Nau Ntơm 1 - Nau Brah Ndu Ngơi 2023

Rnôk ơm kăl e, ntơm bơh nau rhăk njêng neh ntu tât rơh Y-Abraham ( 1:1 – 11:9 ) Nau rhăk njêng neh ntu

¹ Ntơm saơm, Brah Ndu rhăk njêng trôk jêh ri neh.

² Neh mâu geh rup ôh jêh ri nsoih bŏng, nau ngo nkŭm ta klơ brŏng jru, jêh ri Huêng Ueh Brah Ndu rsong ta klơ n'ha dak.

³ Brah Ndu lah: “Ăn geh nau ang,” jêh ri geh nau ang.

⁴ Brah Ndu saơ nau ang jêng ueh. Brah Ndu tâm rnglah nau ang bơh nau ngo.

⁵ Brah Ndu kuăl nau ang jêng “nar,” jêh ri nau ngo jêng “măng.” Pôri, geh măng jêh ri geh ôi. Nây jêng nar tal nguay.

⁶ Brah Ndu lah: “Ăn geh du ntŭk đôr ta nklang n'gul dak gay ma tâm nkhah dak đah dak.”

⁷ Brah Ndu njêng đôr trôk jêh ri tâm nkhah dak tâm dâng đah dak ta klơ đôr, nau nây geh kơt nĕ.

⁸ Brah Ndu rnha ntŭk đôr jêng “trôk.” Pôri, geh măng jêh ri geh ôi. Nây jêng nar tal bar.

⁹ Brah Ndu lah: “Ăn dak tâm dâng trôk rgum nsŭn tâm du ntŭk jêh ri ăn geh neh sơh mpơl,” nau nây geh kơt nĕ.

¹⁰ Brah Ndu rnha ntŭk sơh jêng “neh,” bi ntŭk dak nsŭn jêng “dak mƀŭt.” Brah Ndu saơ nau nây jêng ueh.

¹¹ Brah Ndu lah: “Neh mra hon gơ̆ tơm si: gơ̆ geh găr ntil, tơm si klơ neh tĭng nâm ntil luh play jêh ri geh găr,” pôri nau nây geh kơt nĕ.

¹² Neh hon gơ̆ tơm si: gơ̆ geh găr tĭng nâm ntil, tơm si geh play jêh ri tâm play geh găr tĭng nâm ntil. Brah Ndu saơ nau nây jêng ueh.

¹³ Pôri, geh măng jêh ri geh ôi. Nây jêng nar tal pe.

¹⁴ Brah Ndu lah: “Ăn geh lĕ rplay nau ang ta đôr trôk gay tâm nkhah nar đah măng, gay ăn nau mbên tâm nal lĕ yan, nar jêh ri năm;

¹⁵ jêh ri gay ƀư lĕ nau ang ta đôr trôk sol ang rplay neh,” nau nây geh kơt nĕ.

¹⁶ Brah Ndu njêng bar rplay nau ang toyh: nau ang toyh lơn gay mât uănh nôk nar, nau ang jê̆ lơn gay mât uănh nôk măng. Păng njêng đŏng lĕ mănh mbing.

¹⁷ Brah Ndu dơm lĕ nau ang nây ta đôr trôk gay sol ang rplay neh,

¹⁸ mât chiă nôk nar jêh ri măng, jêh ri tâm nkhah nau ang bơh nau ngo. Brah Ndu saơ nau nây jêng ueh.

¹⁹ Pôri, geh măng jêh ri geh ôi. Nĕ jêng nar tal puăn.

²⁰ Brah Ndu lah: “Dak ăn geh âk râk ăp ntil ndơ rêh, jêh ri geh ăp ntil sĭm mpăr klơ neh tâm dâng đôr trôk.”

²¹ Brah Ndu rhăk njêng lĕ ntil ka toyh, lĕ ntil mpa rêh tâm dak, tĭng nâm ntil gay deh kon bĭk rơ̆ tâm dak, jêh ri lĕ ntil sĭm geh năr mpăr tĭng nâm ntil. Brah Ndu saơ nau nây jêng ueh.

²² Brah Ndu ăn nau ueh uĭn ma lĕ ntil nây jêh ri lah: “Ăn deh bĭk rơ̆ dŭt âk, gay bêng tâm dak mƀŭt; bi ma lĕ ntil sĭm ăn bĭk dŭt âk ta klơ neh.”

²³ Pôri, geh măng jêh ri geh ôi. Nây jêng nar tal prăm.

²⁴ Brah Ndu lah: “Ăn neh geh lĕ mpa rêh tĭng nâm ntil: mpô mpa rong, lĕ ntil mpa vơr jêh ri mpô mpa bri tĭng nâm ntil,” geh kơt nây ro.

²⁵ Brah Ndu njêng lĕ mpô mpa bri tĭng nâm ntil, mpô mpa rong tĭng nâm ntil, jêh ri lĕ ntil mpa vơr ta neh tĭng nâm ntil. Brah Ndu saơ nau nây jêng ueh.

Nau rhăk njêng kon bunuyh

²⁶ Brah Ndu lah: “Ăn He njêng bunuyh tĭng nâm rup He jêh ri tâm ban ma He Nơm, gay ăn khân păng chiă uănh lĕ ntil ka tâm dak mƀŭt, lĕ ntil sĭm klơ trôk, lĕ ntil mpô mpa rong, jêh ri lam neh, ndrel ma lĕ rngôch ntil mpa vơr ta neh.”

²⁷ Brah Ndu rhăk njêng bunuyh tĭng nâm rup Păng Nơm. Păng rhăk njêng bunuyh tĭng nâm rup Brah Ndu. Păng rhăk njêng bu klâu jêh ri bu ur.

²⁸ Brah Ndu ăn nau ueh uĭn ma bunuyh jêh ri lah: “Ăn khân may deh kon, ăn bĭk rơ̆ âk râk jêh ri ƀư ăn bêng neh; ƀư hom ăn neh tông bâr, chiă uănh hom ntil ka tâm dak mƀŭt, ntil sĭm mpăr klơ trôk jêh ri lĕ rngôch mpa vơr ta neh.”

²⁹ Brah Ndu lah: “Aơ, Gâp mra ăn ma ay may ăp ntil gơ̆ geh găr hon lam klơ neh, nđâp lĕ ntil tơm si play geh găr. Nây mra jêng ndơ sa ăn ma ay may.

³⁰ Bi ma lĕ ntil mpô mpa bri, ntil sĭm klơ trôk, ntil mpa vơr ta neh, jêh ri ăp ntil mpô mpa geh nau rêh Gâp ăn ma ăp ntil gơ̆ nse jêng ndơ sa,” pôri geh kơt nây ro.

³¹ Brah Ndu saơ lĕ ntil ndơ Păng hŏ njêng jêh; ri, ueh ngăn ngên! Pôri, geh mhaơ jêh ri ôi. Nây jêng nar tal prao.