Nau Ntơm 13 - Nau Brah Ndu Ngơi 2023

Y-Abram jêh ri Y-Lot tâm nkhah

¹ Tă bơh Êjipt, Y-Abram leo ur păng jêh ri lĕ drăp ndơ păng geh ndrel ma Y-Lot hăn hao n'gor Nêgep.

² Y-Abram ndrŏng ngăn geh âk mpô mpa rong, prăk jêh ri mah.

³ Tă bơh Nêgep, păng hăn nsong plơ̆ sĭt ta Bêthel, tât ntŭk păng hŏ ndâk ngih bok lor, vah vang Bêthel jêh ri ƀon Ai,

⁴ jêng ntŭk păng ntơm ndâk nơng ƀư brah. Ta aơ, Y-Abram kuăl mbơh sơm ma amoh Brah Yêhôva.

⁵ Y-Lot, bunuyh hăn ndrel Y-Abram, geh âk đŏng biăp, ndrôk, jêh ri ngih bok.

⁶ Tâm n'gor nây mâu tŏng ntŭk ma bar hê gŭ nsum, yorlah drăp ndơ khân păng âk ngăn, kŏ tât mâu dơi rêh ndrel.

⁷ Lơ hô đŏng, phung chiăp biăp Y-Abram jêh ri Y-Lot tâm djrel ndrăng nơm. Rnôk nây phung Kanaan jêh ri phung Pêrisit hôm gŭ tâm n'gor nây.

⁸ Pôri, Y-Abram lah ma Y-Lot: “He jêng noi deh du mham, gâp jêh ri đah may, phung chiăp biăp gâp jêh ri phung chiăp biăp may, lơi hôm tâm djrel ndrăng nơm ôh.

⁹ Mâu di hĕ lĕ rngôch n'gor dôl gŭ tanăp măt may? Ăn may tâm nkhah hom bơh gâp. Tơlah may săch mpeh chiau, gâp mra gŭ mpeh pa ma; tơlah may săch mpeh pa ma, gâp mra gŭ mpeh pa chiau.”

¹⁰ Y-Lot n'gơr măt uănh jêh ri saơ lam neh lâng dak krong Yurdan tât ta ƀon Sôar. Êlor ma Brah Yêhôva ƀư rai ƀon Sôdôm jêh ri Gômôrơ, n'gor aơ ăp ntŭk geh dak da dê tâm ban ma n'gar trao Brah Yêhôva, nâm bu neh Êjipt đŏng.

¹¹ Y-Lot săch ma păng nơm lĕ neh lâng dak krong Yurdan jêh ri mpeh luh nar. Pôri, bar hê va mon khân păng tâm nkhah băl.

¹² Y-Abram gŭ rêh tâm n'gor Kanaan, bi ma Y-Lot gŭ tâm lĕ ƀon ta neh lâng jêh ri trơn ngih bok păng tât ta Sôdôm.

¹³ Phung bunuyh Sôdôm djơh mhĭk ngăn jêh ri ƀư tih toyh đah Brah Yêhôva.

Nau Brah Ndu ton ma Y-Abram

¹⁴ Jêh Y-Lot tâm nkhah bơh Y-Abram, Brah Yêhôva lah ma Y-Abram: “Bơh ntŭk may dôl dâk, n'gơr hom măt uănh lam puăn njônh, mpeh luh nar, mpeh nhâp nar, mpeh bơh dâng jêh ri mpeh bơh lơ.

¹⁵ Lĕ rngôch n'gor neh may saơ, Gâp mra ăn ma may jêh ri ma noi deh may tât n'ho ro.

¹⁶ Gâp mra ƀư ma noi deh may jêng âk tâm ban ndruyh klơ neh; tơlah mbu nơm dơi kơp ndruyh klơ neh ri mơ dơi kơp đŏng noi deh may.

¹⁷ Kay lŏng, ăn may hăn lam ndah jong, ndah huy n'gor aơ, yorlah Gâp mra ăn n'gor aơ ma may.”

¹⁸ Y-Abram trơn ngih bok păng hăn gŭ dăch ndru tơm guyh ta Mamrê, êp Hêbron, jêh ri ndâk ta nây du mlâm nơng ƀư brah ma Brah Yêhôva.