƀư lôch jêh lĕ nau kan.

³ Păng ăn nau ueh uĭn ma nar tal pơh jêh ri ƀư nar nây jêng nar kloh ueh, yor tâm nar nây Păng rlu tơlah hŏ lôch jêh lĕ nau kan rhăk njêng.

⁴ Nây jêng nau ntơm ma nau rhăk njêng trôk jêh ri neh ntu. Tơlah Yêhôva Brah Ndu rhăk njêng trôk jêh ri neh ntu,

N'gar trao Êđen

⁵ pôri ta klơ neh ê hŏ geh tơm si hon tâm ndrêch jêh ri ê hŏ geh đŏng gơ̆ hon tâm mir, yor Yêhôva Brah Ndu ê hŏ ăn ôh dak mih tŭp ta neh, jêh ri ê hŏ geh đŏng bunuyh chuar rli neh.

⁶ Ƀiălah geh n'hôl dak bơh tâm dâng neh n'hôl let klơ, djrah lam klơ neh.

⁷ Rnôk nây, Yêhôva Brah Ndu sŏk ndruyh neh mon jêng rup bunuyh, khôm n'hâm nau rêh tâm trôm muh, pôri bunuyh plơ̆ jêng huêng rêh.

⁸ Jêh nây, Yêhôva Brah Ndu njêng du ntŭk n'gar trao Êđen, ta mpeh luh nar, jêh ri dơm bunuyh Păng hŏ njêng ta nây.

⁹ Yêhôva Brah Ndu ƀư ăn neh hon ăp ntil tơm si ueh măt uănh jêh ri sa kah. Ta nklang n'gar trao geh tơm si nau rêh jêh ri geh tơm si gĭt nau ueh, nau mhĭk.

¹⁰ Du n'hong dak krong hoch bơh Êđen gay djrah n'gar trao, jêh ri bơh nây nkhah jêng puăn n'hor.

¹¹ N'hor tal nguay jêng Pisôn, n'hor nây hoch jŭm n'gor Havila, jêng ntŭk geh mah.

¹² Mah ta n'gor aơ ueh ngăn; ta nây hôm geh ntăk si ƀâu kah jêh ri lŭ khlay jaspidi.

¹³ N'hor tal bar amoh Gihôn, hoch jŭm n'gor Kus.

¹⁴ N'hor tal pe amoh Tigris, hoch mpeh luh nar n'gor Asiri. Bi ma n'hor tal puăn jêng dak krong Ơphrat.

¹⁵ Yêhôva Brah Ndu leo bunuyh lăp tâm n'gar trao Êđen gay tuch tăm jêh ri mât mray n'gar trao.

¹⁶ Yêhôva Brah Ndu ntrŭnh ntăm ma bunuyh pô aơ: “May dơi dah ŭch sa lĕ ntil tơm play tâm n'gar trao,

¹⁷ ƀiălah play tơm si gĭt nau ueh jêh ri nau mhĭk, may mâu dơi ôh sa, yorlah moh nar may sa play tơm si nây, nanê̆ may mra khĭt.”

Njêng nau tâm nsông

¹⁸ Yêhôva Brah Ndu lah: “Kon Bunuyh gŭ êng du huê mâu ueh ôh. Gâp mra njêng du huê bunuyh kơl tâm di đah păng.”

¹⁹ Yêhôva Brah Ndu sŏk neh mon njêng lĕ rngôch mpô mpa bri jêh ri sĭm klơ trôk, jêh nây njŭn leo tanăp măt bunuyh gay uănh mâm bunuyh ntơ khân păng, jêh ri moh săk bunuyh sâm ntơ ma ăp ntil mpa rêh jêng ntơ êng da dê ma păng.

²⁰ Y-Ađam ntơ ma lĕ rngôch mpô mpa rong jêh ri sĭm klơ trôk nđâp ma lĕ rngôch mpô mpa bri; ƀiălah bi ma Y-Ađam nơm mâu dơi joi du huê nuyh kơl tâm di đah păng.

²¹ Yêhôva Brah Ndu ƀư ăn Y-Ađam lêt bê̆ch, jêh ri sŏk du mlâm nting rpaih, jêh nây sŏk mlay njĭr tay.

²² Yêhôva Brah Ndu dŏng du mlâm nting rpaih hŏ sŏk tă bơh Y-Ađam njêng du huê bu ur jêh ri njŭn tât ma Y-Ađam.

²³ Y-Ađam lah: “Aƀaơ mơ geh bunuyh aơ, Nting bơh nting gâp, mlay bơh mlay gâp. Bu mra rnha păng jêng bu ur, Yorlah geh tă bơh bu klâu.”

²⁴ Yor ri, bu klâu mra chalơi mê̆ mbơ̆ gay tâm krêp đah ur păng, jêh ri lĕ bar hê jêng du nglay săk.

²⁵ Y-Ađam jêh ri ur păng, lĕ bar hê rhôk da dê ƀiălah mâu geh nau prêng ôh.