Nau Ntơm 14 - Nau Brah Ndu Ngơi 2023

Nau tâm lơh phung hađăch ndrăng hađăch

¹ Tâm rnôk Y-Amraphel ƀư hađăch n'gor Sinar, Y-Ariôk ƀư hađăch ƀon Êlasar, Y-Kêdôr-lômer ƀư hađăch ƀon Êlam, jêh ri Y-Tidal ƀư hađăch ƀon Gôim,

² khân păng tâm lăp băl ŭch tâm lơh đah Y-Bêra hađăch ƀon Sôdôm, Y-Birsa hađăch ƀon Gômôrơ, Y-Sinap hađăch ƀon Adma, Y-Sêmêber hađăch ƀon Sêbôim, jêh ri hađăch ƀon Bêla, jêng Sôar.

³ Prăm hađăch lĕ nkoch jêh khân păng rgum băl ta rlŭng Siđim, jêng Dak Mƀŭt Khĭt.

⁴ Khân păng hŏ tông bâr hađăch Kêdôr-lômer tâm jât ma bar năm, ƀiălah tât năm jât mpe, khân păng ƀư nau tâm rdâng.

⁵ Tât năm jât mpuăn, Y-Kêdôr-lômer jêh ri phung hađăch mpeh băl păng djôt leo tahan hăn tâm lơh đah phung Rêphaim ta Astarôt-Karnam, phung Susim ta ntŭk Ham, phung Êmim ta neh lâng Savê-Kiriathaim,

⁶ jêh ri phung Hôrit tâm n'gor dor yôk Sêir, n'hot tât ta Êl-Paran, êp ta n'har bri đah bri rdah.

⁷ Jêh nây khân păng plơ̆ sĭt ta Dak N'hor Phat Dôih, jêng Kadês, hăn pit lĕ n'gor phung Amalek jêh ri phung Amôrit dôl gŭ ta Hasasôn Tamar.

⁸ Phung hađăch ƀon Sôdôm, Gômôrơ, Adma, Sêbôim jêh ri Bêla, jêng ƀon Sôar, tâm rnglăp ndrel nau dơi jêh ri dăp tahan khân păng ta rlŭng Siđim

⁹ gay tâm rdâng đah hađăch Kêdôr-lômer ƀon Êlam, hađăch Tidal ƀon Gôim, hađăch Amraphel ƀon Sinar, jêh ri hađăch Ariôk ƀon Êlasar; tâm puăn nuyh hađăch dơi lơn tâm lơh đah prăm nuyh hađăch.

¹⁰ Tâm rlŭng Siđim geh âk ntu dâng dak chai blĭt; nôk tâm lơh dơi bu du nchuăt, hađăch ƀon Sôdôm jêh ri hađăch ƀon Gômôrơ tŭp tâm ntu nây, phung hôm e nchuăt du hao klơ yôk.

¹¹ Puăn hađăch nây sŏk lĕ drăp ndơ jêh ri ndơ sông sa Sôdôm jêh ri Gômôrơ, jêh nây hăn sĭt.

¹² Khân păng nhŭp đŏng Y-Lot, mon Y-abram, dôl gŭ ta Sôdôm, djôt leo nđâp ma drăp ndơ păng.

Y-Abram rklaih Y-Lot

¹³ Geh du huê nơm dơi klaih văch mbơh ma Y-Abram, bunuyh Hêbrơ. Y-Abram dôl gŭ rêh dăch ndru tơm guyh ta Mamrê, bunuyh Amôrit, nâu Y-Êskôl jêh ri Y-Aner; lĕ pe nuyh aơ khân păng tâm rnglăp jêh đah Y-Abram.

¹⁴ Tơlah Y-Abram tăng lư bu nhŭp jêh mon păng, Y-Abram rgum lĕ phung pah kan hŏ nti jêh, geh pe rhiăng jât pham bunuyh, jêh ri hăn tĭng rgot phung hađăch nây tât ta ƀon Dan.

¹⁵ Y-Abram tâm pă tahan, nôk măng ăn phung oh mon hăn lơh jêh ri hăn tĭng lơh phung rlăng tât ta ƀon Hôba, gŭ mpeh bơh lơ ƀon Damas.

¹⁶ Păng sŏk sĭt lĕ rngôch drăp ndơ, jêh ri njŭn Y-Lot mon păng nđâp ma drăp ndơ, phung bu ur jêh ri phung ƀon lan plơ̆ sĭt.

Y-Mêlkisedek

¹⁷ Jêh Y-Abram dơi tâm lơh đah Y-Kêdôr-lômer jêh ri lĕ phung hađăch ndrel ma păng plơ̆ sĭt, hađăch ƀon Sôdôm luh hăn vơt Y-Abram ta rlŭng Savê, jêng rlŭng Hađăch.

¹⁸ Mêlkisedek, hađăch ƀon Salem, ăt jêng kôranh ƀư brah ma Brah Ndu Dŭt Prêh, djôt leo piăng let jêh ri ndrănh hăn vơt,

¹⁹ jêh ri ăn nau ueh uĭn ma Y-Abram. Păng lah: “Dăn ma Brah Ndu Dŭt Prêh, Nơm rhăk njêng trôk jêh ri neh ntu, Ăn nau ueh uĭn ma Y-Abram!

²⁰ Tâm rnê ma Brah Ndu Dŭt Prêh Nơm hŏ jao phung rlăng tâm ti may!” Y-Abram nhhơr ma hađăch du kô̆ tâm jât lĕ ndơ sŏk jêh.

²¹ Hađăch ƀon Sôdôm lah ma Y-Abram: “May knŏng jao tay bunuyh ma gâp, bi ma drăp ndơ may djôt prăp.”

²² Ƀiălah Y-Abram lah ma hađăch ƀon Sôdôm: “Gâp hŏ yơr ti tanăp măt Yêhôva Brah Ndu Dŭt Prêh, Nơm rhăk jêng trôk jêh ri neh ntu, jêh ri ton pô aơ

²³ gâp mâu geh sŏk ôh moh ntil ndơ bơh hađăch, mâu lah du njăr rse brai, mâu lah du njăr rse kât ntâu jot kađôi, klach lah hađăch lah: ‘Gâp n'hao drŏng ma Y-Abram’.

²⁴ Gâp mâu dơn du ntil ndơ ôh knŏng moh ndơ phung ndăm gâp lĕ sa, jêh ri ndơ pă ma phung hăn ndrel ma gâp, jêng Y-Aner, Y-Êskôl jêh ri Y-Mamrê; ăn hom ma khân păng dơn ndơ khân păng nơm.”