Nau Ntơm 11 - Nau Brah Ndu Ngơi 2023

Ngih gung Ƀaƀel

¹ Rnôk nây lĕ rngôch jŭm bri văr neh ntu geh du ntil nau ngơi jêh ri dŏng nsum du rplay ngơi.

² Tă bơh mpeh Luh Nar, khân păng dâk hăn jêh ri saơ du ntŭk neh lâng tâm n'gor Sinar jêh ri gŭ ta nây.

³ Khân păng tâm lah ndrăng khân păng nơm: “Kay lŏng, ăn he ƀư ƀrĭk jêh ri gŭch kroh tâm ŭnh.” Rnôk nây, bu dŏng ƀrĭk ntrok ma lŭ, jêh ri dak chai ƀlĭt ƀitumen ntrok ma ndơ mon krêp.

⁴ Khân păng lah: “Kay lŏng, ăn he ƀư ma he nơm du mlâm ƀon toyh jêh ri ndâk du mlâm ngih gung geh chor prêh tât ta trôk, gay ma he geh nau lư n'găr jêh ri mâu geh ôh nhhêng nhhiang lam klơ neh.”

⁵ Brah Yêhôva jŭr uănh ƀon toyh jêh ri ngih gung phung kon bunuyh dôl ntơm ndâk.

⁶ Brah Yêhôva lah: “Aơ, khân păng jêng du phung ƀon lan, nsum du nau ngơi. Khân păng mhe ntơm ƀư, ƀiălah hŏ jêng kơt nĕ jêh pôri pakơi taơ moh nau kan khân păng hŏ ŭch mĭn ƀư mra dơi ƀư lĕ rngôch.

⁷ Găp jêh! Ăn He jŭr hom, ƀư tâm rlŭk nau ngơi khân păng, gay ma khân păng mâu dơi gĭt rbăng nau ngơi ndrăng khân păng nơm.”

⁸ Jêh nây tă bơh ntŭk nây, Brah Yêhôva ƀư ma phung bunuyh nchah du êng êng lam ntŭk klơ neh ntu, jêh ri khân păng rlu lơi nau ndâk ƀon toyh nây.

⁹ Yor ri, ntŭk nây dơi rnha jêng Ƀaƀel, yorlah ta nây Brah Yêhôva ƀư tâm rlŭk lĕ rngôch nau ngơi ta neh ntu, jêh ri ntơm bơh nây Păng ƀư ma phung bunuyh nchah du êng êng lam bri klơ neh ntu.

Chô yau phung Israel ntơm bơh Y-Abraham tât ma Y-Yôsep ( 11:10 – 50:26 ) Noi deh Y-Abram

¹⁰ Aơ jêng noi deh Y-sem. Bar năm pakơi jêh dak lêng, Y-Sem geh du rhiăng năm, bă Y-Arpaksat.

¹¹ Jêh deh Y-Arpaksat, Y-Sem hôm dơi rêh prăm rhiăng năm, bă tay kon bu klâu jêh ri kon bu ur.

¹² Y-Arpaksat geh pe jât mprăm năm, deh Y-Sêla.

¹³ Jêh deh Y-Sêla, Y-Arpaksat hôm gŭ rêh puăn rhiăng pe năm, deh kon bu klâu kon bu ur.

¹⁴ Lah Y-sêla geh pe jât năm, deh Y-Êber.

¹⁵ Jêh deh Y-Êber, Y-Sêla hôm dơi rêh puăn rhiăng ma pe năm, deh tay kon bu klâu kon bu ur.

¹⁶ Y-Êber geh pe jât puăn năm, deh Y-Pêlek.

¹⁷ Jêh deh Y-Pêlek, Y-Êber hôm gŭ rêh puăn rhiăng pe jât năm, bă tay kon bu klâu kon bu ur.

¹⁸ Y-Pêlek geh pe jât năm, deh Y-Rêu.

¹⁹ Jêh deh Y-Rêu, Y-Pêlek hôm gŭ rêh bar rhiăng ma sĭn năm, bă tay kon bu klâu kon bu ur.

²⁰ Y-Rêu geh pe jât ma bar năm, deh Y-Sêruk.

²¹ Jêh deh Y-Sêruk, Y-Rêu hôm gŭ rêh bar rhiăng pơh jât năm, bă tay kon bu klâu kon bu ur.

²² Y-Sêruk geh pe jât năm, deh Y-Nahôr.

²³ Jêh deh Y-Nahôr, Y-Sêruk hôm gŭ rêh bar rhiăng năm, bă tay kon bu klâu kon bu ur.

²⁴ Y-Nahôr geh bar jât msĭn năm, deh Y-Têra.

²⁵ Jêh geh Y-Têra, Y-Nahôr hôm gŭ rêh du rhiăng jât msĭn năm, bă tay kon bu klâu kon bu ur.

²⁶ Bi ma Y-Têra geh pơh jât năm, deh Y-Abram, Y-Nahôr jêh ri Y-Haran.

Noi deh Y-Têra

²⁷ Aơ jêng noi deh bơh Y-Têra: Y-Têra bă Y-Abram, Y-Nahôr jêh ri Y-Haran; Y-Haran bă Y-Lot.

²⁸ Y-Haran khĭt ta ƀon tơm păng nơm, jêng ta ƀon Ur, tâm n'gor Kaldê, nôk mbơ̆ păng jêng Y-Têra hôm rêh.

²⁹ Y-Abram jêh ri Y-Nahôr nđăp ur; ur Y-Abram amoh H'Sarai, bi ma ur Y-Nahôr amoh H'Milka. H'Milka jêh ri H'Iska jêng kon bu ur Y-Haran.

³⁰ H'Sarai jêng bu ur mâu geh kon.

³¹ Y-Têra leo Y-Abram, kon bu klâu păng, Y-Lot, kon bu klâu Y-Haran sau păng, jêh ri H'Sarai, ur Y-Abram, jêng ƀăn păng, du luh ndrel bơh Ur, tâm n'gor Kaldê, hăn tât Kanaan. Ƀiălah dôl tât ta Charan khân păng gŭ ta nây.

³² Y-Têra dơi rêh bar rhiăng ma prăm năm, jêh nây khĭt ta Charan.